Lix
Hu laj Mormon

Jo’kan ut, a’an xk’osb’al ru jun li tz’iib’anb’il esil re lix tenamit laj Nefi, ut reheb’ ajwi’ laj Lamanita—Tz’iib’anb’il reheb’ laj Lamanita, a’aneb’ jun rela’ lix junkab’al laj Israel; ut re ajwi’ laj Judio ut laj Gentil—Tz’iib’anb’il jo’ chanru taqlanb’il, ut jo’kan ajwi’ rik’in li musiq’ej re profeetil aatin ut re k’utb’esink—Tz’iib’anb’il ut k’eeb’il xtz’apb’al, ut muqb’il choq’ re li Qaawa’, re naq ink’a’ taasachmanq—Taak’utmanq xb’aan lix maatan ut lix wankilal li Dios re taak’utmanq xyaalalil—K’eeb’il xtz’apb’al xb’aan ruq’ laj Moroni, ut muqb’il choq’ re li Qaawa’, re taak’utmanq naq tixtaw xq’ehil rik’in ruq’eb’ laj Gentil—K’utb’il xyaalalil xb’aan xmaatan li Dios.

Jo’kan ajwi’ jun k’osb’il ru esil isinb’il chaq sa’ lix Hu laj Eter, a’an jun li tz’iib’anb’il esil re lix tenamit laj Jared, li ke’jek’iman sa’ li kutan naq li Qaawa’ kixjachi ru li raatinob’aal li tenamit, naq yookeb’ chixkab’lankil jun li najt xteramil kab’l re te’xik sa’ choxa—Li wan choq’ re xk’utb’al chiru li rela’ lix junkab’al laj Israel chanru xninqal li k’a’aq re ru kixb’aanu li Qaawa’ choq’ reheb’ lix yuwa’eb’; ut re te’xnaw lix sumwank li Qaawa’, naq moko tz’eqb’ileb’ ta chi junajwa—Ut jo’kan ajwi’ re te’q’unb’esiiq xch’ool laj Judio ut laj Gentil naq li Jesus a’an li Kristo, li Junelik Dios, li naxk’utb’esi rib’ chiruheb’ chixjunil li tenamit—Anajwan ut, wi wan li majelal, a’an lix sachomeb’ wi’ li winq; jo’kan ut, meetz’eqtaana xloq’al li k’a’ru re li Dios, re naq taaruuq textawe’q chi maak’a’ eetz’ajnil sa’ lix raqleb’aal aatin li Kristo.