Musiq’ej, xmusiq’

Li k’a’ru re li ani yo’yo li kiwan chi maji’aq nayo’la sa’ li yu’am a’in, li wan sa’ li tz’ejwalej chiru li yu’am a’in, ut li nawan chirix li kamk chi jachjo ru rik’in li tz’ejwalej toj reetal li wakliik chi yo’yo. Chixjunil li k’a’ru yo’yo—li winq, li xul, ut eb’ li che’—ke’wan choq’ musiq’ej rub’elaj naq kiwan k’a’ruhaq re yu’am sa’ xb’een li ruchich’och’ (Gen. 2:4–5; Mois. 3:4–7). Lix junxaqalil li musiq’ej chanchan xjunxaqalil li tz’ejwalej (1 Ne. 11:11; Eter 3:15–16; Tz. ut S. 77:2; 129). Li musiq’ej wan k’a’ru okenaq wi’, a’b’anan q’axal chaab’il wi’chik malaj saq wi’chik ru chiru li k’a’aq re ru nak’utun sa’ li yu’am a’in (Tz. ut S. 131:7).

Li junjunq chi winq malaj ixq a’an tz’aqal ralal malaj xrab’in li Dios, ut kiyo’la jo’ musiq’ej chiru li Choxahil Na’b’ej Yuwa’b’ej rub’elaj naq kiyo’la rik’in li ruchich’och’il na’b’ej yuwa’b’ej sa’ li yu’am a’in (Heb. 12:9). Li junjunq li wan sa’ li ruchich’och’ wan xmusiq’ li ink’a’ nakam, rochb’een lix junxaqalil re tib’ ut b’aq. Jo’ yeeb’il sa’eb’ li loq’laj hu, li musiq’ej rochb’een li tz’ejwalej a’aneb’ li aamej (Gen. 2:7; Tz. ut S. 88:15; Mois. 3:7, 9, 19; Abr. 5:7). Jun musiq’ej naru nawan chi yo’yo chi maak’a’ li tz’ejwalej, a’b’an li ruchich’och’il tz’ejwalej ink’a’ naru nawan chi yo’yo chi maak’a’ li musiq’ej (Santiago 2:26). Li kamk re tz’ejwalej a’an naq naxjach rib’ li musiq’ej rik’in li tz’ejwalej. Sa’ li wakliik chi yo’yo, li musiq’ej najunajiman wi’chik rik’in ajwi’ li tz’ejwalej re tib’ ut b’aq kiwan wi’ chaq sa’ li yu’am a’in, ka’ajwi’ naq wan wiib’ paay li k’a’ru xjalman: maajo’q’e chik te’xjach rib’, ut li tz’ejwalej taawanq chi ink’a’ chik taakamq ut chi tz’aqalaq re ru (Alma 11:45; Tz. ut S. 138:16–17).