Debwāāl
Āinwōt kōjerbale ilo jeje ko rekwōjarjar, naan in debwāāl ewōr ruo meļeļein: (1) men eo kōm̧m̧an jān aļaļ eo me Jisōs Kraist eaar debwāāl (Mark 15:20–26), im (2) juon wāween an riRom m̧anm̧an, ekkā ilo iien ko an Kallim̧ur Ekāāl, eo me rej m̧ane armej eo jān lukwōje ak dilaiki pā ko pein im neen n̄an juon debwāāl.
Men eo kōm̧m̧an jān aļaļ
Elōn̄ ilo laļ in kiiō rej ļōmņak kake āinwōt juon kakōļļeen Debwāāl eo an Kraist im pinmuur eo An; ijoke, Irooj eaar kajutaki make kakōļļe ko An kōn Debwāāl im katok eo an—pilawā im dān in kwōjkwōj eo (Matu 26:26–28; K&B 20:40, 75–79). Ilo jeje ko rekwōjarjar, ro rej kotak debwāāl ko aer rej ro rej iakwe Jisōs Kraist jon̄an rej kaarmejjete nana eo aer make im jurjurmelea otemjej an laļ im kōjparok kien ko An (JS—Ukok, Matu 16:25–26 [Appendix]).
Juon wāween an riRom m̧anm̧an
Ekkā kar kōm̧m̧ane n̄an wōt rikōm̧akoko ro im rinana ro rettātata. Debwāāl ekar ekkā an ļoore den̄den̄ ak den̄ļo̧ke (Mark 15:15). Armej eo debwāāle ekar ekkā kōm̧m̧an bwe en ineeke debwāāl eo an make n̄an jikin eo rej itōn m̧ane ie (Jon 19:16–17). Nuknuk ko an ekkar an ritariņae ro rej kōm̧m̧ane kaje eo bōki (Matu 27:35). Debwāāl eo kar katōke ilo bwidej bwe neen armej ro rej juon ak ruo ne wōt jān ioon laļ. Debwāāl eo kar lale jān ritariņae ro m̧ae an armej ioon debwāāl eo mej, eo jet iien ekar bōk jilu raan (Jon 19:31–37).
Jisōs Kraist kar debwāāle kōnke juon jarin ro rejjab tōmak rekar riab ilo aer ņa ruōn kōn kabun̄pata ņae Sizar im blaspim kōnke E eaar ba E nejin Anij. Juon liboror e būrōrō (Jon 19:2), juon kālōklōk pirōke, im kajjirere ko jet kar liļo̧k n̄an Jisōs (Matu 26:67; Mark 14:65).