Fas Toktok

Buk blong Momon i wan buk blong tabu skripja semmak long Baebol. Hem i wan histri blong ol wok blong God wetem ol man bifo we oli stap laef long Ol Amerika mo i holem fulwan blong gospel ia we i no gat en.

Plante profet blong bifo oli bin raetem buk ia tru long spirit blong profesi mo revelesen. Ol toktok blong olgeta, we oli bin raetem long ol buk we oli mekem wetem gol, wan profet mo wan man blong histri we nem blong hem i Momon, i bin raetem ol stret toktok blong ol profet ia mo i bin raetem olgeta oli kam sot. Histri ia, i givim wan histri blong tu bigfala grup blong pipol. Wan i bin kamaot long Jerusalem 600 B.K.B., mo afta, hem i bin seraot i go long tu grup we oli save olgeta olsem, Ol Man blong Nifae, mo Ol Man blong Leman. Narafalawan i bin kam fastaem long taem we Lod i bin jenisim ol lanwis long Taoa blong Babel. Grup ia, oli save olsem olgeta Ol Man blong Jared. Afta plante taosen yia, olgeta evriwan i bin ded be Ol Man blong Leman nomo oli bin stap laef, mo oli ol stret bubu blong ol Indian blong Amerika.

Bigfala stori we i stap insaed long Buk blong Momon hem i seves blong Lod Jisas Kraes we hemwan i bin mekem long medel blong Ol Man blong Nifae kolosap afta we Hem i bin laef bakegen long ded. Buk i soemaot ol doktrin blong gospel, i soem plan blong fasin blong sevem man, mo i talem long ol man, wanem oli mas mekem blong kasem pis long laef ia, mo fasin blong sevem man we i no save finis long laef we bae i kam.

Afta we Momon i bin finisim ol raeting blong hem, hem i bin givim histri ia long boe blong hem Moronae, we i bin raetem smol toktok moa blong hemwan mo i bin haedem ol buk ia long Hil Kumora. Long 21 Septemba 1823, semfala Moronae ia, long taem ia hem i gat wan bodi blong glori, mo i bin kasem laef bakegen long ded, i bin kamaot long Profet Josef Smit, mo i bin tijim hem long saed blong histri ia blong bifo we bae hem i mas transletem i kam long Inglis lanwis.

Afta, long stret taem, hem i bin givim ol buk ia long Josef Smit, we i bin transletem olgeta tru long presen mo paoa blong God. Nao ia oli printim histri ia long plante lanwis olsem wan niu mo narafala witnes se Jisas Kraes i Pikinini blong God we i stap laef, mo se olgeta we bae oli kam long Hem mo obei ol loa mo ol odinens blong gospel blong Hem, bambae Hem i sevem olgeta.

Long saed blong histri ia, Profet Josef Smit i bin talem: “Mi bin talem long ol brata se Buk blong Momon i moa stret bitim eni narafala buk long wol, mo i ki ston blong relijin blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk.”

Wetem Josef Smit, Lod i bin jusum leven narafala man blong luk long ae blong olgeta, ol buk we oli mekem wetem gol, mo blong kam ol spesel witnes se Buk blong Momon i tru mo i kam long God. Ol testemoni blong olgeta we oli bin raetem, oli stap insaed long buk ia olsem “Testemoni blong Olgeta Tri Witnes” mo “Testemoni blong Olgeta Eit Witnes.”

Mifala i askem evri man long evri ples blong ridim Buk blong Momon, blong tingting hevi long hat blong olgeta, mesej we i stap insaed long hem, mo afta, blong askem God, Papa we I No Save Finis, long nem blong Kraes sapos buk ia i tru. Olgeta we oli folem stamba tingting ia, mo askem wetem fet bae oli kasem testemoni se hem i tru, mo se i kam long God, tru long paoa blong Tabu Spirit. (Luk long Moronae 10:3–5.)

Olgeta we oli kasem tabu witnes ia tru long Tabu Spirit, bae oli kam blong save tu tru long sem paoa, se Jisas Kraes i Sevya blong wol, se Josef Smit i man blong revelesen blong Hem mo profet long ol las dei ia, mo se Jos Ia blong Jisas Kraes blong Ol Lata-dei Sent i kingdom blong Lod we i stanap wan taem bakegen long wol, blong mekem man i rere from Seken Kaming blong Mesaea.