1 Lisin gud mo harem samting ia, O laen blong Jekob, we oli singaotem olgeta long nem blong Isrel, mo i bin kamaot long ol wota blong Juda, o aot long ol wota blong baptaes, we i mekem tru promes long nem blong Lod, mo i tokbaot God blong Isrel, be stil, oli no mekem tru promes long tru fasin o long stret mo gud fasin.

2 Be, oli talem se olgeta bakegen oli blong tabu bigtaon, be olgeta bakegen oli no dipen long God blong Isrel, we i Lod blong Ol Pipol; yes, Lod blong Ol Pipol, i nem blong hem.

3 Luk, mi talemaot ol samting we i bin hapen bifo stat long stat; mo oli bin go aot long maot blong mi, mo mi bin soemaot olgeta. Mi bin soemaot olgeta kwik taem nomo.

4 Mo mi mekem samting ia from mi save se yu no wantem lisin, mo nek blong yu i strong olsem aean, mo fored blong hed blong yu i strong olsem bras;

5 Mo, stat long stat, mi talemaot long yu; bifo i bin hapen mi bin soemaot olgeta long yu; mo mi soem olgeta from mi fraet se bae yu talem se: “Aedol blong mi i bin mekem olgeta, mo pikja blong mi we oli katem long wud mo pikja blong mi we oli mekem wetem aean, i bin givim oda long olgeta.”

6 Yu bin luk mo harem evri samting ia; ?mo bae yu no talemaot ol samting ia? Mo we mi bin soem long yu ol niu samting stat long taem ia, hem i ol samting we i haed, mo yu no bin save olgeta.

7 Oli stat nao, mo i no long stat, hem i bifo long dei ia we yu no bin harem olgeta oli bin talemaot ol samting ia long yu, from we bae yu se: “Luk mi bin save ol samting ia.”

8 Yes, mo yu no bin harem; yes, yu no bin save; yes, from stat long taem ia sora blong yu i no bin open yet; from mi bin save se bae yu go agensem, mo oli bin singaotem yu, wan man blong sin taem yu stap yet long bel blong mama blong yu.

9 Be, from gud blong nem blong mi, bae mi seftem kros blong mi, mo from glori blong mi bae mi holembak mi bakegen, blong mi no sakemaot yu.

10 From, luk, mi bin klinim yu, mi bin jusum yu long oven blong faea blong hadtaem.

11 From blong miwan, yes, from blong miwan nomo bae mi mekem samting ia, from bae mi no letem ol man oli rabisim nem blong mi, mo bae mi no givim glori blong mi long narawan.

12 Lisin gud long mi, O Jekob, mo Isrel, we mi bin singaotem, from Mi mi hem; Mi mi faswan, mo tu, Mi mi laswan.

13 Han blong mi tu i bin putum fandesen blong wol, mo raet han blong mi i bin mekem ol heven. Mi singaot long olgeta mo oli stanap tugeta.

14 Yufala evriwan, kam tugeta yufala bakegen, mo harem; ?huia long medel blong olgeta i bin talemaot ol samting ia long olgeta? Lod i bin lavem hem; yes, mo bae hem i mekem toktok blong hem i hapen we hem i bin talemaot tru long olgeta; mo bae hem i mekem olsem we hem i wantem long Babilon, mo han blong hem bae i kam long ol man Kaldia.

15 Tu, Lod i talem; mi Lod, yes, mi bin toktok; yes, mi bin singaotem hem blong talemaot, mi bin karem hem i kam, mo bae hem i mas mekem rod blong hem i mas kam antap gud.

16 Yu kam kolosap long mi; mi no toktok long sikret; stat long stat, stat long taem we oli bin talemaot samting ia mi bin talem; mo Lod God, mo Spirit blong hem, oli bin sendem mi.

17 Mo olsem ia nao Lod i talem, Ridima blong yu, Tabu Wan blong Isrel; mi bin sendem hem, Lod, God blong yu we i tijim yu blong kam antap, we i lidim yu long ol rod we yu mas go long hem, i bin mekem samting ia.

18 O sapos yufala i bin holem ol komanmen blong mi—sapos i bin olsem pis blong yu bae i olsem wan reva, mo stret mo gud fasin blong yu i olsem ol wef blong solwota.

19 Ol pikinini blong yu tu bae oli olsem ol sanbij; ol pikinini we bae oli kamaot long yu bae oli olsem sanbij; bae oli no bin katemaot nem blong hem o lus long fored blong mi.

20 Yu go aot long Babilon; yu ronwe long ol man Kaldia; wetem wan voes blong singsing yu talemaot, talemaot samting ia, talemaot long en blong wol; yu talemaot: “Lod i bin pemaot wokman blong hem Jekob.”

21 Mo oli no bin tosta; hem i lidim olgeta tru long ol draeples; hem i mekem ol wota i ron aot long ston blong olgeta; hem i kilim ston tu, mo wota i kamaot strong.

22 Mo i nomata we hem i bin mekem ol samting ia, mo ol narafala bigfalawan tu, Lod i talem se i no gat pis, long ol man nogud.