1 Ha koʼág̃a, Jacob oñeʼẽ upéramo hetave mbaʼe che tavayguakuérape; upevére ahaiuka koʼã mbaʼe añónte, ha umi mbaʼe ahaivaʼekue iporãmante chéve.

2 Ha koʼág̃a che; Nefi, ahaive Isaías ñeʼẽgui, che ánga horýgui iñeʼẽme. Amoĩta iñeʼẽnguéra che tavayguakuérare, ha aguerahaukáta opa che raʼykuérape, haʼe añetehápe ohecha haguére che Rredentórpe, che ahecha haguéicha chupe.

3 Ha che joykeʼy Jacob, ohecha avei chupe che ahecha haguéicha, upévare, aguerahaukáta iñeʼẽnguéra che raʼykuérape ahechauka hag̃ua chupekuéra añeteguaha che ñeʼẽnguéra. Upévare, mbohapy ñeʼẽ rupi, heʼi Tupã, che amoĩta che ñeʼẽ. Upevére; Tupã ombou hetave testígo, ha ohechauka añeteha opa iñeʼẽ.

4 Péina ápe, che ánga hory ahechaukávo che tavayguakuérape Cristo jeju añeteguaha; ha, upevarã oñemeʼẽvaʼekue Moisés léi; ha opa mbaʼe Tupãre oñemeʼẽvaʼekue yvypórape, yvóra ñepyrũmby guive, haʼe imohaʼangaha.

5 Ha che ánga avei hory umi konveniokuéra Ñandejára ojapovaʼekuére ñande rukuéra ndive; heẽ, che ánga hory igrásia, ha ihustísiape, ha puʼaka, ha poriahuvereko upe tuicha ha opaveʼỹva plan de rredensiõ reheguápe.

6 Ha che ánga hory ahechaukávo che tavayguakuérape, Jesucristo ndoúiramo, opa yvypóra omanovaʼerãha.

7 Ha ndaipóriramo Cristo, ndaipóri Tupã; ha ndaipóriramo Tupã ñande nañaiméi, ndaiporivaʼerãmoʼãigui mbaʼeʼapo. Ha katu oĩ peteĩ Tupã, ha haʼe Cristo; ha haʼe ou pe hiʼaraite plenitud-pe.

8 Ha koʼág̃a ahai mbovymi Isaías ñeʼẽnguéra, umi che tavayguakuéra ohechátavape koʼã ñeʼẽ ikatu hag̃ua omopuʼã ikorasõ ha ovyʼa hag̃ua opa yvypórare. Ha koʼág̃a koʼãva haʼe umi ñeʼẽ, ha ikatu pemoĩ pendejehe ha opa yvypórare.