Piter

Ilo Kallim̧ur Ekāāl, Piter kar etan m̧okta ekar Simeon ak Saimōn (2 Pit. 1:1), juon rieo̧n̄ōd jān Betseida ej jokwe ilo Kaperneum ippān lio pāleen. Jisōs ar kōmour kōrā eo jinen lio pāleen Piter (Mark 1:29–31). Piter kar kūri ippān ļeo jatin Andru bwe ren rikaļooran Jisōs Kraist (Matu 4:18–22; Mark 1:16–18; Luk 5:1–11). Etan ilo kajin Aramaic, Sipas, meļeļein “rilolo eo” ak “dekā,” kar leļo̧k n̄an e jān Irooj (Jon 1:40–42; JS—Ukok, Jon 1:42 [Appendix]). Men̄e Kallim̧ur Ekāāl ej ekkōnono kōn jet ian m̧ōjņo̧ ko an Piter ilo kanniōk, ej barāinwōt kaalikkar ke eaar anjo̧ ioer im kar kajoorļo̧k jān tōmak eo an ilo Jisōs Kraist.

Piter eaar kwaļo̧k būruōn ke Jisōs ekar RiKraist im eo Nejin Anij (Jon 6:68–69), im Irooj ar kāālet e n̄an kabwijer ki ko an aelōn̄ eo ioon laļ (Matu 16:13–19). Ioon Toļ in Kōjakkōlkōl Eo, Piter eaar lo Rilo̧mo̧o̧r eoktak mōran, im barāinwōt Moses im Elias (Ilaija) (Matu 17:1–9).

Piter ekar Rijjilōk eo eutiejtata ilo raan ko an. Ālikin Mej, Jerkakpeje, im Weaaklōn̄ļo̧k eo an Rilo̧mo̧o̧r, eaar kūrtok Kabun̄ eo ippān doon im tōl wāween kūr juon Rijjilōk n̄an bōk jikin Judas Iskariōt (Jerb. 1:15–26). Piter im Jon raar kōmouri juon em̧m̧aan eo ekar akā jān ke eaar ļotak (Jerb. 3:1–16) im kar kōtļo̧k er jān kalbuuj ilo juon wāween ekabwilōn̄lōn̄ (Jerb. 5:11–29; 12:1–19). Ekar kōn ministry eo an Piter gospel eo ekar m̧oktata peļļo̧k n̄an ro riAelōn̄ ko (Jerb. 10–11). Ilo raan ko āliktata, Piter ippān Jemes im Jon, ekar itok jān lan̄ im likūt Melkizedek Priesthood eo im ki ko an ioon Josep Smith im Oliver Cowdery (K&B 27:12–13; 128:20).

Lōta eo kein kajuon an Piter

Lōta eo kein kajuon ekar jeje jān “Babilon” (bōlen Rom) im kar jilkinļo̧k n̄an Ro Rekwōjarjar ilo ijo kiiō jeļā kake bwe ej Esia Minor ejjab to ālikin wōt an Nero jino m̧anm̧an riKristian.

Jebta 1 ej ekkōnono kōn an kar dedeļo̧k kapit Kraist āinwōt juon Rilo̧mo̧o̧r. Jebta 2–3 rej kōmmeļeļe bwe Kraist ej dekā in jabōn em̧ eo an Kabun̄ eo, bwe Ro Rekwōjarjar rej kabwijer priesthood rajimjim, im bwe Kraist eaar kwaļo̧k n̄an jetōb ro ilo kalbuuj. Jebta 4–5 rej kōmmeļeļe etke gospel eo ej kwaļo̧k n̄an ro remej im etke elder ro reaikuj naajdik sip ko.

Lōta eo kein karuo an Piter

Jebta 1 ej kōketak Ro Rekwōjarjar n̄an kōm̧m̧an bwe kūr ko im kāālet ko aer ren dim. Jebta 2 ej kakkōl ņae rikaki ro reriab. Jebta 3 ej ekkōnono kōn raan ko āliktata im Itok eo Kein Karuo an Kraist.