1 Im bar juon alen: Ron̄jake, O kom̧ m̧weo im̧ōn Israel, kom̧ aolep ro rujeļo̧k im kar kokakļo̧k kom̧ kōn nana eo an rilale jar ro an armej ro Aō; aaet, kom̧ aolep ro kar rujeļo̧k, ro rej ejjeplōklōk ijoko rettoļo̧k, ro rej m̧ōttan armej ro Aō, O m̧weo im̧ōn Israel. Ron̄jake, O āne ko ilo̧meto, ron̄jake Eō, im eo̧ron̄ kom̧ armej ro ijo ettoļo̧k; Irooj eaar kūr eō jān lo̧je; jān lo̧jeen jinō Eaar kūr Eta.

2 Im Eaar kōm̧m̧an bwe lo̧n̄iiū en āinwōt juon jāje ekkan̄; im ilo aelellor in Pein Eaar ņooj eō, im kōm̧m̧an bwe in juon m̧ade ekkan̄; im ilo An nien m̧ade lippo̧ņ Eaar ņooj eō;

3 Im ba n̄an eō: Kwōj rikarejera, O Israel, eo naaj kaiboojoj Eō kake e.

4 Innām Iba, Iaar jerbal ilo waan, Iaar joļo̧k aō kajoor ilo ejjeļo̧k unin im ilo waan; m̧ool otem m̧ool aō ekajet ej ippān Irooj, im aō jerbal ippān aō Anij.

5 Im kiiō, Irooj ej ba—eo Eaar ejaake eō bwe kar ejaake eō jān lo̧je bwe in aikuj rikarejeran, n̄an bar kōro̧o̧ltok Jekab n̄an E—men̄e Israel ejjan̄in kar kuktok, mekarta Inaaj aiboojoj ilo mejān Irooj, im aō Anij naaj aō kajoor.

6 Im Ej ba: Ej juon men epidodo bwe kwōn juon karejera n̄an kotak lōn̄ļo̧k ro bwijjin Jekab, im n̄an kōjepļaak ro Iaar oņaake er ilo Israel. Inaaj leļo̧k eok bwe kwōn juon meram n̄an ro riAelōn̄ ko, bwe kwōn maron̄ Aō lo̧mo̧o̧r n̄an jem̧ļo̧k ko in laļ.

7 Āindein Irooj ej ba, Ripinmuur an Israel, riKwōjarjar eo an, n̄an e eo armej rej kūtōtōiki, n̄an e eo laļ ko rej dike, n̄an rikarejeran irooj ro: Kiin̄ ro renaaj lo im jerkak, bwidak ro barāinwōt naaj kabun̄-jar, kōnke Irooj Enaaj tiljek.

8 Āindein Irooj ej ba: Ilo iien eo ekkar Iaar ron̄jake eok, O āne ko ilo̧meto, im ilo raan in lo̧mo̧o̧r Iaar jipan̄ eok; im Inaaj oņaake eok, im lewōj n̄an eok rikarejera n̄an armej in bujen eo, n̄an kajutak laļ, n̄an kōm̧m̧an n̄an jolōt e jolōt ko rewaan;

9 Bwe kwōn maron̄ ba n̄an rikalbuuj ro: Kom̧in ilo̧k; n̄an er ro rej jutak ilo marok: Kwaļo̧k kom̧. Renaaj m̧ōn̄ā ilo iaļ ko, im meļaaj ko aer renaaj pād ilo aolep jikin ko reutiej.

10 Rej jamin kwōle ak maro, barāinwōt det ak aļ rej jamin maron̄ kakinejnej er; bwe E eo eaar tūriam̧okake ioer naaj tōl er, em̧ool iturin unin dān ko Enaaj tōl er.

11 Im Inaaj kōm̧m̧an toļ ko Aō otemjej ren juon iaļ, im iaļ ko Aō reļļap Inaaj kau.

12 Im, O m̧weo im̧ōn Israel, lo, men kein renaaj itok jān ettoļo̧k; im lo, rein jān iōn̄ im jān rilik; im rein jān āneen Sinim.

13 Kom̧in al, O lan̄ ko; im kwōn lan̄lōn̄, O laļ; bwe neen ro ilo rear renaaj jutak; im kakōm̧kōm̧ ami al, O toļ ko; bwe rej jamin bar en̄taan; bwe Irooj eaar kaenōm̧m̧an armej ro An, im naaj tūriam̧okake kōn ro riatajinemjen An.

14 A, lo, Zaion eaar ba: Irooj eaar eļļo̧k jān eō, im aō Irooj eaar meļo̧kļo̧k eō—ak Enaaj kwaļo̧k bwe Eaar jab.

15 Bwe juon kōrā emaron̄ ke meļo̧kļo̧k nejin ajri ejjab liktūt, bwe en aikuj jab wōr an tūriam̧o kōn ļaddik eo jān lo̧jeen? Aaet, remaron̄ meļo̧kļo̧k, ak Ij jamin meļo̧kļo̧k eok, O m̧weo im̧ōn Israel.

16 Lo, Iaar jeje etam̧ ioon lo̧piden pā ko peiū; im wōrwōr ko am̧ rej im̧aō iien otemjeļo̧k.

17 Ro nejūm̧ renaaj jidimkij ņae ro riko̧kkure; im ro raar kajeepepļo̧k eok naaj ilo̧k jān eok.

18 Kotak im to̧o̧rto to̧o̧rtak mejam̧ im lale; aolep rein rej kuktok ippān doon, im renaaj itok n̄an ippam̧. Im āinwōt Aō mour, Irooj ej ba, kwōnaaj kanooj ņa ballim ippāer aolep, āinwōt juon kainōknōk, im lukwōj er em̧ool āinwōt juon jiron̄ pālele.

19 Bwe kwōpej im jikin ro relo̧urō am̧, im āneen ko̧kkure ko am, em̧ool naaj kiiō dik n̄an ļōmņak ko an armej ro ie; im ro raar wōran̄ļo̧k eok naaj ettoļo̧k.

20 Ajri ro naaj nejūm̧, ālikin kwaar jokwōd jān ro m̧okta, naaj bar ba ilo lo̧jiln̄ūm̧: Jikin eo e aidik n̄an eō; letok juon jikin bwe in maron̄ jokwe.

21 Innām kwōnaaj ba ilo būruōm̧: Wōn eaar keotak rein n̄an eō, bwe ij lo iaar jokwōd jān ro nejū, im n̄a iatajinemjen, juon rikōm̧akoko, im juon eo kōm̧akūto-kōm̧akūtak? Im wōn eaar kōkaajririk rein? Lo, iaar make iaō; rein, raar pād ia?

22 Āindein Irooj Anij ej ba: Lo, Inaaj kotake peiū n̄an ro riAelōn̄ ko, im kaalikkar Aō flag n̄an armej ro; im renaaj bōktok m̧aan ro nejūm̧ ilo peier, im kōrā ro nejūm̧ naaj ineek er ioon aeraer.

23 Im kiin̄ ro renaaj ro rikōkaajriri jemāer, im lerooj ro aer renaaj ro rikaninnin jineer; im renaaj badikdik n̄an eok kōn turin mejaer n̄an laļ, im dam̧wijļo̧k būn̄aln̄al eo jān neem; im kwōnaaj jeļā bwe N̄aij Irooj; bwe rej jamin jook ro rej kōttar Eō.

24 Bwe naaj ke bōk mennin jibwe eo jān eo ekajoor, ak kōtļo̧k ro rijipo̧kwe ilo kien?

25 A āindein Irooj ej ba, em̧ool ro rijipo̧kwe an eo ekajoor naaj bōk er, im mennin jibwe naaj kōtļo̧k; bwe Inaaj jum̧ae e eo ej jum̧ae eok, im Inaaj lo̧mo̧o̧ren ro nejūm̧.

26 Im Inaaj naajdik er ro rej kam̧akokoik eok kōn kanniōkier make; renaaj idaak bōtōktōkier make āinwōt n̄e eaar wain etōn̄al; im aolep kanniōk naaj jeļā bwe n̄a, Irooj, Ij am̧ Rilo̧mo̧o̧r im am̧ Ripinmuur, Eo Ekajoor Bōtata an Jekab.