Ch’ol 16
Laj Isaias naril li Qaawa’—Neke’kuyman lix maak laj Isaias—A’an nab’oqe’ chi aatinak jo’ profeet—Naxch’olob’ jo’ profeet naq taatz’eqtaanaaq li raatin li Kristo xb’aaneb’ laj Judio—Jun jachal te’sutq’iiq—Chi’ilmanq sa’ Isaias 6. Wan na 559–545 chihab’ ma nayo’la li Kristo.
1 Sa’ li chihab’ naq kikam li rey aj Osias, kiwil ajwi’ li Qaawa’ k’ojk’o sa’ xb’een jun li k’ojarib’aal, taqe’q ut taqsinb’il, ut lix maril li raq’ kixnujob’resi li santil ochoch.
2 Sa’ xb’een wankeb’ chi xaqxo li lemtz’ anjel, li junjunq wan waqib’ lix xik’; rik’in li wiib’ naxtz’ap li rilob’aal, ut rik’in li wiib’ naxtz’ap ru li roq, ut rik’in li wiib’ napurik.
3 Ut li jun kixjap re chixyeeb’al re li jun chik: Sant, sant, sant li Qaawa’ reheb’ li Teepal; chixjunil li ruchich’och’ nujenaq rik’in lix loq’al.
4 Ut ke’eek’an li roqechal li okeb’aal rik’in lix yaab’ xkux li kijapok re, ut kinujak li ochoch rik’in sib’.
5 Toja’ naq laa’in kinye: Rahilal sa’ inb’een! xb’aan naq oso’jenaqin; xb’aan naq laa’in jun li winq li tz’aj xtz’uumal re; ut wankin sa’ xyanq jun li tenamit li tz’ajeb’ xtz’uumal re; xb’aan naq lix naq’ wu rilom li Rey, li Qaawa’ reheb’ li Teepal.
6 Toja’ naq jun reheb’ li lemtz’ anjel kipurik toj b’ar wankin wi’, wan sa’ ruq’ jun li ru xam, li kirisi chaq sa’ xb’een chaq li artal rik’in chapleb’ ch’iich’;
7 Ut kixk’ojob’ chiru li we, ut kixye: K’e reetal, a’in xch’e’ xtz’uumal aawe, ut isinb’il chaq laa maa’usilal, ut laa maak ch’ajb’il chaq.
8 Jo’kan ajwi’ kiwab’i lix yaab’ xkux li Qaawa’, li kixye: Ani tintaqla, ut ani taaxik choq’ qe? Toja’ naq laa’in kinye: Wayi’in. Chinaataqla laa’in.
9 Ut a’an kixye: Ayu, ut ye re li tenamit a’in—Chex’ab’inq chi yaal, a’b’an ink’a’ ke’xtaw xyaalal; ut chex’iloq chi yaal, a’b’an ink’a’ ke’xk’e reetal.
10 K’e xnimal xtib’el lix ch’ooleb’ li tenamit a’in, ut aalob’resiheb’ lix xik, ut tz’apeb’ li ru—maare anchal te’iloq rik’in xnaq’eb’ ru, ut te’ab’inq rik’ineb’ lix xik, ut te’xtaw ru rik’ineb’ lix ch’ool, ut te’jale’q xch’ool, ut te’k’irtesiiq.
11 Toja’ naq kinye laa’in: At Qaawa’, toj jo’q’e? Ut a’an kixye: Toj reetal naq te’kanaaq li ninqi tenamit chi sachso chi maa’ani wan chi sa’, ut eb’ li ochoch chi maajun winq wan, ut oso’jenaqaq li ch’och’ chi junajwa;
12 Ut li Qaawa’ akaq xrisi chi najt eb’ li winq, xb’aan naq taawanq jun li nimla kanab’aak xjunes sa’ xyi li ch’och’.
13 A’ut toj taawanq jun xlajetq raqal, ut eb’ a’an te’sutq’iiq, ut te’k’uxe’q, jo’ chanru jun xtoonal li tz’unu’j che’, ut jo’ jun xtoonal li ji li toj wankeb’ xyu’am naq neke’hire’ lix xaq; chi jo’kan li santil iyaj taawanq choq’ yu’amej chi sa’.