Mormon, Rikanaan in riNipai
Juon rikanaan in riNipai ro, kapen in jarin tariņae, im rikōjparok ļo̧o̧k ilo Bok in Mormon. Mormon eaar mour enan̄in Ā.K. 311–385 (Morm. 1:2, 6; 6:5–6; 8:2–3). Eaar juon ritōl ilo tariņae enan̄in aolepān mour eo an, jino jān jon̄oulļalem iiō dettan (Morm. 2:1–2; 3:8–12; 5:1; 8:2–3). Ammaron ar ba n̄an Mormon n̄an kōpooje e make n̄an bōk eddo in ļo̧o̧k ko im lali ļo̧o̧k ko (Morm. 1:2–5; 2:17–18). Ālikin kanne bwebwenato in tōrean mour eo an, Mormon ar kōm̧m̧an kakkobaba ikōtaan pileij ko reļļap an Nipai tok ioon pileij ko an Mormon. Eaar tokālik jakeļo̧k ļo̧o̧k in ekwōjarjar n̄an ļeo nejin Moronai. Pileij kein rekar m̧ōttan ļo̧o̧k eo me jān e Josep Smith ar ukōte Bok in Mormon.
Naan ko an Mormon
Juon bok edik ilo Bok in Mormon. Ikōtaan naan ko āliktata an Amalekai ilo bok in Omnai im naan ko m̧oktata ilo bok in Mosaia, Mormon, rilale eo an aolep ļo̧o̧k ko, ekar kōm̧m̧ane ennaan in kakkobaba edik. (Lale “Juon Kōmmeļeļe Ekadu kōn Bok in Mormon” itum̧aan in Bok in Mormon.)
Bok eo an Mormon
Juon bok ejenolo̧k ilowaan bok in jeje ko rekwōjarjar jeļā kake bwe ej Bok in Mormon. Jebta 1–2 rej kōnono kōn Ammaron, juon rikanaan jān riNipai ro, ej kwaļo̧k n̄an Mormon n̄āāt im ia n̄an bōki pileij ko. Barāinwōt, tariņae ko reļļap rekar ijjino, im riNipai ro Jilu kar bōkļo̧k er kōnke nana eo an armej ro. Jebta 3–4 rej ekkōnono kōn an Mormon kūr ukeļo̧k n̄an armej ro, a rekar eļļā jān en̄jake eo, im eļapļo̧k nana ar anjo̧ jān kar m̧oktaļo̧k ilo Israel. Jebta 5–6 rej ļo̧o̧ke pata ko āliktata ikōtaan riNipai ro im riLeman ro. Kar m̧ane Mormon ippān enan̄in aolep laļ eo an riNipai. Ilo jebta 7, m̧okta jān an mej, Mormon ar kūr armej ro—ilo tōre eo im ilo ilju im jekļaj—n̄an ukeļo̧k. Jebta 8–9 rej ļo̧o̧ke bwe āliktata ļeo nejin Mormon wōt, Moronai, ekar pād. Eaar ļo̧o̧ke jekjek in mej im ibeebjauwe eo āliktata, ekobaik jem̧ļo̧kin armej in Nipai, im kar jeje juon enaaj n̄an epepen ko tokālik im rikōnono ro jān ļo̧o̧k in.