1 Xb’aan naq k’ehomaq reetal, kik’ulman naq li Qaawa’ kiraatina lin yuwa’, relik chi yaal, sa’ ajwi’ jun li matk’, ut kixye re: Osob’tesinb’ilat laa’at Lehi, xb’aan li k’a’aq re ru xab’aanu; ut xb’aan naq tiikat chi paab’ank ut xajultika chiru li tenamit a’in li k’a’aq re ru katintaqla wi’, k’e reetal naq neke’xsik’ risinkil aayu’am.

2 Ut kik’ulman naq li Qaawa’ kixtaqla lin yuwa’, sa’ ajwi’ jun matk’, naq tixk’am lix junkab’al chirix ut taaxik sa’ li yamyookil ch’och’.

3 Ut kik’ulman naq a’an ki’ab’in chiru li raatin li Qaawa’, jo’kan naq kixb’aanu jo’ xtaqlahom li Qaawa’.

4 Ut kik’ulman naq xko’o chiru li yamyookil ch’och’. Ut kixkanab’ li rochoch, ut lix ch’och’il li reechanihom, ut lix oor, ut lix plaat, ut k’a’aq re ru re li terto xtz’aq, ut maak’a’ kixk’am rik’in, ka’ajwi’ lix junkab’al, ut lix tzakemq, ut lix muheb’aal t’ikr, ut xko’o chiru yamyookil ch’och’.

5 Ut kikub’e sa’eb’ li nub’aal chixk’atq lix maril li Kaqi Palaw; ut kib’eek chiru li yamyookil ch’och’ sa’eb’ li nub’aal li wankeb’ chixk’atq li Kaqi Palaw, ut kib’eek chiru li yamyookil ch’och’ rochb’een lix junkab’al, a’aneb’ li xSariah lin na’, ut eb’ li was, a’aneb’ laj Laman, laj Lemuel, ut laj Sam.

6 Ut naq ak xb’eek oxib’ kutan chiru li yamyookil ch’och’, kik’ulman naq kixyiib’ lix muheb’aal t’ikr sa’ jun ru taq’a chixk’atq xha’il jun nima’.

7 Ut kik’ulman naq kixyiib’ jun li artal rik’in pek, ut kixb’aanu jun li mayej chiru li Qaawa’, ut kib’antioxin chiru li Qaawa’ li qaDios.

8 Ut kik’ulman naq kixk’e choq’ xk’ab’a’ li nima’, Laman, ut naxk’ul rib’ sa’ li Kaqi Palaw, ut li ru taq’a wan sa’eb’ li nub’aal chixk’atq b’ar na’ok wi’ li ha’.

9 Ut naq lin yuwa’ kiril naq lix ha’il li nima’ naxk’ul rib’ sa’ xyo’leb’aal li Kaqi Palaw, kiraatina laj Laman, ut kixye: Aay, juntaq’eetaqat taxaq rik’in li nima’ a’in, junelik raj yooqat chixk’ulb’al aawib’ rik’in lix yo’leb’aal chixjunil li tiikilal!

10 Ut kiraatina ajwi’ laj Lemuel: Aay, juntaq’eetaqat taxaq rik’in li ru taq’a a’in, kawaqat raj, xaqxooqat raj junelik, ut ink’a’ raj tat-eek’anq rik’in xpaab’ankil lix taqlahom li Qaawa’!

11 Anajwan, kixye a’in sa’ xk’ab’a’ lix jipileb’ xk’a’uxl laj Laman ut laj Lemuel; xb’aan naq k’ehomaq reetal naq ke’xwech’i rix lix yuwa’ sa’ naab’al li k’a’aq re ru, xb’aan naq a’an jun li winq aj matk’, ut xk’ameb’ chaq xb’e chi elk sa’ li ch’och’ Jerusalen, re xkanab’ankil xch’och’il li reechanihomeb’, ut lix oor, ut lix plaat, ut li k’a’aq re ru terto xtz’aq reheb’, re te’oso’q sa’ li yamyookil ch’och’. Ut a’in ke’xye naq kixb’aanu sa’ xk’ab’a’ lix majelal lix k’oxlahom lix ch’ool.

12 Ut chi jo’kan naq laj Laman ut laj Lemuel, asb’ejeb’ chik, ke’xwech’i rix lix yuwa’. Ut ke’wech’in xb’aan naq ink’a’ ke’xnaw chanru nak’anjelak li Dios li kiyo’ob’tesink chaq reheb’.

13 Chi moko neke’xpaab’ naq Jerusalen, li nimla tenamit a’an, taaruuq taasachmanq jo’ chanru li raatineb’ li profeet. Ut chanchaneb’ ajwi’ laj Judio li wankeb’ chaq Jerusalen, li ke’ajok raj risinkil xyu’am lin yuwa’.

14 Ut kik’ulman naq lin yuwa’ kiraatinaheb’ sa’ li ru taq’a Lemuel, rik’in wankilal, chi nujenaq rik’in li Musiq’ej, toj reetal naq ke’siksot lix xaqalileb’ chiru. Ut kixsacheb’ xna’leb’, jo’kan naq maak’a’eb’ xch’ool chixwech’b’al rix; jo’kan naq ke’xb’aanu jo’ k’a’ru kixtaqlaheb’ wi’.

15 Ut kiwan lin yuwa’ sa’ jun muheb’aal t’ikr.

16 Ut kik’ulman naq laa’in, aj Nefi, q’axal saajin chaq, a’ut nim chaq inxaqam, ut jo’kan ajwi’ k’a’jo’ inch’ool chixnawb’al chirix lix muqmuukil na’leb’ li Dios, jo’kan naq kin’elajin chiru li Qaawa’; ut k’ehomaq reetal naq a’an kinrula’ani, ut kixq’unob’resi li waam jo’kan naq kinpaab’ chixjunil li aatin yeeb’il chaq xb’aan lin yuwa’; jo’kan naq ink’a’ kinpo’resi inch’ool rik’in jo’ chanru eb’ li was.

17 Ut kiwaatina laj Sam, ut kink’e chixnaw li k’a’ru xk’utb’esi chaq li Qaawa’ chiwu rik’in lix Loq’laj Musiq’. Ut kik’ulman naq a’an kixpaab’ li waatin.

18 A’b’anan k’ehomaq reetal, laj Laman ut laj Lemuel ink’a’ ke’raj ab’ink chiru li waatin, ut rik’in naq ra inch’ool xb’aan xkawileb’ li raam, kin’elajin chiru li Qaawa’ sa’ xk’ab’a’eb’.

19 Ut kik’ulman naq li Qaawa’ kinraatina, ut kixye: Osob’tesinb’ilat, at Nefi, sa’ xk’ab’a’ laa paab’aal, xb’aan naq yalb’il aaq’e naq xinaasik’, rik’in xkub’enaqil aach’ool.

20 Ut a’ yaal jo’ chan ru nekepaab’ lin taqlahom, tex’usaaq, ut taak’ame’q eeb’e sa’ jun ch’och’ li yeechi’inb’il, relik chi yaal, jun ch’och’ li kinkawresi choq’ eere; relik chi yaal, jun ch’och’ li sik’b’il ru sa’ xb’een chixjunil chik li ch’och’.

21 Ut a’ yaal jo’ chan ru te’xpo’resi xch’ool laa was aawik’in, eb’ a’an te’isiiq chaq chiru li Qaawa’.

22 Ut a’ yaal jo’ chanru naq laa’at nakapaab’ lin taqlahom, tatk’ehe’q choq’ aj taqlanel ut aj tzolonel sa’ xb’eeneb’ laa was.

23 Xb’aan naq k’e reetal, sa’ li kutan naq te’xpo’resi xch’ool wik’in, laa’in tinmajewaheb’ rik’in ajwi’ jun rahil majewank, ut maak’a’aqeb’ xwankil sa’ xb’eeneb’ laa wiyajil, ka’ajwi’ wi a’aneb’ te’xpo’resi ajwi’ xch’ool wik’in.

24 Ut wi taa’uxq naq te’xpo’resi xch’ool wik’in, eb’ a’an te’wanq choq’ rapleb’ chiruheb’ laa wiyajil, re reek’asinkileb’ xch’ool sa’ lix b’ehil li jultikank.