Smith, Josep, Jr.

Rikanaan eo kar kāālete n̄an kōjepļaaktok Kabun̄ eo an Jisōs Kraist em̧ool n̄an laļ in. Josep Smith ar ļotak ilo bukwōn in Vermont ilo United States in Amedka im ekar mour jān 1805 n̄an 1844.

Ilo 1820 eo, Anij Jemān im Jisōs Kraist raar waļo̧kļo̧k n̄an Josep, im eaar jeļā bwe ejjeļo̧k juon iaan kabun̄ ko ioon laļ ekar m̧ool (JS—B 1:1–20). Kar loļo̧k e tokālik jān enjeļ Moronai, eo ekar kwaļo̧k ijo kar ņooji pileij gold ko me ie ekar wōr ļo̧o̧k in armej ro etto ioon aelōn̄ in Amedka kaņ (JS—B 1:29–54).

Josep ar ukōti pileij gold ko im ilo 1830 eaar kajeededi āinwōt Bok in Mormon (JS—B 1:66–67, 75). Ilo 1829 eo, eaar bōk maron̄ in priesthood eo jān Jon Peptaij im jān Piter, Jemes, im Jon (K&B 13; 27:12; 128:20; JS—B 1:68–70).

Āinwōt kar tōl jān Anij, ilo Eprōļ 6, 1830 eo, Josep im elōn̄ bar jet rekar kajutake Kabun̄ eo an Jisōs Kraist kar kōjepļaaktok (K&B 20:1–4). Ium̧win tōl eo an Josep, Kabun̄ in ekar eddekļo̧k ilo Canada, England, im m̧ōttan ko irear in United States, eļaptata ilo Ohio, Missouri, im Illinois. Matōrtōr eļap ekar ļoore Josep im Ro Rekwōjarjar ijoko jabdewōt rekar jokwe ie. Ilo Juun 27, 1844, Josep im ļeo jatin Hyrum rekar m̧ane er kōn tōmak eo aer ilo Carthage, Illinois, ilo United States ilo Amedka.

Kōnke jeļā eo An kōn jorrāān ko rej itok, Irooj ar kūr karejeran Josep Smith, K&B 1:17 (K&B 19:13).
Josep Smith ekar ekkapit juon Rijjilōk an Jisōs Kraist im elder eo m̧oktata an Kabun̄ in, K&B 20:2.
Josep ekar ekkapit n̄an jerbal eo an rijjilōk jān Piter, Jemes, im Jon, K&B 27:12.
Josep im Sidney Rigdon raar kam̧ool bwe raar lo Nejin Emake Keotak in Jemān, K&B 76:23.
Ippān Oliver Cowdery, Josep Smith ar lo Irooj ilo visōn, K&B 110:1–4.
Irooj ar kūr Josep āinwōt elder eo ej tōl, riukok, rikkwaļo̧k revelesōn, rilolo, im rikanaan, K&B 124:125.
Josep Smith eaar kōm̧m̧an eļapļo̧k n̄an lo̧mo̧o̧r eo an armej jān jabdewōt armej, ijello̧kun wōt Jisōs, K&B 135:3.

Jeje ko rekwōjarjar būkm̧aantak in Rikanaan Josep Smith

Josep ar ukōte m̧ōttan ko jān pileij gold ko im kar liļo̧k n̄an e jān enjeļ Moronai, ukok eo im ekar ajeeded ilo bok ilo 1830 eo āinwōt Bok in Mormon. Ekar barāinwōt bōk elōn̄ revelesōn ko jān Irooj im rej kōllaajraki pedped in katak ko im karkan Kabun̄ in. Elōn̄ iaan revelesōn kein em̧ōj kobaiki ippān doon ilo bok eo jej jeļā kake rainin ej Katak im Bujen Ko. E ekar barāinwōt eddo kōn bōk m̧aantak Bōōr eo Eļap Wōņāān, eo ie ewōr ukok ko rekabab-laļ an jet iaan jeje ko an Moses, Ebream, im Matu, meļeļe ko bōki jān bwebwenatoin mour eo im naan in kam̧ool eo an, im ennaan ko jon̄ouljilu kōn katak im tōmak eo an Kabun̄ in.