Pablo, eb’ lix hu

Laj Pablo kixtz’iib’aheb’ li hu reheb’ laj Tesalonicense chalen chaq Korinto sa’ xkab’ lix b’eenik jo’ aj k’amol aatin. Yeeb’il resil lix k’anjel Tesalonika sa’ Hechos 17. Kiraj raj sutq’iik Tesalonika, a’b’an ink’a’ kiru chixb’aanunkil (1 Tes. 2:18). Xb’aan a’an kixtaqla laj Timoteo re xk’eeb’al xsahileb’ xch’ool li ani jalb’ileb’ xch’ool, ut re xk’amb’al chaq resil chanru naq wankeb’. Li xb’een hu naxye resil xsahil lix ch’ool naq kisutq’i chaq laj Timoteo. Li xkab’ hu kitz’iib’aman ka’ch’in chik chirix a’an.

Laj Pablo kixtz’iib’aheb’ li hu reheb’ laj Korinto sa’ rox lix xb’eenik jo’ aj k’amol aatin, re xsumenkil li patz’om ut re xtuqub’ankil li ch’a’ajkilal sa’ xyanqeb’ laj santil paab’anel aran Korinto.

Naru naq li hu reheb’ laj Galata kitz’iib’aman re naab’al ch’uut re li Iglees chiru chixjunil li ch’och’ Galacia. Wankeb’ li komon sa’ li Iglees li yookeb’ chaq chixkanab’ankil li evangelio re xk’ulb’al lix chaq’rab’eb’ laj Judio. Sa’ li hu a’in, laj Pablo kixch’olob’ xyaalal lix chaq’rab’ laj Moises, ut k’a’ut naq ki’ajman jun li musiq’ejil paab’aal.

Laj Pablo kixtz’iib’a li hu reheb’ laj Romano chalen chaq Korinto, re xkawresinkileb’ laj santil paab’anel aj Romano rub’elaj naq taawulaq rik’ineb’. Li hu a’in naxch’olob’ wi’chik li tzol’leb’ li wech’inb’il chaq xb’aan junjunq reheb’ laj Judio li ke’xjal chaq xch’ool re xk’ulb’al li Kristianil.

Laj Pablo kixtz’iib’aheb’ li hu a’in naq wan xb’een wa sa’ tz’alam sa’ Roma.

Laj Pablo kixtz’iib’a li hu reheb’ laj Filipense re xb’antioxinkil ut xyeeb’al resil lix rahom choq’ reheb’ laj santil paab’anel aj Filipense, ut re xsahob’resinkileb’ xch’ool chirix naq kiwan a’an sa’ tz’alam chiru k’iila kutan.

Laj Pablo kixtz’iib’a li hu reheb’ laj Kolosense xb’aan naq yeeb’il chaq resil naq eb’ laj santil paab’anel aj Kolosense yookeb’ chi t’ane’k sa’ li nimla sachk. Eb’ a’an ke’xpaab’ naq li tz’aqalil re ru nachal xb’aan xb’aanunkil chi tz’aqal li k’utk’uukil k’ojob’anb’il k’anjel, ut moko rik’in ta wank sa’ xch’ooleb’ jo’ chanru li Kristo.

Li hu reheb’ laj Efesio q’axal nim xwankil, xb’aan naq wan chi sa’ lix k’utum laj Pablo chirix lix Iglees li Kristo.

Li hu re laj Filemon a’an jun li hu chirix laj Onesimo, jun loq’b’il moos li ki’elq’ak chaq chiru laj eechal re, aj Filemon, ut ki’eelelik chaq toj Romano. Laj Pablo kixtaqla wi’chik laj Onesimo rik’in laj eechal re, rochb’een li hu re xtz’aamankil naq kuyb’ilaq xmaak laj Onesimo.

Laj Pablo kixtz’iib’a li hu reheb’ laj Hebreo rik’ineb’ laj Judio li wankeb’ choq’ komon sa’ li Iglees, re xq’unb’esinkileb’ xch’ool naq ak tz’aqlojenaq ru lix chaq’rab’ laj Moises, ut lix chaq’rab’ li Kristo sa’ li evangelio ak okenaq choq’ ruuchil a’an.

Laj Pablo kixtz’iib’aheb’ li oxib’ chi hu a’in chirix naq ki’isiik chaq sa’ tz’alam xb’een wa aran Roma.

Laj Pablo xko’o Efeso, b’ar wi’ kixkanab’ laj Timoteo re tixram xk’iijik junjunq li po’jenaqil na’leb’, ut kiraj raj sutq’iik chaq moqon. Naru naq kixtz’iib’a li xb’een hu re laj Timoteo chalen chaq Macedonia, re xk’eeb’al xna’leb’ ut xwaklesinkil xch’ool sa’ xb’aanunkil lix k’anjel.

Laj Pablo kixtz’iib’a li hu re laj Tito chiru li kutan naq moko wan ta sa’ tz’alam. Maare ak kiwulak chaq Kreta, b’ar wi’ yoo chi k’anjelak laj Tito. Li hu na’aatinak chirix li wank sa’ tiikilal, ut li tuqtuukil k’anjel sa’ li Iglees.

Laj Pablo kixtz’iib’a xkab’ lix hu re laj Timoteo naq kiwan xkab’ wa sa’ tz’alam, ka’ch’in chik rub’elaj xkamik laj Pablo. Sa’ li hu a’in wan roso’jik li raatin laj Pablo, ut naxk’ut lix chaab’ilal ut xkawil lix ch’ool li kixk’ul wi’ li kamk.