Israel
Irooj ar leļo̧k āt in Israel n̄an Jekab, ļeo nejin Aisak im jibwin Ebream ilo Kallim̧ur Em̧or (Jen. 32:28; 35:10). Āt in Israel emaron̄ ekkōnono kōn Jekab make, ro bwijjin, ak aelōn̄ eo kar an ro bwijjin ilo iien ko an Kallim̧ur Em̧or (2 Sam. 1:24; 23:3). Ālikin an Moses kar tōlļo̧k ro nejin Israel jān kōm̧akoko an riIjipt (Ex. 3–14), kar pepe ioer jān riekajet ro elōn̄ļo̧k jān jilubukwi iiō. Ijjino ippān Kiin̄ Saul, kiin̄ ro rekar pepe ioon juon wōt Israel m̧ae mej eo an Solomon, ke jon̄oul bwij ko rekar jepelļo̧k jān Rihoboam n̄an kajutake juon laļ emakeļo̧k. Ālikin an aelōn̄ in Israel kar ajej, bwij ko ituiōn̄, āinwōt m̧ōttan eo eļapļo̧k, rekar dāpij wōt āt in Israel, ak aelōn̄ eo iturōk kar ņa etan Juda. Āneen Kenean bar etan in Israel rainin. Ilo bar juon wāween, Israel meļeļein juon ritōmak em̧ool ilo Kraist (Rom 10:1; 11:7; Gal. 6:16; Epe. 2:12).
Bwij ko jon̄oulruo an Israel
Jekab ļeo jibwin Ebream, eo etan ar oktak n̄an Israel, ekar wōr jon̄oulruo nejin em̧m̧aan. Ro bwijjier rekar erom bwij ko jon̄oulruo an Israel ak ro nejin Israel. Er kein bwij ko jon̄oulruo: Ruben, Simeon, Livai, Juda, Issakar, im Zebulun (ļōm̧aro nejin Jekab im Lia); Dan im Naptalai (ļōm̧aro nejin Jekab im Bila); Gad im Asher (ļōm̧aro nejin Jekab im Zilpa); Josep im Benjamin (ļōm̧aro nejin Jekab im Rejel) (Jen. 29:32–30:24; 35:16–18).
Jekab eaar leļo̧k n̄an kajjojo ritōl an bwij kein juon kōjeraam̧m̧an m̧okta jān an mej (Jen. 49:1–28). N̄an meļeļe ko reļļapļo̧k, lale etan kajjojo ian ļōm̧aro nejin Jekab.
Ruben, m̧aanjien em̧m̧aan nejin Jekab ippān kōrā eo m̧oktata pāleen, Lia, eaar m̧wijkōk jān kōjeraam̧m̧an in m̧aanje eo an im ruo alen kōj eo an kōn wōt ļōn̄ (Jen. 49:3–4). Jim̧we in m̧aanje eo eaar ilo̧k n̄an Josep, eo ekar m̧aanjien em̧m̧aan nejin Jekab ippān kōrā eo pāleen kein karuo, Rejel (1 Kron. 5:1–2). Livai, eo bwij eo an Irooj ar kāālete n̄an jerbal āinwōt rijerbal in priesthood ro An, ekar jab bōk juon jolōt kōnke kūr in ejenolo̧k an n̄an jerbal ilubwiljin aolep bwij ko. Men in ekar kōm̧m̧an bwe kōj eo ruo alen an Josep en ajej n̄an ļōm̧aro nejin, Ipreim im Menassa (1 Kron. 5:1; Jer. 31:9), ro kar bwine er jān doon bwij ko an Israel (JS—Ukok, Jen. 48:5–6 [Appendix]).
Ro uwaan bwij eo an Juda ren kar ritōl m̧ae iien Messaia ekar itok (Jen. 49:10; JS—Ukok, Jen. 50:24 [Appendix]). Ilo raan ko āliktata bwij eo an Ipreim enaaj an utiej eo n̄an bōkļo̧k ennaan eo kōn Jepļaaktok eo an gospel eo n̄an laļ im ainitok Israel eo kar kajjeplōklōke (Dut. 33:13–17). Iien eo enaaj itok n̄e kōn gospel eo an Jisōs Kraist, Ipreim enaaj wōr kuņaan āinwōt juon ritōl ilo kobaik aolep bwij ko an Israel (Ais. 11:12–13; K&B 133:26–34).
Ejjeplōklōk eo an Israel
Irooj ar kajjeplōklōke im kaen̄tanaane bwij ko jon̄oulruo an Israel kōnke jab wānōk im jum̧ae eo aer. Ijoke, Irooj eaar barāinwōt kōjerbale kajjeplōklōk in an armej rein An kāālet ilubwiljin aelōn̄ ko an laļ in n̄an kōjeraam̧m̧ane aelōn̄ kein.
Kuktok in Israel
M̧weo im̧ōn Israel naaj ainitok ippān doon ilo raan ko āliktata m̧okta jen itok eo an Kraist (Tōmak 1:10). Irooj ej ainitok armej ro An Israel n̄e rej bōk E im kōjparok kien ko An.
Bwij ko an Israel jon̄oul rōjebwābwe
Bwij ko jon̄oul rej ejaak jān aelōn̄ in Israel ituiōn̄ im rekar bōkļo̧k er ilo ineen kōm̧akoko n̄an Assiria ilo 721 M.K. Ilo iien eo rekar etal n̄an “laļ ko ituiōn̄” im kar jebwābwe n̄an jeļā eo an ro jet. Ilo raan ko āliktata renaaj ro̧o̧ltok.