1 Inā faalogo mai ia ma faafofoga mai i le mea lenei, le aiga e o Iakopo, o e ua ta’ua i le igoa o Isaraelu, ma ua o ese mai vai o Iuta, po o le o a’e mai vai o le papatisoga, o e ua tauto i le suafa o le Alii, ma ta’uta’u atu le Atua o Isaraelu, a ua latou lē tauto i le faamaoni po o le amiotonu.

2 Ae ui i lea, ua latou ta’ua i latou lava o le aai paia, ae ua latou lē faalagolago i le Atua o Isaraelu, o lē o le Alii o ’Au; ioe, o le Alii o ’Au o lona suafa lea.

3 Faauta, ua Ou tautino atu mea sa i ai muamua mai le amataga; ma sa alu atu ia mea mai lo’u gutu, ma sa Ou faailoa atu i latou. Sa faafuasei ona Ou faailoa atu o i latou.

4 Ma sa Ou faia lenei mea ona sa Ou iloa ua e finauvale ma o lou ua o se uaua u’amea, ma o lou muaulu o se apamemea;

5 Ma sa Ou ta’u atu lava ia te oe mai le amataga; ae lei oo mai ia mea sa Ou faailoa atu lava i latou ia te oe; ma sa Ou faailoa atu i latou i le fefe ne’i e fai ane: O lo’u tupua na faia i latou, ma o lo’u tupua ta, ma lo’u tupua gaosi na poloaiina i latou.

6 Sa e vaai ma faalogo i nei mea uma; ma e te lē tauina atu ea i latou? Ma sa Ou faaali atu foi ia te oe mea fou mai le taimi lea, o mea natia lava, ae sa e lē iloaina i latou.

7 Ua foafoaina nei i latou, ma ua lē mai i le amataga, ae sa ta’u atu lava i latou ia te oe ae lei oo i le aso na e lē faalogo ai ia te i latou, ne’i e fai ane—Faauta sa Ou iloaina i latou.

8 Ioe, ma sa e lē faalogo lava; ioe, sa e lē iloaina lava; ioe, mai lena taimi sa lē ua’i mai ou taliga; ona sa Ou iloa o le a e fai mea faalata tele, ma sa ta’ua ‘oe o se tagata solitulafono a o lei fanau mai.

9 Ae ui i lea, o le a Ou faatelegese ea lo’u ita ona o lo’u igoa, ma mo lo’u viiga o le a Ou taofi ai a’u mai ia te oe, ina ia Ou lē vavaeeseina oe.

10 Aua faauta, ua Ou faamamāina oe, ua Ou filifilia oe mai i le ogaumu o puapuaga.

11 Ona o a’u lava, ioe, ona o a’u lava o le a Ou faia ai lenei mea, ona o le a Ou lē tuua lo’u igoa ia faaeleeleaina, ma o le a Ou lē tuu atu lo’u mamalu i se tasi.

12 Faalogo mai ia ia te a’u, Iakopo e, ma Isaraelu i la’u valaaulia, ona o A’u o ia; o A’u o lē e muamua, ma o A’u foi o lē e mulimuli.

13 O lo’u lima foi na faataotoina le faavae o le lalolagi, ma o lo’u lima taumatau na folasia le lagi. Ou te valaau atu ia te i latou ma ua latou tutu faatasi mai i luga.

14 Outou uma, ia outou faapotopoto outou lava, ma faalogo mai; o ai se o i totonu ia te i latou na ia ta’u atu nei mea ia te i latou? Sa alofa le Alii ia te ia; ioe, ma o le a faataunuuina e ia lana fetalaiga na ia ta’u mai e ala mai ia te i latou; ma o le a fai e ia lona finagalo i luga o Papelonia, ma o le a oo ifo lona aao i luga o Kaletaia.

15 O lenei foi, ua fetalai mai le Alii: O A’u o le Alii, ioe, ua Ou tautala atu; ioe, ua Ou valaaulia o ia e ta’u atu, ua Ou aumai o ia, ma o le a fai e ia lona ala ia manuia.

16 Ia outou o mai faalatalata mai ia te a’u; Ou te lei tautala atu faalilolilo; mai lava i le amataga, mai le taimi sa ta’u atu ai lenei mea sa Ou tautala atu ai; ma o le Alii le Atua, ma lona Agaga, na auina mai a’u.

17 Ma ua faapea ona fetalai mai o le Alii, lou Togiola, le Paia e Toatasi o Isaraelu; ua Ou auina atu o ia, le Alii lou Atua o lē na te aoao ia te oe ia e manuia, o lē e taitai ia te oe i le ala e tatau ona e ola ai, na ia faia lava.

18 E, pe a na e faalogo mai i a’u poloaiga—manū po ua pei lou filemu o se vaitafe, ma lou amiotonu e pei o galu o le sami;

19 O lau fanau foi po ua pei o le oneone; o fanau foi a lou manava po ua pei o ona iliili; ma po ua lē vavaeesea pe soloiesea foi lona igoa mai i o’u luma.

20 Ia outou o ese atu ia mai Papelonia, ia outou sosola ese atu ia mai Kaletaia, ma faatasi ma le leo o pesega ia outou ta’u atu, ta’u atu lenei mea, ia logo atu i tuluiga o le lalolagi; ia outou fai atu: Ua togiolaina e le Alii lana auauna o Iakopo.

21 Ma sa latou lē fia feinu; sa taitaiina e ia i latou e ala atu i toafa; sa faia e ia ia tafe mai le vai i fafo mai le papa mo i latou; sa vavae foi e ia le papa ma puna mai ai le vai.

22 Ma e ui ina sa faia e ia nei mea uma, ma mea tetele atu foi, ua leai se filemu, ua fetalai mai ai le Alii, i e ua amioleaga.