Japta 9
Nifae i mekem tu set blong histri—Oli singaotem tufala buk ia, ol buk blong Nifae—Ol bigfala buk oli gat histri blong ol man wetem ol samting we oli mekem long evri dei long laef blong olgeta—Ol smolfala buk oli gat histri blong ol tabu samting. Raonabaot 600–592 B.K.B.
1 Mo evri samting ia, papa blong mi i bin luk mo i bin harem, mo i bin tokbaot, taem we hem i stap long wan tenet long vale blong Lemyul, mo tu, plante moa samting, we mi no save raetem long ol buk ia.
2 Mo nao, olsem we mi bin tokbaot long saed blong ol buk ia, luk oli no ol buk we mi bin mekem wan ful stori blong histri blong ol pipol blong mi; from ol buk we mi bin mekem wan ful histri blong ol pipol blong mi, mi bin givim nem blong Nifae; taswe, oli singaotem olgeta ol buk blong Nifae, folem nem blong mi nomo; mo ol buk ia tu, oli singaotem olgeta, ol buk blong Nifae.
3 Be, mi bin kasem wan komanmen long Lod se mi mas mekem ol buk ia, from spesel stamba tingting se i mas gat wan histri we oli raetemdaon we i tokbaot seves blong ol pipol blong mi.
4 Long ol narafala buk oli mas raetemdaon histri blong rul blong ol king, mo ol faet mo ol rao blong ol pipol blong mi; taswe, ol buk ia oli blong saed blong seves; mo ol narafala buk oli blong rul blong ol king, mo ol faet, mo ol rao blong ol pipol blong mi.
5 Taswe, Lod i bin givim oda long mi blong mekem ol buk ia from wan waes stamba tingting blong hem, we stamba tingting ia, mi no save.
6 Be Lod i save evri samting stat long stat; taswe, hem i mekem rere wan rod blong finisim evri wok blong hem long medel blong ol pikinini blong ol man; from luk, hem i bin gat evri paoa blong mekem evri toktok blong hem i hapen. Mo i olsem ia nao. Amen.