1 Ma o lenei ou te manao ia outou iloa, ina ua uma ona faai’u e lo’u tamā, o Liae, le vavalo mai e uiga i ana fanau, sa oo ina toe fetalai mai le Alii ia te ia, ua faapea mai, ua lē tatau ia te ia, o Liae, ona ia ave na o lona auaiga i le vao; ae e tatau i ona atalii ona ave ni afafine e faiavā i ai, ina ia mafai ona latou fanauina ni fanau mo le Alii i le laueleele o le folafolaga.

2 Ma sa oo ina poloaiina o ia e le Alii e tatau ia te a’u, o Nifae, ma o’u uso, ona toe foi atu i le laueleele o Ierusalema ma aumai Isamaeli ma lona aiga i le vao.

3 Ma sa oo ina o a’u, o Nifae, ua toe foi atu, faatasi ma o’u uso, i le vao matou te o a’e i Ierusalema.

4 Ma sa oo ina matou o a’e i le fale o Isamaeli, ma sa talileleia i matou i luma o Isamaeli, ua fai ma mea na matou fai atu ai ia te ia afioga a le Alii.

5 Ma sa oo ina faamalūlūina e le Alii le loto o Isamaeli, ma lona auaiga foi, ua fai ma mea ua latou malaga ifo ai faatasi ma i matou i le vao i le faleie o lo matou tamā.

6 Ma sa oo ina a’o matou malaga atu i le vao, faauta o Lamana ma Lemuelu, ma afafine e toalua o Isamaeli, ma atalii e toalua o Isamaeli ma o la’ua aiga, ua fouvale ia te i matou; ioe, ia te a’u, o Nifae, ma Sama, ma lo latou tamā, o Isamaeli, ma lana avā, ma isi ona afafine e toatolu.

7 Ma sa oo o lea fouvalega, sa latou mananao ai e toe foi atu i le laueleele o Ierusalema.

8 Ma o lenei, o a’u, o Nifae, ona o lo’u faanoanoa talu ai le maaa o o latou loto, o lea na ou tautala atu ai ia te i latou, e faapea, ioe, e oo lava ia Lamana ma ia Lemuelu: Faauta, o oulua o o’u uso matutua, ma ua faapefea ona oulua maaa tele i o oulua loto, ma tauaso tele i o oulua mafaufau, ua oulua manaomia ai a’u, lo oulua uso laitiiti, ona tatau ona tautala atu ia te oulua, ioe, ma fai se faataitaiga mo oulua?

9 Pe ua faapefea ea ona oulua lē faalogo i le afioga a le Alii?

10 Pe ua faapefea ea ona galo ia te oulua sa oulua vaai i se agelu a le Alii?

11 Ioe, ma ua faapefea ea ona galo ia te oulua mea sili na faia e le Alii mo i tatou, i le laveaiina o i tatou mai lima o Lapana, ma ina ia tatou maua ai foi talafaamaumau?

12 Ioe, ma ua faapefea ona galo ia te oulua e mafai e le Alii ona fai mea uma e tusa ai ma lona finagalo, mo le fanauga a tagata, pe afai latou te faatino le faatuatua ia te ia? O le mea lea, ia tatou faamaoni ia te ia.

13 Ma afai tatou te faamaoni ia te ia, tatou te maua le laueleele o le folafolaga; ma o le a outou iloa i se taimi o i lumanai o le a faataunuuina lava le afioga a le Alii e uiga i le faaumatiaga o Ierusalema; ona e ao ina faataunuuina mea uma na fetalai mai ai le Alii e uiga i le faaumatiaga o Ierusalema.

14 Aua faauta, ua lata ona lē toe finau le Agaga o le Alii ma i latou; aua faauta, ua latou teena perofeta, ma ua latou lafoina Ieremia i le falepuipui. Ma sa latou saili e aveese le ola o lo’u tamā, ua oo ai ina latou tuli ese o ia mai le laueleele.

15 O lenei faauta, ou te fai atu ia te outou afai tou te foi atu i Ierusalema o le a outou fano foi faatasi ma i latou. Ma o lenei, afai tou te filifili i ai, o a’e i le laueleele, ma ia manatua upu ua ou tautala atu ai ia te outou, afai tou te o atu o le a outou fano foi; ona ua faapea ona uunaia o a’u e le Agaga o le Alii e tatau ona ou tautala atu ai.

16 Ma sa oo ina ua uma ona tautala atu o a’u, o Nifae, i nei upu, i o’u uso, sa laua feita ia te a’u. Ma sa oo ina oo mai o laua lima ia te a’u, aua faauta, sa laua feita tele lava, ma laua noatia a’u i maea, aua sa laua saili e aveese lo’u ola, ina ia latou tuu a’u i le vao ia ’aina e manu feai.

17 Peitai sa oo ina ou tatalo atu i le Alii, ua ou faapea atu: Le Alii e, e tusa ma lo’u faatuatua ia te oe, sei e laveaiina a’u mai lima o o’u uso; ioe, foai mai ia te a’u le malosi ia mafai ai ona ou motusia o nei maea ua noatia ai a’u.

18 Ma sa oo ina ua ou fai atu ia upu, faauta, sa matala ese maea mai o’u lima ma o’u vae, ma sa ou tulai i luma o o’u uso, ma ou toe tautala atu ia i laua.

19 Ma sa oo ina la toe feita mai foi ia te a’u, ma taumafai e oo mai o laua lima ia te a’u, ae faauta o se tasi o afafine o Isamaeli, ioe, ma lona tinā foi, ma se tasi o atalii o Isamaeli, sa aioi atu i o’u uso ma sa oo ina latou faamalūlūina o laua loto; ma sa la tuu ai lo laua taumafai e aveese lo’u ola.

20 Ma sa oo ina laua faanoanoa ona o lo laua amioleaga, sa oo ina laua ifo mai i o’u luma, ma aioi mai ia te a’u ia ou faamagalo atu ia te i laua mo mea na laua faia e faasaga mai ia te a’u.

21 Ma sa oo ina ou faamagalo ma le alofa ia te i laua i mea uma sa la faia, ma sa ou apoapoai atu ia te i laua ia la tatalo atu i le Alii lo laua Atua mo se faamagaloga. Ma sa oo ina faapea ona la faia. Ma ina ua uma ona la tatalo atu i le Alii sa toe alu la matou malaga agai atu i le faleie o lo matou tamā.

22 Ma sa oo ina matou o ifo i le faleie o lo matou tamā. Ma ina ua mavae ona o ifo o a’u ma o’u uso ma le ’auaiga uma o Isamaeli i le faleie o lou tamā, sa latou ava’e le faafetai i le Alii lo latou Atua; ma sa latou osi atu taulaga ma taulaga mu ia te ia.