Japta 6
Nifae i raet long saed blong ol samting blong God—Nifae i mekem samting ia from we hem i wantem ol man blong kam long God blong Ebraham, blong Lod i sevem olgeta. Raonabaot 600–592 B.K.B.
1 Mo nao mi, Nifae, mi no raetem famli laen blong ol papa blong mi long pat blong histri ia blong mi; mo tu, bae mi no raetem long eni taem long ol buk ia we mi stap raetem; taswe, i stap long histri we papa blong mi i bin kipim; from samting ia mi no raetem samting ia long wok ia.
2 From hem i naf blong mi talem we mifala i kamaot long laen blong Josef.
3 Mo mi no wari tumas sapos mi no raetem evri histri blong papa blong mi, from mi no save raetem olgeta long ol buk ia, from mi wantem gat ol spes blong mi save raetem ol samting blong God.
4 From ful plan blong mi, hem i blong bae mi winim tingting blong ol man blong kam long God blong Ebraham, mo God blong Aesak, mo God blong Jekob, mo blong hem i save sevem olgeta.
5 Taswe, ol samting we oli gud long ae blong wol mi no raetem, be mi raetem ol samting we oli gud long ae blong God mo long olgeta we oli no blong wol.
6 Taswe, bae mi givim komanmen long ol pikinini blong mi, blong oli no mas fulumap buk ia wetem ol samting we i no gat yus long ol pikinini blong ol man.