1 Rahilal sa’ xb’eeneb’ li neke’taqlank re li taqlanb’il aatin moko tiik ta, li neke’tz’iib’ank re li rahob’tesink ke’xtaqla;

2 Re xtz’eqtaanankil sa’ raqb’a-aatin li ani maak’a’ k’a’ru re, ut re risinkil li xk’ulub’aqeb’ raj li neb’a’ reheb’ lin tenamit, re te’wanq li xmalka’an choq’ xchapomeb’, ut re te’ruuq chi elq’ak chiru li ani maak’a’ xyuwa’!

3 Ut k’a’ru teeb’aanu sa’ xkutankil li ula’aniik, ut sa’ li sache’k li taachalq chaq chi najt? Ani aj-ik’in tex’eeleliq re xk’ulb’al eetenq’ankil? ut b’ar pe’ teekanab’ lee loq’alil?

4 Naq maa’anihaqin te’k’utzlaaq rub’eleb’ li preex, ut te’t’ane’q rub’eleb’ li kamsinb’ileb’. Rik’in ut chixjunil a’in moko ch’anab’anb’il ta lix josq’il, toj ye’b’il b’an li ruq’.

5 At aj Asiria, lix che’il lin josq’il, ut li xuq’ sa’ ruq’ a’an li xik’ nareek’a.

6 Laa’in tintaqla chixpleetinkil jun tenamit chi aj ka’pak’al-u, ut sa’ xb’een li tenamit yoo wi’ lin josq’il tink’e xchaq’rab’inkil re tixmaq’ k’a’ru reheb’, ut tixchapeb’ li preex, ut tixyeq’iheb’ taq’a jo’ li sulul sa’eb’ li b’e.

7 A’ut a’an moko jo’kan ta nana’leb’an, chi moko naxk’oxla ta chi jo’kan sa’ xch’ool; sa’ xch’ool b’an maaka’ch’in xk’ihal li tenamit naraj xsachb’al ut risinkil chaq.

8 Xb’aan naq a’an naxye: Ma ink’a’ tab’i’ tz’aqal reyeb’ li awa’b’ej we?

9 Ma maawa’ tab’i’ Kalno jo’ Karkemis? Ma maawa’ tab’i’ Hamat jo’ Arpad? Ma maawa’ tab’i’ Samaria jo’ Damasko?

10 Jo’ chanru naq li wuq’ xxaqab’eb’ li awa’b’ejihom wankeb’ wi’ li pak’b’il dios, ut lix yiib’anb’il jalam-uuch q’axal ninqeb’ wi’chik chiruheb’ li wankeb’ chaq Jerusalen ut li wankeb’ chaq Samaria;

11 Ma ink’a’ tab’i’ tinb’aanu ajwi’ re Jerusalen ut li pak’b’il dios wankeb’ chi sa’, jo’ chanru kinb’aanu re Samaria ut li pak’b’il dios wankeb’ chi sa’?

12 Jo’kan ut, naq li Qaawa’ tixchoy xk’anjelankil tz’aqal lix k’anjel sa’ xb’een li tzuul Sion ut sa’ xb’een Jerusalen, taak’ulmanq naq tinch’iila li ruuchinihom lix kawil xch’ool li rey aj Asiria, ut xnimal ru li rilob’aal li taqsinb’il.

13 Xb’aan naq a’an naxye: Rik’in xmetz’ew li wuq’ ut rik’in xchaab’ilal inna’leb’ xinb’aanu li k’a’aq re ru a’in, xb’aan naq seeb’in chi na’leb’ank, ut xinjal xna’aj lix nub’aaleb’ li tenamit, ut xwelq’a lix b’ihomaleb’, ut xinkub’siheb’ li wankeb’ chi sa’ jo’ jun li winq kaw xch’ool;

14 Ut li wuq’ kixtaw jo’ sok lix b’ihomaleb’ li tenamit; ut jo’ neke’xokman li mol li neke’kana, laa’in kinch’utub’ chixjunil li ch’och’, ut maajun kiwan li ki’eek’asink re lix xik’, chi moko li kixte li ruuch re, chi moko li kich’inatz’uyin.

15 Ma tixnima tab’i’ rib’ li maal chiru li nayok’ok rik’in? Ma tixnimob’resi tab’i’ rib’ li jutz’ul ch’iich’ chiru li na’eek’asink re? Chanchan tana’ junaq che’ tixchiq’ rib’ chiru li ani nataqsink re, malaj junaq xuq’ tana’ tixtaqsi rib’ chanchan moko che’ ta okenaq!

16 Jo’kan naq li Qaawa’, li Qaawa’ reheb’ li Teepal, tixtaqla li b’aqalil sa’ xyanqeb’ li ninqeb’ xtib’el re, ut rub’el lix nimal ru tixloch li k’atok jo’ nak’atok junaq xam.

17 Ut lix saqen laj Israel taawanq choq’ xam, ut lix Santil Dios choq’ raq’ xam, ut taaxamnaq ut tixk’at lix k’ix ut lix pajl sa’ junaj chi kutan;

18 Ut tixk’at lix nimal ru lix k’iche’ jo’ ajwi’ lix ch’och’ na’uuchin, li aamej rochb’een li tz’ejwalej; ut te’wanq jo’ na’ux naq nalukta li nak’amok re reetalil li tenamit.

19 Ut ka’ch’inaq chik rela’ lix toonaleb’ li che’ sa’ lix k’iche’, jun li ch’ina al taaruuq raj chixtz’iib’ankil rajlankil.

20 Ut taak’ulmanq sa’ li kutan a’an, naq li rela’ laj Israel, ut jo’ k’ihal re lix junkab’al laj Jakob li xe’kole’, ink’a’ chik te’xkanab’ rib’ chiru li xsak’ok reheb’; te’xkanab’ b’an rib’ chiru li Qaawa’, lix Santil Dios laj Israel, chi tz’aqal yaal.

21 Li rela’ te’sutq’iiq, relik chi yaal, li rela’ laj Jakob, rik’in li Dios kaw xmetz’ew.

22 Xb’aan naq us ta wankeb’ laa tenamit Israel chanchan lix samahib’ li palaw, toj te’sutq’iiq jun rela’ reheb’; li sachok li taqlanb’il taab’ut’unq rik’in tiikilal.

23 Xb’aan naq li Qaawa’ Dios reheb’ li Teepal tixb’aanu jun li sachok, li ak k’oxlanb’il sa’ chixjunil li ch’och’.

24 Jo’kan ut, jo’ka’in naxye li Qaawa’ Dios reheb’ li Teepal: Ex intenamit li wankex Sion, meexuwa ru laj Asirio; a’an tatxsak’ rik’in jun li che’, ut tixtaqsi lix xuq’ sa’ aab’een, jo’ chanru aran Egipto.

25 Yal junpaataq chik, ut taanume’q li xik’ eek’anb’il, ut lin josq’il rik’in lix sachlijikeb’.

26 Ut li Qaawa’ reheb’ li Teepal tixwaklesi jun li rapleb’ choq’ re, jo’ chanru naq kilaje’kamsiik laj Madian sa’ li pek aran Horeb; ut jo’ chanru kiwan lix xuq’ sa’ xb’een li palaw, jo’kan ajwi’ tixtaqsi jo’ chanru aran Egipto.

27 Ut taak’ulmanq sa’ li kutan a’an naq taa’isiiq li riiq sa’ xb’een chaq laa tel, ut lix iiqleb’ sa’ xb’een chaq laa kux, ut li iiqleb’ taasachmanq sa’ xk’ab’a’ li yule’k.

28 A’an ak chalenaq Ayat, numenaq choq’ Mikron; aran Mikmas xk’uulaheb’ lix kareet.

29 Ak numenaqeb’ chiru xxala’ tzuul; xe’kana chi hilank aran Geba; te’xuwaq laj Rama; x’eelelik Gabaa re laj Saul.

30 Taqsi xyaab’ aakux, at xrab’in Galim; chi’ab’iiq resil toj Layis, at Anatot, toq’ob’ aawu.

31 Isinb’il Madmena, neke’xch’utub’ rib’ li wankeb’ Gebim re te’eeleliq.

32 Aran Nob toj taakanaaq sa’ li kutan a’an, tixchiq’ li ruq’ chiru lix tzuulil lix rab’in Sion, li tzuul re Jerusalen.

33 K’ehomaq reetal, li Qaawa’, li Qaawa’ reheb’ li Teepal tixtoq li ruq’ che’ rik’in nimla xiw; ut li ninqeb’ xteram te’yok’e’q chaq; ut te’tuulanob’resiiq laj q’etq’et.

34 Ut tixyok’ chaq lix pimuleb’ li k’iche’ rik’in ch’iich’, ut taat’ane’q Libano xb’aan jun li kaw xmetz’ew.