1 Ut chixjunil li k’a’aq re ru a’in kiril lin yuwa’, ut kirab’i, ut kixye naq toj yoo chi wank sa’ jun li muheb’aal t’ikr, sa’ li ru taq’a Lemuel, jo’ ajwi’ naab’al chik xkomon li k’a’aq re ru, li ink’a’ naru xtz’iib’ankil chiruheb’ li perel ch’iich’ a’in.

2 Anajwan ut, jo’ xin’aatinak chirixeb’ li perel ch’iich’ a’in, k’ehomaq reetal, moko a’aneb’ ta li perel ch’iich’ nink’e wi’ chi tz’aqal li esil chirix lin tenamit; xb’aan naq eb’ li perel ch’iich’ nink’e wi’ chi tz’aqal li esil chirix lin tenamit, a’an Nefi kink’e choq’ xk’ab’a’; jo’kan naq a’aneb’ lix perel ch’iich’ laj Nefi nayeeman reheb’, jo’ chanru ink’ab’a’ laa’in; ut eb’ li perel ch’iich’ a’in, a’aneb’ ajwi’ lix perel ch’iich’ laj Nefi nayeeman reheb’.

3 A’ut kink’ul jun lix taqlahom li Qaawa’ naq tinyiib’eb’ li perel ch’iich’ a’in, re jun li chaab’il ajom re taawanq jun li esil tz’iib’anb’il chirix lix k’anjel lin tenamit sa’ li paab’aal.

4 Chiruheb’ li jun ch’ol chik chi perel ch’iich’ taatz’iib’amanq jun esil chirix li rawa’b’ejileb’ li rey, ut eb’ li pleet ut li wech’ok-ib’ re lin tenamit; jo’kan naq eb’ li perel ch’iich’ a’in wankeb’ choq’ re xk’ihal li k’anjel sa’ li paab’aal; ut li jun ch’ol chik chi perel ch’iich’ wankeb’ choq’ re xk’ihal li rawa’b’ejileb’ li rey ut eb’ li pleet ut li wech’ok-ib’ re lin tenamit.

5 Jo’kan ut, li Qaawa’ kinixtaqla chixyiib’ankileb’ li perel ch’iich’ a’in choq’ re jun lix chaab’il ajom a’an, jun ajom li moko nawb’il ta inb’aan.

6 A’b’anan li Qaawa’ naxnaw chixjunil li k’a’aq re ru chalen chaq sa’ xtiklajik; jo’kan ut, a’an naxkawresi jun li b’e re taa’uxmanq chixjunil lix k’anjel sa’ xyanqeb’ li ralal xk’ajoleb’ li winq; xb’aan naq k’ehomaq reetal, a’an wan chixjunil lix wankilal re xtz’aqob’resinkil ru chixjunil li raatin. Ut jo’kan wan. Amen.