Jun Ch’ina Ch’olob’anb’il Aatin chirix lix Hu laj Mormon

Lix Hu laj Mormon a’an jun li loq’laj tz’iib’anb’il esil chirixeb’ li tenamit li ke’wan najter America ut kitz’iib’aman chiru perpookil ch’iich’. A’aneb’ a’in junjunq li ki’isiik chaq wi’ li esilal:

Eb’ lix Perel Ch’iich’ laj Nefi, ut wiib’ paay a’an: eb’ li perel ch’iich’ li kok’ ru ut eb’ li perel ch’iich’ li ninq ru. Li xb’een, a’an na’aatinak chirix k’a’aq re ru re li musiq’ej, ut lix k’anjeleb’ ut lix k’utumeb’ li profeet, ut li xkab’ q’axal wi’chik naxye resil li k’a’ru yoo chi k’ulmank sa’eb’ li tenamit a’an (1 Nefi 9:2–4). Chirix b’an lix kutankil laj Mosiah, sa’eb’ li perel ch’iich’ li ninq ru wan ajwi’ li na’leb’ re li musiq’ej li nim xwankil.
Eb’ lix Perel Ch’iich’ laj Mormon, b’ar wi’ laj Mormon kixk’os ru li k’a’ru wan sa’eb’ lix perel ch’iich’ laj Nefi li ninq ru, ut kixye k’iila aatin chirix. Chiruheb’ li perel ch’iich’ a’in wan ajwi’ li esil kixtz’iib’a laj Mormon, ut junjunq aatin kixtiq laj Moroni li ralal.
Eb’ lix Perel Ch’iich’ laj Eter, li neke’xye resileb’ laj Jaredita. Li esil a’in kik’ose’ ru xb’aan laj Moroni, ut kixtiq ajwi’ junjunq aatin kixtz’iib’a a’an, ut kixch’utub’ li tz’iib’anb’il esil a’in rik’in li nimla esil, ut “lix Hu laj Eter” kixk’e choq’ xk’ab’a’.
Eb’ li Perel Ch’iich’ Bronce ke’k’ame’ xb’aan lix tenamit laj Lehi naq ke’el chaq Jerusalen 600 chihab’ ma nayo’la li Kristo. Sa’ a’an wan “ro’ichal xhu laj Moises, … ut jo’kan ajwi’ li resileb’ laj Judio tz’iib’anb’il chalen chaq sa’ xtiklajik, toj reetal … naq kitikla rawa’b’ejil laj Sedekias, li rey sa’ xb’een Juda; ut jo’kan ajwi’ lix profeetil aatineb’ li santil profeet” (1 Nefi 5:11–13). K’iila raqal isinb’il chaq sa’eb’ li perel ch’iich’ a’in, wan wi’ li raatin laj Isaias ut xkomoneb’ chik li profeet re li Santil Hu ut li moko wankeb’ ta sa’ li Santil Hu, neke’tawman sa’ lix Hu laj Mormon.

Sa’ lix Hu laj Mormon wan o’laju raqal malaj jachal, hu ajwi’ neke’yehe’ re (ka’ajwi’ jun ink’a’), ut lix k’ihaleb’ k’eeb’il xk’ab’a’ jo’ chanru xk’ab’a’ li xb’eenil li kitz’iib’an re. Li xb’een siir chi hu (waqib’ chi hu, li naraqe’ rik’in Omni) a’an li aatin sa’eb’ lix perel ch’iich’ laj Nefi li kok’ ru, chi jaltesinb’il ru. Sa’ xyanq li hu Omni rik’in li hu Mosiah wan jun raqal, li Raatin laj Mormon xk’ab’a’. Li jun raqal a’in naxjunaji li esil tz’iib’anb’il chiruheb’ li perel ch’iich’ li kok’ ru rik’in lix tz’iib’ahom laj Mormon k’osb’il wi’ ru li aatin sa’eb’ li perel ch’iich’ li ninq ru.

Li jun siir q’axal nim, li natikla rik’in Mosiah ut naraqe’ rik’in lix wuq xch’ol Mormon, a’an lix tz’iib’ahom laj Mormon k’osb’il wi’ ru eb’ lix perel ch’iich’ laj Nefi li ninq ru. Li jun siir sa’ roso’jik, li natikla rik’in lix waqxaq ch’ol li hu Mormon toj sa’ roso’jik li hu, tz’iib’anb’il xb’aan laj Moroni ralal laj Mormon, li kichoyok xtz’iib’ankil resil lix yu’am lix yuwa’, toja’ naq kixtz’iib’a chi k’osb’il ru li resileb’ laj Jaredita (a’an lix hu laj Eter), ut moqon kixtiq li aatin li nawb’il ru jo’ lix hu laj Moroni.

Naq wan tana’ 421 chihab’ xyo’lajik li Kristo, laj Moroni, a’an aj ch’otonel reheb’ li profeet aj yehol esil, kixk’e xtz’apb’al li loq’laj tz’iib’anb’il esil, ut kixmuq choq’ re li Qaawa’, re taak’ehe’q chi k’utmank sa’ roso’jik li kutan, jo’ chanru yeeb’il chi junxilaj xb’aan lix yaab’ xkux li Qaawa’ rik’in xtz’uumaleb’ re lix najter profeet. Sa’ 1823 chihab’ xyo’lajik chaq li Kristo, laj Moroni, ak waklijenaq chik chi yo’yo, kirula’ani li Profeet aj Jose Smith ut moqon kixq’axtesi re li k’a’ru tz’iib’anb’il chiruheb’ li perel ch’iich’.

Chirix lix k’uub’lajik li hu a’in: Li xb’eenil perel re xjolomil li aatin, li nachal xb’eenil chiru xperelil li k’a’ru wan sa’ li hu, ki’isiman chaq sa’ li perel ch’iich’ ut a’an ajwi’ jun raqal li santil tz’iib’ahom. Lix tikib’ankileb’ li ch’ol sa’ li hu li moko tz’iib’anb’ileb’ ta sa’ cursiva, jo’ li wan sa’ 1 Nefi ut sa’ Mosiah ch’ol 9, a’aneb’ ajwi’ xkomon li santil tz’iib’ahom. Lix tikib’ankileb’ li ch’ol sa’ li hu li wankeb’ sa’ cursiva moko ke’el ta chaq sa’ li xb’eenil tz’iib’ahom a’ut wankeb’ choq’ jun li tenq’ sa’ li tzolok.

Wan junjunq li aatin moko tz’aqal ta li tawb’il sa’ lix Hu laj Mormon li napuktesiman junxil sa’ Ingles. Sa’ li jun puktesink a’in, k’uub’anb’il li aatin re tixk’am rib’ rik’in li hu kitz’iib’aman chi uq’ej naq maji’ napuktesiman, ut rik’in li puktesink kib’aanuman sa’ xtiklajik, li k’uub’anb’il xb’aan li Profeet aj Jose Smith.