1 Ma sa oo ina o a’u, o Nifae, ua toe foi mai le talatalagama le Alii, i le faleie o lo’u tamā.

2 Ma sa oo ina tautala mai o ia ia te a’u, fai mai: Faauta, sa ou miti se miti, na poloaiina ai a’u e le Alii, ia e foi atu ma ou uso i Ierusalema.

3 Aua faauta, o loo i ai ia Lapana talafaamaumau o tagata Iutaia ma le gafa foi o tuaa o o’u tuaa, ma ua togitogia i luga o papatusi apamemea.

4 O le mea lea, ua poloaiina ai a’u e le Alii, e tatau ia te oe ma ou uso ona o atu i le fale o Lapana, ma saili talafaamaumau, ma aumai i latou i lalo iinei i le vao.

5 Ma o lenei, faauta ua muimui ou uso, fai mai o se mea faigata ua ou faatonuina ai i laua, ae faauta ou te lei faatonuina ai i laua, ae o se poloaiga mai le Alii.

6 O lea ia e alu ai, lo’u atalii e, ma o le a alofagia oe e le Alii, ona ua e lē muimui.

7 Ma sa oo ina fai atu a’u, o Nifae, i lo’u tamā: O le a ou alu ma fai mea ua poloaiina e le Alii, aua ua ou iloa e lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou.

8 Ma sa oo ina ua faalogo mai lo’u tamā i nei upu sa fiafia tele o ia, ona sa iloa e ia ua faamanuiaina a’u e le Alii.

9 Ma o a’u, o Nifae, ma o’u uso, sa alu la matou malaga i le vao ma o matou faleie, matou te o a’e i le laueleele o Ierusalema.

10 Ma sa oo ina ua matou o a’e i le laueleele o Ierusalema, o a’u ma o’u uso, sa matou talatalanoa o le tasi i le isi.

11 Ma sa matou faia se vili—po o ai o i matou e tatau ona alu atu i totonu o le fale o Lapana. Ma sa oo ina pa’ū le vili ia Lamana; ma sa alu atu Lamana i totonu o le fale o Lapana, ma talanoa o ia ma ia a’o nofo o ia i lona fale.

12 Ma sa manaomia e ia mai ia Lapana talafaamaumau sa togitogia i luga o papatusi apamemea, sa i ai le gafa o lo’u tamā.

13 Ma faauta, sa oo ina ita Lapana, ma tuli ese o ia mai ona luma; ma sa lē manao o ia e tuu atu ia te ia talafaamaumau. O le mea lea, sa fai mai o ia ia te ia: Faauta o oe o se faomea, ma o le a ou fasioti ia te oe.

14 Peitai sa sola ese Lamana mai ona luma, ma ta’u mai ia te i matou mea na faia e Lapana. Ma sa amata ona matou faanoanoa tele, ma o o’u uso sa fai o le a toe foi atu i lo’u tamā i le vao.

15 Ae faauta sa ou fai atu ia te i latou: E pei ona soifua le Alii, ma e pei foi ona tatou ola, tatou te lē o ifo lava i lo tatou tamā i le vao seiloga ua uma ona tatou faataunuuina o le mea na poloaiina ai i tatou e le Alii.

16 O le mea lea, ia tatou faamaoni i le tausiga o poloaiga a le Alii; o lea ia tatou o ifo i le fanua o le tofi o lo tatou tamā, aua faauta ua tuua e ia o auro ma ario, ma ituaiga uma o oloa eseese. Ma o nei mea uma sa faia e ia ona o poloaiga a le Alii.

17 Ona sa iloa e ia o le a faaumatia Ierusalema, ona o le amioleaga o tagata.

18 Aua faauta, ua latou teena upu a perofeta. O le mea lea, afai e nofo lo’u tamā i le laueleele ina ua uma ona poloaiina o ia e sola ese mai le laueleele, faauta, e fano foi o ia. O le mea lea, ua tatau ai ona sola ese o ia mai le laueleele.

19 Ma faauta, o le poto o i le Atua ua tatau ai ona tatou maua o ia talafaamaumau, ia mafai ai ona tatou faasaoina mo a tatou fanau le gagana a o tatou tamā;

20 Ma ia mafai ai foi ona tatou faasaoina mo i latou upu na tulei mai fofoga o perofeta paia uma, na tuu mai ia te i latou e le Agaga ma le mana o le Atua, talu mai le amataga o le lalolagi, e oo mai lava i le taimi lenei.

21 Ma sa oo ina tusa ai ma le ituaiga o gagana sa ou faatauanauina ai o’u uso, ina ia laua faamaoni i le tausiga o poloaiga a le Atua.

22 Ma sa oo ina matou o ifo i le fanua o lo matou tofi, ma matou faaputuputu faatasi a matou auro, ma a matou ario, ma a matou mea taua.

23 Ma ina ua uma ona matou faaputuputu faatasi o ia mea, sa matou toe o a’e i luga i le fale o Lapana.

24 Ma sa oo ina matou o atu i totonu ia Lapana, ma mananao ia te ia ia tuu mai e ia ia te i matou talafaamaumau ua togitogia i luga o papatusi apamemea, ae matou avatu ia te ia a matou auro, ma a matou ario, ma a matou mea taua uma.

25 Ma sa oo ina ua vaai mai Lapana ia matou meatotino, ma sa tele lava, sa tuinanau i ai o ia, sa oo ina ia tutuli ese i matou i fafo, ma auina mai ana auauna e fasioti i matou, ina ia mafai ona ia maua o a matou meatotino.

26 Ma sa oo ina matou sosola ese mai luma o auauna a Lapana, ma sa faamalosia i matou e tuu a matou meatotino, ma pa’u’ū atu ai i lima o Lapana.

27 Ma sa oo ina matou sosola i le vao, ma sa lē maua mai i matou e auauna a Lapana, ma sa matou lalafi i le ava o se papa.

28 Ma sa oo ina ita Lamana ia te a’u, ma faapea foi i lo’u tamā; ma sa faapea foi Lemuelu, ona sa faalogo o ia i upu a Lamana. O le mea lea na fai mai ai e Lamana ma Lemuelu ’upu faatiga e tele ia te i ma’ua, o laua uso laiti, ma sa laua sasa lava foi i ma’ua i se tootoo.

29 Ma sa oo ina a o la sasaina i ma’ua i se tootoo, faauta, sa afio mai se agelu a le Alii ma tulai i o laua luma, ma sa fetalai mai o ia ia te i laua, e faapea: Aisea ua oulua sasa ai lo oulua uso laitiiti i se tootoo? Lua te lē iloa ea ua filifilia o ia e le Alii e avea ma pule ia te oulua, ma o lenei ona o a oulua amioletonu? Faauta ia outou toe o a’e i Ierusalema, ma o le a tuu atu Lapana e le Alii i o outou lima.

30 Ma ina ua uma ona fetalai mai o le agelu ia te i matou, sa afio ese atu o ia.

31 Ma ina ua mavae ona afio ese atu o le agelu, sa toe amata ona muimui o Lamana ma Lemuelu, fai mai: E mafai faapefea e le Alii ona tuu mai Lapana i o tatou lima? Faauta, o ia o se tagata malosi, ma e mafai e ia ona faatonu le toalimagafulu, ioe, e mafai e ia ona fasioti le toalimagafulu; aisea la e lē mafai ai i tatou?