Buk blong Momon

Taswe, buk ia i holem wan sot histri nomo blong evri histri long saed blong ol pipol blong Nifae, mo tu, blong Ol Man blong Leman—Oli bin raetem i go long Ol Man blong Leman, we oli smol haf nomo blong laen blong Isrel; mo tu, long Ol Jiu mo Jentael—Oli bin raetem folem komanmen, mo tu, tru long spirit blong profesi mo blong revelesen—Oli bin raetem mo silim, mo oli bin haedem wetem Lod, blong mekem se oli no save lus—Blong kamaot tru long presen mo paoa blong God blong tanem toktok blong hem—Han blong Moronae i bin silim, mo i bin haedem wetem Lod, blong kamaot long raet taem tru long wei blong Ol Jentael—Fasin blong tanem lanwis blong toktok blong buk ia i kam tru long presen blong God.

Hem i wan sot histri we i kamaot long Buk blong Ita tu, we i wan histri blong ol pipol blong Jared, we oli bin seraot olbaot long taem we Lod i bin jenisim ol lanwis blong ol pipol, taem we oli bin stap bildim wan taoa blong go long heven—We i blong soemaot long ol smol haf nomo blong laen blong Isrel wanem ol gudfala samting we Lod i bin mekem long ol papa blong olgeta; mo blong oli save gat save long saed blong ol kavenan blong Lod, blong hem i no sakemaot olgeta blong oltaem—Mo tu, blong winim tingting blong Ol Jiu mo Jentael se Jisas hem i Kraes, God we I no Save Finis, we i soemaot hemwan long evri kantri—Mo nao, sapos i gat sam samting we i no stret, oli ol mistek blong ol man; taswe, no toktok agensem ol samting blong God, blong mekem se yufala i stap klin gud long fored blong jea blong jajmen blong Kraes.