Mormon, profeet aj Nefita

Jun ch’ina hu sa’ lix Hu laj Mormon. Chirix xraqik li raatin laj Amaleki sa’ lix Hu laj Omni ut rub’elaj li xb’een aatin sa’ lix hu laj Mosiah, laj Mormon, li kik’uub’ank re chixjunil li hu, kixch’ik xka’ch’inal li aatin a’in. (Chi’ilmanq “Jun Ch’ina Ch’olob’anb’il Aatin chirix Lix Hu laj Mormon,” li wan sa’ xtiklajik lix Hu laj Mormon.)

Jun li hu li wan sa’ li jun siir chi hu lix Hu laj Mormon yeeb’il re. Sa’ li ch’ol 1–2 wan resil laj Ammaron, jun profeet reheb’ laj Nefita, li kixk’e xna’leb’ laj Mormon chirix jo’q’e ut b’ar tixk’uleb’ li perel ch’iich’. Jo’kan ajwi’, ke’tikla li ninqi pleet, ut li oxib’ chi aj Nefita ke’isiik chaq xb’aan lix maa’usilaleb’ li tenamit. Sa’eb’ li ch’ol 3–4 naxye resil naq laj Mormon kixyaab’asi li jalb’a-k’a’uxlej chiruheb’ li tenamit, a’b’anan maak’a’eb’ chik reek’ahomeb’, ut q’axal nim wi’chik li maa’usilal li kinumta chiru li wanjenaq chaq jun sutaq sa’ Israel. Sa’eb’ li ch’ol 5–6 naxye resil li roso’jikil pleet reheb’ laj Nefita rik’ineb’ laj Lamanita. Laj Mormon kikamsiik rochb’een lix k’ihal li tenamit aj Nefita. Sa’ li ch’ol 7, rub’elaj xkamik, laj Mormon kixye reheb’ li tenamit—sa’ li kutan a’an ut sa’ li kutan toj taachalq—naq te’xjal xk’a’uxl. Sa’eb’ li ch’ol 8–9 tz’iibanb’il resil naq ka’aj chik laj Moroni, li ralal laj Mormon, kikana. A’an kixtz’iib’a resil lix raqik li ninqi pleet ut kamsink, jo’ ajwi’ roso’jik li tenamit aj Nefita, ut kixtz’iib’a jun esil reheb’ li tasal tenamit li toj te’chalq, ut reheb’ li ani te’iloq re li tz’iib’anb’il esil.