1 Mo nao mi wantem se yufala i save se afta we papa blong mi, Lihae, i bin stop blong talem ol profesi long saed blong laen blong hem, i bin hapen se Lod i bin toktok long hem bakegen, hem i talemaot se i nogud blong hem, Lihae, blong i tekem famli blong hem i go long waelples olgeta nomo; be ol boe blong hem oli mas karem ol gel blong narafala man olsem waef blong olgeta, blong oli save gat sam pikinini long saed blong Lod long graon blong promes.

2 Mo i bin hapen se Lod i bin givim oda long hem, se mi, Nifae, mo ol brata blong mi, mifala i mas gobak bakegen long graon blong Jerusalem, mo karem Ismael mo famli blong hem i go daon long waelples.

3 Mo i bin hapen se mi, Nifae, bakegen wetem ol brata blong mi, mifala i bin aot long waelples blong go antap long Jerusalem.

4 Mo i bin hapen se mifala i bin go antap long haos blong Ismael, mo mifala i bin kam gud long ae blong Ismael, inaf blong mekem se mifala i talemaot long hem ol toktok blong Lod.

5 Mo i bin hapen se Lod i bin mekem hat blong Ismael i kam sofsof, mo tu, hat blong evriwan insaed long haos blong hem, inaf blong mekem se oli bin joenem wokbaot blong mifala i go daon long waelples i go kasem tenet blong papa blong mifala.

6 Mo i bin hapen se long taem we mifala i stap wokbaot long waelples, luk Leman mo Lemyul, wetem tu long ol gel blong Ismael, mo tufala boe blong Ismael mo ol famli blong tufala, oli bin go agensem mifala; yes, oli agensem mi, Nifae, mo Sam, mo papa blong olgeta, Ismael, mo waef blong hem, mo tri narafala gel blong hem.

7 Mo i bin hapen se long rao ia, oli bin wantem gobak long graon blong Jerusalem.

8 Mo nao mi, Nifae, mi bin harem nogud from we hat blong olgeta i strong, from hemia, mi bin toktok long olgeta se, yes, long Leman mo Lemyul, mi talem se: “Luk, yutufala i ol brata blong mi we yutufala i bon bifo mi; mo ?olsem wanem nao yutufala i strong long hat blong yutufala, mo yutufala i blaen long ol tingting blong yutufala, mekem se yutufala i gat nid se, mi, yangfala brata blong yutufala, i mas toktok long yutufala, yes, mo soem wan eksampol long yutufala?

9 ?Hao nao i hapen se yutufala i no bin folem gud toktok blong Lod?

10 ?Hao nao i hapen se yutufala i bin fogetem we yutufala i bin luk wan enjel blong Lod?

11 Yes, mo ?hao nao i hapen se yutufala i bin fogetem ol gudfala samting we Lod i bin mekem blong yumi, long taem we hem i sevem yumi aot long ol han blong Leban, mo tu, se yumi save kasem histri ia?

12 Yes, mo ?hao nao i hapen se yutufala i bin fogetem se Lod i save mekem evri samting we hem i wantem mekem, long ol pikinini blong ol man, blong mekem se oli soemaot fet long hem? Taswe, bae yumi mas stap fetful long hem.

13 Mo sapos i hapen olsem se bae yumi stap fetful long hem, bae yumi kasem graon blong promes; mo bae yutufala i save, long sam taem long fiuja, se ol toktok blong Lod bae i hapen long saed blong taem we Jerusalem i lus evriwan; from evri samting we Lod i bin talem long saed blong taem we Jerusalem i lus evriwan, bae i mas hapen.

14 From luk, bae i no longtaem, Spirit blong Lod bae i stop blong wok wetem olgeta; from luk, oli bin sakemaot ol profet, mo Jeremaea oli bin sakem hem long kalabus; mo oli bin lukaotem blong tekemaot laef blong papa blong mi, inaf blong mekem se oli bin ronem hem i aot long graon.

15 Nao luk, mi talem long yutufala se sapos yutufala i gobak long Jerusalem bae yutufala tu i ded wetem olgeta. Mo nao, sapos yutufala i gat joes, go antap long graon, mo tingbaot ol toktok we mi talemaot long yutufala, se sapos yutufala i go bae yutufala tu i mas ded; from olsem ia nao Spirit blong Lod i mekem mi blong talem samting ia.”

16 Mo i bin hapen se afta we mi, Nifae, i bin talem ol toktok ia long tufala brata blong mi, tufala i bin kros long mi. Mo i bin hapen se tufala i bin putum ol han blong tufala long mi, from luk, tufala i bin kros tumas, mo tufala i bin fasem mi wetem ol rop, from tufala i bin lukaotem blong tekemaot laef blong mi, blong tufala i save livim mi long waelples blong ol wael animol i save kakae mi.

17 Be i bin hapen se mi bin prea long Lod, mi talem se: “O Lod, folem fet blong mi we mi gat long yu, bae yu mekem mi i kam fri aot long ol han blong tufala brata blong mi; yes, givim paoa long mi tu blong mi save brekem ol rop ia we i stap fasem mi.”

18 Mo i bin hapen se afta we mi talem ol toktok ia, luk, ol rop i bin kamaot long ol han mo ol leg blong mi, mo mi stanap long fored blong tufala brata blong mi, mo mi toktok long tufala bakegen.

19 Mo i bin hapen se tufala i bin kros long mi bakegen, mo oli bin lukaotem blong putum han blong tufala long mi; be luk, wan long ol gel blong Ismael, yes, mo tu, mama blong hem, mo wan long ol boe blong Ismael, i bin plis long tufala brata blong mi, inaf blong mekem se tufala i bin mekem hat blong tufala i kam sofsof; mo tufala i bin stop blong traem blong tekemaot laef blong mi.

20 Mo i bin hapen se tufala i bin harem nogud, from fasin nogud blong tufala, inaf blong mekem se tufala i bin bodaon long fored blong mi, mo tufala i bin plis long mi blong mi save fogivim tufala from samting ia we tufala i bin mekem agensem mi.

21 Mo i bin hapen se mi fogivim gud tufala from evri samting we tufala i mekem, mo mi askem strong long tufala se bae tufala i prea long Lod, God blong tufala blong askem hem blong fogivim tufala. Mo i bin hapen se tufala i mekem olsem. Mo afta we tufala i bin mekem prea long Lod, mifala i wokbaot bakegen i go from tenet blong papa blong mifala.

22 Mo i bin hapen se mifala i kam daon i kasem tenet blong papa blong mifala. Mo afta we mi mo ol brata blong mi, mo ol famli blong Ismael i kam daon i kam kasem tenet blong papa blong mi, oli talem tangkyu long Lod, God blong olgeta; mo oli bin mekem sakrifaes mo bonem ol ofring i go long hem.