Lix Ch’olob’ahomeb’ li Oxib’ chi aj Yehol Nawom

Chinawmanq sa’ chixjunileb’ li tenamit, junkab’al, aatinob’aal, ut teepal taawulaq wi’ li k’anjel a’in: Naq laa’o, sa’ xk’ab’a’ li rusilal li Dios, Yuwa’b’ej, ut li Qaawa’ Jesukristo, qilomeb’ li perel ch’iich’ wan wi’ li tz’iib’anb’il esil a’in, a’an jun tz’iib’anb’il esil chirix lix tenamit laj Nefi, ut chirixeb’ ajwi’ laj Lamanita, ras riitz’ineb’, ut chirixeb’ ajwi’ lix tenamit laj Jared, li ke’el chaq sa’ li najt xteramil kab’l li aatinanb’il chirix. Ut naqanaw naq jaltesinb’il ru rik’in lix maatan ut lix wankilal li Dios, xb’aan naq lix yaab’ xkux a’an xch’olob’ank re chiqu; jo’kan naq naqanaw chi ch’olch’o naq yaal li k’anjel. Ut naqach’olob’ ajwi’ xyaalal naq qilom li k’a’ru tz’iib’anb’il chiruheb’ li perel ch’iich’; ut k’utb’il chiqu rik’in lix wankil li Dios, ut moko re ta winq. Ut naqaye chi tiik ru li qaatin, naq jun lix anjel li Dios kikub’e chaq sa’ choxa, ut a’an kixk’am chaq ut kixk’ojob’ chiru li qilob’aal, jo’kan naq kiqak’e reetal ut kiqileb’ li perel ch’iich’, ut li tz’iib’anb’il chiru, ut naqanaw naq a’an xb’aan li rusilal li Dios Yuwa’b’ej, ut li Qaawa’ Jesukristo, naq kiqil ut naqach’olob’ xyaalal naq yaal li na’leb’ a’in. Ut a’an sachol ch’oolej sa’ qilob’aal. A’ut lix yaab’ xkux li Qaawa’ kixk’e qataqlankil naq taqach’olob’ xyaalal a’an; jo’kan ut, re xpaab’ankil lix taqlahom li Dios, naqach’olob’ xyaalal li na’leb’ a’in. Ut naqanaw naq wi tiiko chixpaab’ankil li Kristo, taqisi chirix li qaq’ lix kik’eleb’ chixjunil li winq, ut tootawe’q chi maak’a’aq qatz’ajnil chiru lix raqleb’aal aatin li Kristo, ut toowanq rik’in a’an chi junelik sa’ choxa. Ut nimanb’ilaq taxaq ru li Yuwa’b’ej, ut li K’ajolb’ej, ut li Santil Musiq’ej, a’an junaj chi Dios. Amen.