Apokalipsis

Li roso’jikil hu sa’ li Ak’ Chaq’rab’; wan wi’ jun li na’leb’ k’utb’esinb’il chiru laj Jwan li Apostol. A’an kikanab’aak chirilb’al li k’a’ru taa’uxmanq sa’ li ruchich’och’, ut q’axal wi’chik sa’ roso’jikeb’ li kutan (Apok. 1:1–2; 1 Ne. 14:18–27; Tz. ut S. 77). Apokalipsis a’an jun aatin sa’ Griego li naraj naxye “k’utb’esinb’il,” malaj “teeb’il ru,” ut naru ajwi’ nayeeman chirix yalaq k’a’ru chi xnimal ru k’utb’esink.

Laj Jwan kixk’ul li k’utb’esink a’in sa’ xkutan li Qaawa’ sa’ Patmos, jun ch’och’ sa’ xyi li palaw (Apok. 1:9–10) li wan chire li ch’och’ Asia, moko najt ta rik’in Efeso. Ink’a’ nanawman jo’q’e tz’aqal kik’eeman li k’utb’esink.

Wan li laawil na’leb’ re xtawb’al ru li hu sa’ 1 Nefi 14:18–27 ut sa’ Tz. ut S. 77 (Eter 4:15–16).

Sa’eb’ li ch’ol 1–3 wan xtikib’ankil li hu ut li hu taqlanb’il reheb’ li wuqub’ chi iglees sa’ Asia. Laj Jwan kixtz’iib’aheb’ li hu re xtenq’ankileb’ laj santil paab’anel chixtuqub’ankil junjunq li ch’a’ajkilal. Li ch’ol 4–5 naxye resil li k’utb’esinb’il matk’ kiril laj Jwan chirix lix nimajwal loq’al ut lix tiikil wankilal li Dios ut li Kristo. Sa’eb’ li ch’ol 6–9, 11, laj Jwan kixtz’iib’a resil naq kiril jun li hu tz’apb’il rik’in wuqub’ chi tz’apleb’, ut li junjunq chi tz’apleb’ a’an reetalil jun mil chihab’ re lix wanjik li ruchich’och’. Eb’ li jar ch’ol a’in neke’aatinak chi naab’al chirix li k’a’ru na’uxman sa’ li xwuq tz’apleb’ (chi’ilmanq Apok. 8–9; 11:1–15). Li ch’ol 10 na’aatinak chirix jun li hu kixk’ux laj Jwan. Li hu a’an reetalil jun li taqlanb’il k’anjel tixb’aanu sa’ jun kutan chalel. Sa’ li ch’ol 12 tz’iib’anb’il resil jun k’utb’esinb’il matk’ chirix li maa’usilal li kitikla sa’ choxa naq laj Satanas kixpo’resi xch’ool ut ki’isiik chaq. Li pleet li kitikla aran toj yoo chi pleetimank sa’ li ruchich’och’. Sa’eb’ li ch’ol 13 ut 17–19, laj Jwan kixye resileb’ li maa’us aj awa’b’ejihom sa’ ruchich’och’ li b’eresinb’ileb’ xb’aan laj Satanas, ut kixtz’iib’a resil lix k’ulumaqeb’, sa’ li wan wi’ lix sachlijik li maa’usilal sa’ roso’jik. Sa’eb’ li ch’ol 14–16, yeeb’il resil lix tiikilaleb’ laj santil paab’anel sa’ xyi li maa’usilal ka’ch’in chik ma nak’ulun xkab’ wa li Kristo. Eb’ li ch’ol 20–22 neke’xye resil li Jun Mil Chihab’, li chaq’al ru tenamit re li Ak’ Jerusalen, ut li k’a’aq re ru taa’uxmanq sa’ roso’jik li ruchich’och’.