Jerkakpeje

Koba in ānbwinnin jetōb ippān ānbwinnin kanniōk im di ālikin mej. Ālikin jerkakpeje, jetōb im kanniōk rej jamin bar jepel, im armej eo enaaj erom jab wabanban. Armej otemjej ej ļotak ioon laļ enaaj jerkakpeje kōnke Jisōs Kraist ar anjo̧ jān mej (1 Kor. 15:20–22).

Jisōs Kraist ekar armej eo m̧oktata ar jerkakpeje ioon laļ in (Jerb. 26:23; Kol. 1:18; Rev. 1:5). Kallim̧ur Ekāāl ej letok ebwe kein kam̧ool bwe Jisōs eaar jerkak kōn ānbwinnin kanniōk eo An: lōb eo An ekar ejjeļo̧k kobban, Eaar m̧ōn̄ā ek im hōnni, Anbwin eo An eaar juon ānbwinnin kanniōk im di, armej raar un̄ūr E, im enjeļ ro raar ba bwe E ekar jerkak (Mark 16:1–6; Luk 24:1–12, 36–43; Jon 20:1–18). Revelesōn ko ilo raan ko āliktata rej kapenļo̧k m̧ool in Jerkakpeje eo an Kraist im eo an aolep armej (Alma 11:40–45; 40; 3 Ni. 11:1–17; K&B 76; Moses 7:62).

Aolep armej reban jerkakpeje n̄an juon wōt aiboojoj (1 Kor. 15:39–42; K&B 76:89–98), im rej jamin jerkakpeje ilo juon wōt iien (1 Kor. 15:22–23; Alma 40:8; K&B 76:64–65, 85; 88:96–102). Elōn̄ Ro Rekwōjarjar raar jerkak ālikin Jerkakpeje eo an Kraist (Matu 27:52). Ro rewānōk renaaj jerkak m̧okta jān ro renana im naaj jerkaktok ilo Jerkakpeje eo M̧oktata (1 Tes. 4:16); rijero̧wiwi ro rej jan̄in ukeļo̧k renaaj jerkaktok ilo jerkakpeje eo āliktata (Rev. 20:5–13; K&B 76:85).

Lōb ko raar peļļo̧k, im elōn̄ ānbwin ko raar jerkak, Matu 27:52–53 (3 Ni. 23:9).
Irooj eaar jerkak, Luk 24:34.
Juon jetōb ejjeļo̧k kanniōk im diin, āinwōt kom̧ij lo Ippa, Luk 24:39.
N̄aij jerkakpeje eo im mour eo, Jon 11:25.
Rijjilōk Ro Jon̄oulruo raar katakin bwe Jisōs eaar jerkak, Jerb. 1:21–22 (Jerb. 2:32; 3:15; 4:33).
Ilo Kraist aolep renaaj mour, 1 Kor. 15:1–22.
Ro raar mej ilo Kraist renaaj jerkak m̧oktata, 1 Tes. 4:16.
E m̧ōņōņō im ekwōjarjar ej e eo ewōr an ilo jerkakpeje eo m̧okta, Rev. 20:6.

Kraist ar likūt mour eo An im bar bōk e bwe E en maron̄ kakūrm̧ool jerkakpeje an ro remej, 2 Ni. 2:8 (Mosa. 13:35; 15:20; Alma 33:22; 40:3; Hil. 14:15).
N̄e ar ejjeļo̧k jerkakpeje, jenaaj kar an Setan, 2 Ni. 9:6–9.
Jerkakpeje enaaj itok ioon aolep armej, 2 Ni. 9:22.
Abinadai eaar katakin kōn jerkakpeje eo m̧okta, Mosa. 15:21–26.
Ro renana renaaj pād wōt āinwōt n̄e ekar ejjeļo̧k lo̧mo̧o̧r, ijello̧kun wōt n̄an kōtļo̧k tomede ko an mej, Alma 11:41–45.
Alma ar kōmmeļeļeiki jekjek in jetōb ko ikōtaan mej im jerkakpeje, Alma 40:6, 11–24.

Ilo itok eo an Irooj, ro remej im rekar mej ilo Kraist renaaj jerkaktok, K&B 29:13 (K&B 45:45–46; 88:97–98; 133:56).
Jan̄ eļaptata kōn ro ejjeļo̧k aer kōjatdikdik kōn juon jerkakpeje eaiboojoj, K&B 42:45.
Er ro rekar jeļā ejjeļo̧k kien enaaj wōr aer ilo jerkakpeje eo m̧oktata, K&B 45:54.
Renaaj jerkak jān ro remej im naaj ban mej ālikin, K&B 63:49.
Jerkakpeje jān ro remej ej lo̧mo̧o̧r eo an armej, K&B 88:14–16.
Jetōb im irinekkatak, rej jamin jepel, rej bōk juon lan̄lōn̄ edipiio, K&B 93:33.
Enjeļ ro rej ro em̧ōj aer jerkak ewōr ānbwinnier kanniōk im di, K&B 129:1.
Jabdewōt jeļāļo̧kjeņ jej bōk ilo mour in ej jerkak ipped ilo jerkakpeje eo, K&B 130:18–19.