1 Ilo iiō eo kiin̄ Uzzaia eaar mej, iaar barāinwōt lo Irooj ej jijet ioon juon tūroon, e utiej im leļo̧k ilōn̄, im tōrerein liboror eo An ekobrak tampeļ eo.

2 Ilōn̄ eaar jutak ruo serap ro; kajjojo eaar wōr jiljino pein bao; kōn ruo eaar kaliboboik turin mejān, im kōn ruo eaar kaliboboik neen, im kōn ruo eaar ekkāke.

3 Im juon eaar kōn n̄an eo juon, im ba: E kwōjarjar, E kwōjarjar, E kwōjarjar, ej Irooj in Inelep eo; aolepān laļ ej obrak kōn aiboojoj eo An.

4 Im jurōn kōjām eo eaar m̧akūtkūt kōn ainikien eo eaar ikkūr, im m̧weo eaar obrak kōn baat.

5 Innām iaar ba: Wo ej n̄an eō! bwe Ilukkuun jako; kōnke n̄a juon armej in tie ko rettoon; im ij jokwe ilubwiljin armej ro ettoon tieer; bwe meja raar lo Kiin̄ eo, Irooj in Inelep eo.

6 Innām juon iaan serap ro eaar kātok n̄an eō; ewōr juon mālle ebwil ilo pein, eo eaar bōk e kōn jabōn pā ko jān lokatok eo;

7 Im eaar likūt e ilo lo̧n̄iiū, im ba: Lo, men in eaar un̄ūr tiōm̧; im am̧ bōd em̧ōj bōkļo̧k, im am̧ jero̧wiwi kar karreoiki.

8 Barāinwōt iaar ron̄ ainikien Irooj, ej ba: Wōn Inaaj jilkinļo̧k, im wōn enaaj etal n̄an kōj? Innām iaar ba: N̄a e; jilkinļo̧k eō.

9 Im Eaar ba: Ilo̧k im ba n̄an armej rein—Kom̧in kanooj ron̄jake, ak raar jab meļeļe; im kom̧in kanooj lale, ak raar jab kile.

10 Kōm̧m̧an bwe būruōn armej rein ren matōk, im kōm̧m̧an bwe lo̧jiln̄ier en eddo, im kili mejaer—bwe ren maron̄ lo kōn mejaer, im ron̄ kōn lo̧jiln̄ier, im meļeļe kōn burueer, im ren oktak im mour.

11 Innām iaar ba: Irooj, ewi toun? Im Eaar ba: m̧ae iien eo em̧ōj kwaļo̧k jikin kwelo̧k ko jān ro rej jokwe ie, im m̧ōko ejjeļo̧k armej ie, im āneo en āne jem̧aden.

12 Im Irooj eaar kōm̧akūt armej ro ettoļo̧k, bwe enaaj wōr juon kaarmejjete eļap ilujeen āneo.

13 Ak enaaj wōr juon m̧ōttan jon̄oul, im renaaj ro̧o̧l tok, im naaj kan̄ er, āinwōt wōjke teil eo, im āinwōt wōjke oak eo leer rej pād ilowaan n̄e bwilo̧kaer rejako; āindein ine ekwōjarjar enaaj leen kāān eo.