Kallim̧ur Em̧or

Jeje ko an rikanaan ro etto ro rekar m̧akūtkūt ium̧win jelōt eo an Jetōb Kwōjarjar im ro ium̧win elōn̄ epepen ko rekar kam̧ool kōn Kraist im ministry eo An ilo raan ko rej itok wōt. Ie ebarāinwōt wōr juon ļo̧o̧k in bwebwenatoin Ebream im ro bwijjin, ijjino ippān Ebream, im bujen eo, ak kallim̧ur, eo Irooj ar kōm̧m̧ane ippān Ebream im ro bwijjin.

Bok ko ļalem m̧oktata ilo Kallim̧ur Em̧or rekar jeje jān Moses. Bok kein rej Jenesis, Exodus, Livitikōs, Bōnbōn, im Duteronomi. Jenesis ej ekkōnono kōn jinoin laļ in, armej, kajin ko, bwij ko, im jinoin m̧weo im̧ōn Israel.

Bok in bwebwenato ko rej ekkōnono kōn men ko reļļap ilo Israel. Bok kein rej Joshua, Riekajet Ro, Rut, 1 im 2 Samuel, 1 im 2 Kiin̄ Ro, 1 im 2 Kronikel, Ezra, Nihimaia, im Ester.

Bok in jabōn kōnnaan ko rej ļo̧o̧ke jet ian mālōtlōt im wāween jeje ko an rikanaan ro. Rej Job, Sam Ko, Jabōn Kōnnaan Ko, Ekklisiastis, Al Eo An Solomon, im Liaajlo̧ļ.

Rikanaan ro rekar kakkōl Israel kōn jero̧wiwi ko an im kam̧ool kōn kōjeraam̧m̧an ko rej itok jān pokake. Rekar kanaan kōn itok eo an Kraist, eo enaaj kar pinmuur kōn jero̧wiwi ko an ro rej ukeļo̧k, bōki kain̄i ko, im mour ekkar n̄an gospel eo. Bok ko an rikanaan ro rej Aiseia, Jeremaia, Ezekiel, Daniel, Hoseia, Joel, Amos, Obadaia, Jona, Maika, Nahum, Habakkuk, Zepanaia, Haggeai, Zekaraia, im Malakai.

Enan̄in aolep bok ko ilo Kallim̧ur Em̧or rekar jeje ilo kajin Hibru. Jet jeje ewōr ie kajin Aramaic, juon kajin epaakļo̧k.