1 Im kiiō, Jekab eaar kōnono elōn̄ļo̧k men ko n̄an armej ro aō ilo iien eo; mekarta men kein wōt iaar kōm̧m̧an bwe ren jeje, bwe men ko iaar jei rebwe n̄an eō.

2 Im kiiō n̄a, Nipai, ij jeje eļapļo̧k naan ko an Aiseia, bwe aō ej m̧ōņōņō ilo naan ko an. Bwe inaaj karōki naan ko an n̄an armej ro aō, im inaaj jilkinļo̧ki n̄an aolep ro nejū, bwe em̧ool eaar lo aō Ripinmuur, em̧ool āinwōt iaar lo E.

3 Im ļeo jatū, Jekab, eaar barāinwōt lo E āinwōt iaar lo E; kōn menin, inaaj jilkinļo̧k aer innaan n̄an ro nejū n̄an kam̧ool n̄an er bwe naan ko aō rem̧ool. Kōn menin, jān naan ko an jilu, Anij eaar ba, Inaaj katōt Aō innaan. Kōn menin, Anij ej jilkintok elōn̄ļo̧k rikam̧ool, im E ej kam̧ool aolep An innaan.

4 Lo, aō ej m̧ōņōņō ilo kam̧ool n̄an armej ro aō m̧ool eo kōn itok eo an Kraist; bwe, bwe kōn jem̧ļo̧k in kien Moses kar letok; im aolep men ko kar litok jān Anij jān jinoin laļ, n̄an armej, rej ņa ainikien E.

5 Im barāinwōt aō ej m̧ōņōņō ilo bujen ko an Irooj ko Eaar kōm̧m̧ani ippān ro jemād; aaet, aō ej m̧ōņōņō ilo jouj eo An, im ilo jim̧we eo An, im kajoor, im tūriam̧o ilo karōk eo eļap im ejjeļo̧k jem̧ļo̧kin n̄an rōļo̧k jān mej.

6 Im aō ej m̧ōņōņō ilo kam̧ool n̄an armej ro aō bwe n̄e Kraist ej jab itok aolep armej renaaj jako.

7 Bwe eļan̄n̄e ejjeļo̧k Kraist ejjeļo̧k Anij; im eļan̄n̄e ejjeļo̧k Anij jej jab, bwe enaaj kar ejjeļo̧k kōm̧anm̧an. A ewōr juon Anij, im E ej Kraist, im E ej itok ilo iien eo ejejjet An.

8 Im kiiō ij jeje jet iaan naan ko an Aiseia, bwe jabdewōt iaan armej ro aō renaaj loi naan kein remaron̄ kotak burueer im lan̄lōn̄ n̄an aolep armej. Kiiō erkein naan ko, im kom̧ maron̄ karōki n̄an kom̧ im n̄an aolep armej.