Lōta eo n̄an RiHibru

Juon bok ilo Kallim̧ur Ekāāl. Paul ar je lōta in n̄an riJu ro uwaan Kabun̄ eo n̄an karreel burueer bwe m̧ōttan ko reaorōk ilo kien Moses rekar kūrm̧ool ilo Kraist im bwe kien gospel eo eutiejļo̧k an Kraist em̧ōj an kar bōk ijo jikin. Ke Paul ar ro̧o̧lļo̧k n̄an Jerusalem ilo jem̧ļo̧k ļo̧k in mijen eo an kein kajilu (iturinļo̧k Ā.K. 60), eaar lo bwe elōn̄ riJu ro uwaan Kabun̄ eo rekar pād wōt ilo an ke burueer n̄an kien Moses (Jerb. 21:20). Men in ekar jon̄oul iiō diktata ālikin juon kwelo̧k an Kabun̄ eo ilo Jerusalem im kōm̧m̧ane jem̧ļo̧k eo bwe jet kain̄i ko ilo kien Moses rekar jab aikuji n̄an lo̧mo̧o̧r eo an ro riAelōn̄ ko rej riKristian. Ealikkar, ejjab to ālikin Paul eaar jeje n̄an riHibru n̄an kwaļo̧k n̄an er jān jeje ko rekwōjarjar aer make im jān koļmānļo̧kijeņ etke rej jab aikuj ļo̧k wōt mour ekkar n̄an kien Moses.

Jebta 1 im 2 rej kōmmeļeļe bwe Jisōs eļapļo̧k jān enjeļ raņ. Jebta 3–7 rej keidi Jisōs n̄an Moses im n̄an kien Moses im kam̧ool bwe E eļapļo̧k jān er jim̧or. Rej barāinwōt katakin bwe Melkizedek Priesthood eo eļapļo̧k jān priesthood eo an Aron. Jebta 8–9 rej kōmmeļeļeiki ewi wāween an kain̄i ko ium̧win kien Moses kar kōpooj armej ro n̄an ministry eo an Kraist im ewi wāween an Kraist rijojomar eo an bujen eo ekāāl (Alma 37:38–45; K&B 84:21–24). Jebta 10 ej juon naan in kōketak n̄an tiljek im niknik. Jebta 11 ej juon ennaan kōn tōmak. Jebta 12 ej litok naan in kapilōk im iakiakwe. Jebta 13 ej tipdiki utiej in m̧are im aorōkin pokake.