Kolosenses, hu reheb’ laj Kolosas

Jun li hu sa’ li Ak’ Chaq’rab’. A’an chaq jun li hu li kixtz’iib’a li Apostol aj Pablo rik’ineb’ laj Kolosenses chirix naq ki’ula’aniik xb’aan laj Epafras, aj osob’tesinel re li Iglees aran Kolosas (Kol. 1:7–8). Laj Epafras kixye re laj Pablo naq eb’ laj Kolosas yookeb’ chi t’ane’k sa’ li nimla sachk—ke’xk’oxla naq q’axal chaab’ileb’ wi’chik chiru li jun ch’ol chik rik’in naq wankeb’ junjunq li k’utk’uukil k’anjel li k’eek’ookeb’ xch’ool chixb’aanunkil (Kol. 2:16), wan k’a’aq re ru re li tz’ejwalej li ke’xram wi’ rib’, ut ke’xloq’oniheb’ li anjel (Kol. 2:18). Rik’in xb’aanunkil a’in, eb’ laj Kolosas ke’xk’oxla naq yookeb’ chi santob’resiik. Ke’xk’oxla ajwi’ naq q’axal wi’chik neke’xtaw ru li muqmuukil na’leb’ re li choxa ch’och’ chiru li jun ch’ol chik reheb’ li komon sa’ li Iglees. Sa’ lix hu, laj Pablo kixq’useb’ rik’in xk’utb’al chiruheb’ naq li tojb’al-ix ka’ajwi’ sa’ xk’ab’a’ li Kristo nachal, ut naq tento taawanq qana’leb’ ut took’anjelaq chiru.

Sa’ li ch’ol 1 laj Pablo naxk’e xsahil xch’ooleb’ laj Kolosas. Sa’eb’ li ch’ol 2–3 wan li tzol’leb’, ut junjunq li aatin chirix li Kristo jo’ aj Tojol-ix, naq xiwxiw li b’alaq’il loq’onink, ut naq na’ajman li wakliik chi yo’yo. Sa’ li ch’ol 4 naxk’ut chiruheb’ laj santil paab’anel naq chaab’ilaqeb’ xna’leb’ sa’ chixjunil li k’a’aq re ru.