1 Wo n̄an ro rej kwaļo̧k kien ko rej jab jim̧we, im ro rej jeje kien inepata ko raar kōm̧m̧ani.

2 N̄an kajekdo̧o̧n jim̧we an ro riaikuj, im n̄an bōkļo̧k jim̧we eo jān rijeram̧ōl in armej ro Aō, bwe kōrā ro emej pāleer ren kuņaer, im bwe ren maron̄ ko̧o̧te ro ejjeļo̧k jemāer!

3 Im ta rein renaaj kōm̧m̧ane ilo raan in lotok eo, im ilo ko̧kkure eo enaaj itok jān ettoļo̧k? n̄an wōn kom̧ naaj ko n̄an jipan̄? im ia kwonaaj likūt ami aiboojoj?

4 N̄e ejjab n̄a renaaj badikdik ium̧win rikalbuuj ro, im renaaj wōtlo̧k ium̧win rijipo̧kwe. Kōn aolep men in An illu ej jab jako, ak Pein ej erļo̧ke wōt.

5 O riAssiria, aļaļ in Aō illu, jokoņ eo ilo peier ej aer libabne.

6 Inaaj jilkinļo̧k e ņae juon laļ in rietao, im ņae armej in illu eo Aō Inaaj leļo̧k n̄an e eddo n̄an bōk mennin rakim, im n̄an bōk kuņaer, im n̄an jujuri er āinwōt pedkat in iaļ ko.

7 Ijoke e ejjab meļeļe eo an in, im ejjab āindein ilo būruōn; a ilo būruōn ej n̄an ko̧kkure im bukweļo̧k ejjab jet wōt laļ ko.

8 Bwe e ej ba: Irooj ro aō aolep rej jab maron̄ kiin̄ ke?

9 Ej jab Kalno āinwōt Karkemish ke? Ej jab Hemat āinwōt Arpad ke? Ej jab Sameria āinwōt Damaskōs ke?

10 Āinwōt peiū eaar lo laļ ko an ekjab ko, im eo mennin āe ko an raar ļapļo̧k jān ko ilo Jerusalem im ko ilo Sameria;

11 Ta Ij jamin naaj, āinwōt Iaar kōm̧m̧an n̄an Sameria im ekjab ko an, barāinwōt kōm̧m̧an n̄an Jerusalem im n̄an ekjab ko an?

12 Kōn menin naaj ālikin men kein enaaj āindein n̄e Irooj Eaar kōm̧m̧ane aolepān jerbal eo An ioon Toļ Zaion im ioon Jerusalem, Inaaj kaje leen bōro eo eutiej an kiin̄ in Assiria, im aiboojoj eo an utiej ko an mejān.

13 Bwe e ej ba: Jān kajoor in peiū im jān jeļāļo̧kjeņ eo aō iaar kōm̧m̧ani men kein; bwe n̄a imālōtlōt; im iaar kōm̧akūt tōrerein ko an armej ro, im iaar rakimi m̧weiuk ko aer, im iaar bōklaļļo̧k ro reutiej āinwōt juon em̧m̧aan eperan.

14 Im peiū eaar lo āinwōt juon ej m̧weiuk ko an armej ro; im āinwōt juon ej ainitok lep ko kar likūti wōt im iaar aintok aolepān laļ; im ejjeļo̧k juon eaar kōm̧akūt pein, ak kōpeļļo̧k lo̧n̄iin, ak ajjowewe.

15 Ūlūl eo enaaj ke kautiej būruōn ņae eo ej jekjek kake? Im jidpān eo en ke jejjej ņae eo ej kōm̧akūtkūti? Āinwōt n̄e aļaļ eo ej make em̧m̧akūt ņae ro rej kotak e, ak āinwōt n̄e jokoņ eo ej kotak e make āinwōt n̄e en kar jab juon aļaļ!

16 Kōn menin Irooj Enaaj, Irooj in Inelep eo, jilkinļo̧k ilubwiljin ro An rematōk, ebbōj; im ium̧win aiboojoj eo An enaaj kōjo̧ juon urur āinwōt urur in juon kijeek.

17 Im meram in Israel enaaj n̄an juon kijeek, im Eo Ekwōjarjar An n̄an juon urur, im naaj urur im naaj kan̄ aolep kālōklōk ko im mar kuuj ko an ilo juon raan;

18 Im naaj kan̄e aiboojoj eo an bukun wōjke eo an, im meļaaj ko an rekouwa, jetōb im ānbwin jim̧or; im renaaj āinwōt n̄e eo riebbōk flag ej kijeļo̧k.

19 Im aolep wōjke ko ilo bukun wōjke eo an renaaj iiet, jon̄an juon ajri emaron̄ bwini.

20 Im naaj ālikin men kein ilo raan eo, bwein Israel, im ro raar ko ilubwiljin m̧weo im̧ōn Jekab, naaj jamin bar atartar ioon eo eaar m̧an er, a naaj atartar ioon Irooj, eo Rikwōjarjar in Israel, ilo m̧ool.

21 Im m̧ōttan eo enaaj jepļaaktok, aaet, em̧ool m̧ōttan Jekab, n̄an Anij ekajoor.

22 Bwe men̄e armej ro an Israel rej āinwōt bok in lo̧jet, mekarta juon m̧ōttaer enaaj jepļaaktok; im karōk eo n̄an ko̧kkure enaaj lutōkļo̧k ilo jim̧we.

23 Bwe Irooj Anij in Inelep eo Enaaj kōm̧m̧ane juon karōk, em̧ool ko̧kkure aolep āneo.

24 Kōn menin, āindein Irooj Anij in Inelep ej ba: O armej ro Aō rej jokwe ilo Zaion, kom̧in jab mijak riAssiria; Enaaj m̧an er kōn aļaļ eo, im naaj kotak jokoņan ņae eok, āinwōt kar Ijipt.

25 Bwe jidik wōt iien jān kiiō, im libabne eo enaaj jem̧ļo̧k, im Aō illu ilo aer jorrāān.

26 Im Irooj in Inelep Enaaj poktake juon kaje n̄an e ekkar n̄an m̧anm̧an eo an Midian ilo dekā in Oreb; im āinwōt An aļaļ kar pād ioon lo̧meto āindein E enaaj kotak e āinwōt kar Ijipt.

27 Im enaaj ālikin men kein ilo raan eo An eddo naaj bōkļo̧k jān aeram, im ine eo An jān kōnwaam̧, im ine eo naaj ko̧kkure kōn ekkapit eo.

28 E ej itok n̄an Aiat, E ej kijooneļo̧k n̄an Migron; ilo Mikmash eaar likūt wāikōn ko An.

29 Rekar mootļo̧k ioon iaļ eo; em̧ōj aer bōk jikier ilo Giba; Rema ej mijak; Gibia an Saul eaar ko.

30 Kwōn kotak ainikiōm, O lio nejin Gallim; kōm̧m̧an bwe en ron̄ļo̧k n̄an Laish, O rijerata Anatot.

31 Madmina em̧ōj kōm̧akūti; ro riGibim rej ain doon n̄an ko.

32 Āinwōt bar jidik iien enaaj pād ilo Nob ilo raan eo; enaaj kōm̧akūt pein ņae toļ an lio nejin Zaion, bat eo ilo Jerusalem.

33 Lo, Irooj, Irooj in Inelep eo Enaaj jekļo̧k ra ko kōn kaammijak; im ro reineea naaj juokļo̧k er; im ro rejejjej naaj kōttāik er.

34 Im Enaaj jeki mar ko ilo bukun wōjke ko kōn māāl, im Lebanon naaj wōtlo̧k jān juon ekajoor.