Baibōļ

Juon ae in jeje ko an riHibru im riKristian ko ewōr ie revelesōn ko jān lan̄. Naan in Baibōļ meļeļein “bok ko.” Baibōļ eo ej jerbal an elōn̄ rikanaan ro im rijeje ro kar kabab-laļe er ium̧win jelōt eo an Jetōb Kwōjarjar (2 Pit. 1:21).

Baibōļ eo an riKristian ewōr ruo ajej ko ie, ekkā jeļā kaki bwe rej Kallim̧ur Em̧or im Kallim̧ur Ekāāl. Kallim̧ur Em̧or ewōr ie bok in jeje ko rekwōjarjar kar kōjerbali ilubwiljin riJu ro ilo Palestine ilo iien ministry eo an Irooj. Kallim̧ur Ekāāl ewōr ie jeje ko an Rijjilōk ro im kar watōke bwe jon̄an ekwōjarjar im maron̄ eo ie āinwōt jeje ko rekwōjarjar an riJu ro. Bok ko ilo Kallim̧ur Em̧or kar ainitok jān jeje ko an juon laļ eo jetn̄akin eaar bōk elōn̄ epepen ko im enan̄in aolepān ekar jeje ilo kajin Hibru, ak bok ko ilo Kallim̧ur Ekāāl rej jeje ko an juon wōt epepen im kar jeje enan̄in ilo wōt kajin Grik.

Ilo Kallim̧ur Em̧or naan in “testament” (kallim̧ur) ej bōk jikin juon naan ilo kajin Hibru meļeļein “bujen.” Bujen eo Em̧or ej kien eo kar leļo̧k n̄an Moses ke Israel ar jab bōk tarlep in gospel eo ekar pād ippān armej ro doon Anij jān jinoin mour in. Bujen eo Ekāāl ej gospel eo āinwōt an Kraist kar katakin.

Ilo Baibōļ in Hibru eo (Kallim̧ur Em̧or) bok ko rekar ajej ilo jilu m̧wian̄ōn ko: Kien eo, Rikanaan Ro, im Jeje Ko. Baibōļ eo kōjerbale jān riKristian ej kōllaajraki bok ko ekkar n̄an mennin kōnono ko, āinwōt bwebwenato, jabōn kōnnaan, im kanaan ko.

Bok ko ilo Kallim̧ur Ekāāl ekkā aer waļo̧k ilo ellaajrak in: Gospel ko emān im Jerbal; lōta ko an Paul; im lōta ko an Jemes, Piter, Jon, im Jud; im Revelesōn eo an Jon.

Kabun̄ eo an Jisōs Kraist im Armej ro Rekwōjarjar ilo Raan ko Āliktata ej kaorōk im kautieje Baibōļ eo im barāinwōt kapenļo̧k ke Irooj ej wōnm̧aanļo̧k wōt im letok bar jet revelesōn kōn rikanaan ro An ilo raan kein āliktata ko rej rie im kam̧ool e bwebwenato eo ilo Baibōļ kōn m̧akūtkūt ko an Anij ippān armej.