1 Dhe do të dalë një degëz nga trungu i Isait dhe një filiz do të rritet nga rrënjët e tij.

2 Dhe Shpirti i Zotit do të pushojë mbi të, shpirti i urtësisë dhe i kuptimit, shpirti i këshillës dhe i fuqisë, shpirti i diturisë dhe i frikës ndaj Zotit;

3 Dhe do ta bëjë të kuptojë shpejt në frikën e Zotit; dhe ai nuk do të gjykojë nga pamja e syve të tij, as nuk do të qortojë nga dëgjimi i veshëve të tij.

4 Por me drejtësi ai do të gjykojë të varfërin dhe do të qortojë me barazi të bindurit e tokës; dhe ai do të godasë tokën me shufrën e gojës së tij dhe me frymën e buzëve të tij do të vrasë të ligjtë.

5 Dhe drejtësia do të jetë brezi i ijeve të tija dhe besnikëria brezi i veshkave të tij.

6 Ujku do të jetojë me qengjin, leopardi do të shtrihet pranë kecit dhe viçi dhe këlyshi i luanit dhe mëzati së bashku; dhe një fëmijë i vogël do t’i udhëheqë.

7 Dhe lopa dhe ariu do të kullotin; këlyshët e tyre do të shtrihen së bashku; dhe luani do të hajë kashtë si kau.

8 Dhe foshnja e gjirit do të luajë mbi vrimën e nepërkës dhe fëmija i zvjerdhur do ta verë dorën e tij në strofkën e skrapthit.

9 Ata nuk do të prishin, as shkatërrojnë malin tim të shenjtë; pasi toka do të jetë plot me diturinë e Zotit, sikurse ujërat mbulojnë detin.

10 Dhe në atë ditë do të ketë një rrënjë të Isait, që do të caktohet si një emblemë e njerëzve; dhe atë do ta kërkojnë Johebrenjtë; dhe pushimi i tij do të jetë i lavdishëm.

11 Dhe do të ndodhë në atë ditë, që Zoti do të shtrijë dorën e tij përsëri herën e dytë, për të rimarrë mbetjen e popullit të tij, që do të ketë mbetur nga Asiria dhe nga Egjipti, dhe nga Pathrosi dhe nga Kushi, dhe nga Elami dhe nga Shinari, dhe nga Hamathi dhe nga ishujt e detit.

12 Dhe ai do të ngrejë një emblemë për kombet dhe do të mbledhë së bashku të dëbuarit e Izraelit dhe do të mbledhë tok të shpërndarët e Judës nga të katër anët e tokës.

13 Zilia e Efraimit gjithashtu do të zhduket dhe kundërshtarët e Judës do të përjashtohen; Efraimi nuk do ta ketë zili Judën dhe Juda nuk do ta trazojë Efraimin.

14 Por ata do të fluturojnë mbi supet e Filistinëve në drejtim të perëndimit; ata do të plaçkitin së bashku lindjen; ata do të vënë dorë mbi Edomin dhe Moabin; dhe fëmijët e Amonit do t’u binden atyre.

15 Dhe Zoti do ta shkatërrojë krejtësisht gjuhën e detit egjiptian; dhe me erën e tij të fuqishme ai do të tundë dorën e tij mbi lumë dhe do ta godasë atë në shtatë rrjedha dhe do të bëjë që njerëzit ta kalojnë atë me këpucë të thata.

16 Dhe do të ketë një udhë kryesore për mbetjen e popullit të tij, që do të mbetet nga Asiria, sikurse qe për Izraelin në ditën që ai doli nga toka e Egjiptit.