1 Ut sa’ li kutan a’an, wuqub’ chi ixq te’xchap li junaj chi winq, ut te’xye: Taqak’ux tz’aqal li qawa, ut tz’aqal li qaq’ taqak’e chiqix; ka’ajwi’ laa k’ab’a’ taxaq chook’ab’a’iiq wi’, re risinkil li qaxutaan.

2 Sa’ li kutan a’an ch’ina-usaq ut nimaq xloq’al li ruq’ che’ re li Qaawa’; li taa’uuchinq wi’ li ruchich’och’ chaab’ilaq’ ut chaq’alaq ru chiruheb’ lix komoneb’ laj Israel li xe’kole’.

3 Ut taak’ulmanq naq eb’ li kanajenaqeb’ chaq Sion ut li xe’kana chaq Jerusalen, sant taayeemanq reheb’, li junjunq li tz’iib’anb’il sa’ xyanqeb’ li yo’yookeb’ aran Jerusalen—

4 Naq li Qaawa’ tixchoy xch’ajb’al chaq lix tz’ajnileb’ ru lix rab’in Sion, ut tixchoy risinkil lix kik’el Jerusalen sa’ xyi rik’in li musiq’ej re raqb’a-aatin ut li musiq’ej re k’atok.

5 Ut li Qaawa’ tixyiib’ sa’ xb’een li junjunq chi ochoch sa’ li tzuul Sion, ut sa’ xb’eeneb’ lix ch’utleb’aal, jun li choql ut sib’ chi kutan ut xlemtz’unkil jun li xam naxamnak chi q’eq, xb’aan naq sa’ xb’een chixjunil taawanq lix loq’al Sion choq’ kolb’a-ib’.

6 Ut taawanq jun li muheb’aal choq’ mu chi kutan chiru li tiq, ut choq’ kolb’a-ib’ na’ajej, ut choq’ xtz’apb’aleb’ ru chiru li kaq-sut-iq’ ut chiru li hab’.