Exodus

Juon bok jeje jān Moses ilo Kallim̧ur Em̧or ej kōmmeļeļeik diwōjļo̧k eo an riIsrael ro jān Ijipt. Tu m̧aanin bwebwenatoin Israel āinwōt ļo̧o̧ke ilo Exodus emaron̄ ajej ilo jilu m̧ōttan: (1) an armej ro pād ilo ineen kōm̧akoko n̄an Ijipt, (2) diwōjļo̧k eo jān Ijipt ium̧win tōl eo an Moses, im (3) aer laļn̄ijn̄ij n̄an jerbal eo an Anij ilo mour in kabun̄ im mour in kien eo aer.

M̧ōttan eo kein kajuon, jebta 1:1–15:21, ej kōmmeļeļeik kebiōp eo an Israel ilo Ijipt; tu m̧aanin bwebwenato in im kūr eo an Moses; Diwōjļo̧k eo im jutak in Kwojkwōj in Kijoone; im etetal eo ļo̧k n̄an Lom̧aļo Ekilmir, ko̧kkure eo an jarin tariņae eo an Pero, im al in anjo̧ eo an Moses.

M̧ōttan eo kein karuo, jebta 15:22–18:27, ej kōnono kōn lo̧mo̧o̧ren eo an Israel im men ko reļļap ilo ito-itak eo aer jān Lom̧aļo Ekilmir n̄an Sainai; dān ko remeo̧ in Mera, letok in bao quail im manna, kōjparok raan in Jabōt, mennin letok kabwilōn̄lōn̄ in dān in Repidim, im kōpata eo ippān riAmalekai ro ijo; im tōpraktok eo an Jetro ilo kamp eo im naan in kapilōk eo an kōn wāween oņaake armej ro ium̧win kien.

M̧ōttan eo kein kajilu, jebta 19–40, ej kōnono kōn an Israel kar wūjlepļo̧k er n̄an jerbal eo an Anij ilo iien ko rekwōjarjar ilo Sainai. Irooj ej kōjenolo̧k armej ro āinwōt juon aelōn̄ in pris ro im juon laļ ekwōjarjar; Eaar liļo̧k Kien Ko Jon̄oul; im Eaar leļo̧k naan in tōl ko kōn em̧ nuknuk eo, men ko kobban, im kabun̄-jar ilowaan. Innām ālikin men kien bwebwenato eo kōn jero̧wiwi eo an armej ro ilo kabun̄-jar n̄an kunen kau gold eo, im āliktata bwebwenato eo kōn ekkal eo an em̧ nuknuk eo im pojak ko n̄an jerbal ko an.