1 Iwe non ewe fansoun am aua ioifengeni meinisin sokopaten napanapen foun ira seni ew me ew sokkun, me grain seni sokopaten nikinikin, me pwan seni ew me ew sokopaten ekkewe masowen non foun ira.

2 Iwe non ewe fansoun nupwen semei we a nonnom non ewe fonu pon a kapas ngeni kem, a apasa: Nengeni, ua fen tana ew tan; ika, non ekkoch kapas, ua kuna ew nemasepwi.

3 Iwe nengeni, pokiten ekkewe mettoch minne ua fen kuner, a wor rei popun ai upwe pwapwa non ewe Samon pokiten Nifai me pwan Sam; pokiten a wor rei popun ai upwe nuku pwe ir, me pwan chommong mwirimwirir kewe, repwe manau.

4 Nge nengeni, Leiman me Lemuel, ua fokkun noninen pokiten ami; pun nengeni, ua ekieki pwe ua kuna non ai tan, ew rochen me toputopun fonu pon.

5 Iwe non ewe fansoun ngang ua kuna emon mwan, me i a ufouf non echo uf mi pwech; me i a feito me uta me mwei.

6 Iwe non ewe fansoun a kapas ngeniei, me a ereni ei pwe upwe tapweno mwirin.

7 Iwe non ewe fansoun nupwen ua tapweno mwirin ua kuna pwe ua nonnom non ew fonu mi pon mi kiroch me toputop.

8 Iwe mwirin ua sai non ukukun chommong awa non rochopwak, ua poputa ne iotek ngeni ewe Samon pwe epwe wor an umoumoch woi, usun an chommongun umoumoch mi napanap.

9 Iwe non ewe fansoun mwirin ua iotek ngeni ewe Samon ua kuna ew watten me wamongun masies.

10 Iwe non ewe fansoun ua kuna efoch ira, foun ewe ira a fokkun murinno ngeni an epwe fori an emon epwe pwapwa.

11 Iwe non ewe fansoun ua fen feino me ochoch seni ewe foun ira; iwe ua kuna pwe a fokkun ngarangar, nap seni meinisin foun ira ua fen neni me akkom. Ewer, iwe ua kuna pwe ewe foun ira mi pwech, a nuseni meinisin sokkun pwechepwech ua fen pin kuna.

12 Iwe nupwen ua ochoch ewe foun ira a fokkun aurano ngunui ren pwapwa chapur; ina minne, ua poputa ne mochen pwe ai we famini epwe pwan ochoch seni; pun ngang mi sinei pwe a fokkun anno seni meinisin foun ira.

13 Iwe nupwen ua nenefetanei mesei kewe, ita ren ai upwe tongeni pwan kuna ai we famini, ua kuna ew chonupupun konik; me a pupuno, me a nom kan ngeni ewe ira ewe ua ochei uwan ewe.

14 Iwe ua nengeni pwe upwe kuna seni ian a feito me ia; iwe ua kuna nepopun we a ekis towaweno; me ikewe a poputa me ia ua kuna inemi we Saraia, me Sam, me Nifai; me ra uta usun ita rese sinei ian repwe feino ie.

15 Iwe non ewe fansoun ua akkanipor; iwe ua pwan apasa ngenir ren ew neuwomongun mongungu pwe repwe feito rei, me ochoch seni ewe foun ira, ewe a fokkun anno seni meinisin foun ira.

16 Iwe non ewe fansoun ra feito rei me ra pwan ochoch seni ewe foun ira.

17 Iwe non ewe fansoun ua mochen pwe Leiman me Lemuel repwe feito me pwan ochoch seni ewe foun ira; ina minne, ua neneno ngeni nepopun ewe chonupupu, ren ita ai upwe tongeni kuner.

18 Iwe non ewe fansoun ua kuner, nge rese mochen repwe feito ngeniei me ochoch seni ewe foun ira.

19 Me ua kuna ew wokun mecha, me a weneno unukun nepekin ewe chonupupu, me a emmweni ngeni ewe ira unukun minne ua uta ie.

20 Iwe ua pwan kuna ew aan mi aukukkun me chokisikis, ewe a weneno unukun ewe wokun mecha, pwan ngeni ewe ira minne ua uta ie; me a pwan feino unukun popun we, ngeni ew watten me wamongun masies, usun ita fen nge ew fonufan.

21 Iwe ua kuna chommong mwicheichen aramas, chommong me neir ra nikitu ne feinno mwer, pwe repwe tongeni tori ewe aan minne a aaneno ngeni ewe ira unukun ikewe ua uta ie.

22 Iwe non ewe fansoun ra feito, me poputa ne fetan non ewe aan minne a aaneno ngeni ewe ira.

23 Iwe non ewe fansoun a feita ew toputopun rochopwak; ewer, fokkun ew toputopun rochopwak mi napanap, ina popun ir ekkewe ra poputa ne fetan non ewe aan ra morukono seni aaner, ren ar fetan seni iwe ra monucheno.

24 Iwe non ewe fansoun ua kuna ekkoch ra nikitu ne feinno mwer, me ra feito me kamwochuno nesopun ewe wokun mecha; me ra nikitu ne feino mwer non ewe toputopun rochopwak; kamwochunuk ngeni ewe wokun mecha, pwan tori ar ra feito me ochoch seni ewe foun uwan ewe ira.

25 Iwe mwrin ar ra ochoch seni ewe foun uwan ewe ira ra nenefetanei meser kewe usun nge ita ra saw.

26 Iwe ua pwan nenefetanei mesei kewe, me ua kuna, won epekin ewe chonupupun konik, ew watten me womongun imw; me a uta usun ita mi nom non asepwan, tekia seni ewe fonufan.

27 Iwe a ureno ren aramas, chinnap me pwan kukkun, pwan mwan me fefin; me sokkun ufer a fokkun murino; iwe ra nom non ewe napanapen asawa me itini autun pour ngeni ekkewe ra feito ikewe me ochoch seni ewe foun ira.

28 Iwe mwirin ar ra fen neni ewe foun ira ra saw, pokiten ekkewe ra turunufaser; iwe ra rikino ngeni ekkewe aan mi annuk iwe ra monucheno.

29 Iwe iei ngang, Nifai, use apasa meinisin ekkewe kapas an semei we.

30 Nge, ren an epwe mwochomwoch non makkan, nengeni, a kuna ekkoch mwicheichen aramas ra nikitu ne feinno mwer; iwe ra feito me kamwochuno nesopun ewe wokun mecha; me ra nikitu ne feinno mwer non aaner kewe, ra soposopono ne kamwochunuk ngeni ewe wokun mecha, tori ar ra feito me turuno me ochoch seni ewe foun uwan ewe ira.

31 Iwe a pwan kuna ekkoch mwicheichen aramas ra ewein fengen non aaner ngeni ewe watten me wamongun imw.

32 Iwe non ewe fansoun chommong ra kokono non anonnonun ewe chonupupu; iwe chommong ra monucheno seni mwen mesan, ra tokono won ekkoch an mi sokkono.

33 Iwe a fokkun napanap ewe mwicheichen aramas ewe a tonong non ewe imw mi sokkono. Iwe mwirin ar ra tonong non ewe imw ra itini ewe autun pounen koput ngeniei me ekkewe ra pwan ochoch seni ewe foun ira; nge am ause ekieki usur.

34 Ikkei ekkewe kapas an semei we: Pun meinisin mi ekieki usur, ra fen rikino.

35 Iwe Leiman me Lemuel rese ochoch seni ewe foun ira, semei we a apasa.

36 Iwe non ewe fansoun mwirin semei we a apasa meinisin ekkewe kapasen an we tan ika nemasepwi, minne ra chommong, a apasa ngeni kem, pokiten ekkei mettoch minne a kuna non ew nemasepwi, a fokkun noninen fan iten Leiman me Lemuel; ewer, i a noninen pwe repwene pokupok seni mwen mesen ewe Samon.

37 Iwe a peser fiti unusen ewe amemefin noninenin in me sam mi tong, pwe repwe aneasochis ngeni an kewe kapas, ren ita an ewe Samon epwe umoumoch ngenir, me esap pokureno; ewer, semei we a afanafan ngenir.

38 Iwe mwirin a afanafan ngenir, me pwan osini ngenir chommong mettoch, a erenir pwe repwe aneasochisi ekkewe annuk an ewe Samon; iwe a kouno ne kapas ngenir.