1 Lix rahil Babilonia, li kiril laj Isaias ralal laj Amos.

2 Taqsihomaq li eetalil sa’ xb’een li najt xteramil tzuul, chetaqsi lix yaab’ kuxej chiruheb’, chiq’omaq li uq’ej, re naq te’ok sa’ rokeb’aaleb’ li taqenaqeb’ xwankil.

3 Laa’in kintaqlaheb’ li santob’resinb’ileb’ chiwu, ut kinb’oqeb’ ajwi’ li kaweb’ xmetz’ew we, xb’aan naq lin josq’il moko wan ta sa’ xb’eeneb’ li neke’saho’ sa’ xch’ool rik’in intaqenaqil.

4 Lix choqinkil li k’iila tenamit sa’ li tzuul, jo’ chanchan jun li xnimal ru tenamit, jun li kawil eek’ank reheb’ li reyil tenamit li neke’xch’utub’ rib’, li Qaawa’ reheb’ li Teepal naxmoleb’ li teep re te’pleetiq.

5 Sa’ najtil tenamit neke’chal chaq, sa’ xmaril chaq li choxa, relik chi yaal, li Qaawa’, ut lix k’anjeleb’aal li xik’ nareek’a, re xsachb’al chixjunil li ch’och’.

6 Chex’ayaynaq, xb’aan naq ak xnach’ok chaq xkutankil li Qaawa’; taachalq jo’ jun li sachok xb’aan li Nimajwal.

7 Jo’kan naq te’luktaaq chixjunil li uq’ej, taaq’uno’q xmetz’ew xch’ool li junjunq chi winq;

8 Ut te’xuwaq; te’chape’q xb’aan yot’e’k ut rahil ch’oolejil; te’sachq xch’ool li jun rik’in li jun chik; te’wanq rilob’aal chanchan raq’ xam.

9 K’ehomaq reetal, lix kutankil li Qaawa’ taachalq, xik’il kutan rik’in po’ok ch’oolej ut nimla josq’il, re xkanab’ankil li ch’och’ chi sachso, ut a’an tixsacheb’ chaq sa’ xyi laj maak li wankeb’ aran.

10 Xb’aan naq lix chahimal li choxa ut li jar ch’uut chi chahim wankeb’ aran ink’a’ te’xk’e xsaqenkil; taaq’ojyino’q li saq’e chi nume’k, ut li po ink’a’ tixkanab’ chi lemtz’unk lix saqenkil.

11 Ut laa’in tink’e tojb’a-maak sa’ xb’een li ruchich’och’ xb’aan li ink’a’ us, ut sa’ xb’eeneb’ laj maak xb’aan lix maa’usilaleb’; tink’e chi oso’k lix lab’il laj q’etq’et, ut tinrum lix q’etq’etil li xuwajel winq.

12 Q’axal wi’chik naq tinterq’usi xtz’aq jun li winq chiru li chaab’il ch’iich’ oor, relik chi yaal, jun li winq chiru li kan oor re Ofir.

13 Jo’kan naq tinchiq’ li choxa, ut li ch’och’ taa’elq chaq sa’ xna’aj, sa’ lix po’ik xch’ool li Qaawa’ reheb’ li Teepal, sa’ xkutankil lix nimal xjosq’il.

14 Ut taawanq chanchan li alinasinb’il kej, ut chanchan jun li karneer naq maajun winq naxokok re; ut te’sutq’iiq, li junjunq chi winq rik’in tz’aqal lix tenamit, ut te’eeleliq, li junjunq sa’ tz’aqal lix ch’och’.

15 Li junjunq li wan xq’etq’etil taaq’axe’q ru; relik chi yaal, ut li junjunq li junajinb’il rik’ineb’ laj maak taat’ane’q xb’aan li yok’leb’ ch’iich’.

16 Eb’ lix kok’al te’rache’q chi ch’och’ chiru li rilob’aaleb’; te’poqleeq li rochocheb’ ut te’maakoniiq li rixaqileb’.

17 K’ehomaq reetal, laa’in tinweek’asi xjosq’ileb’ laj medo chirixeb’, li ink’a’ te’sik’oq re li oor ut li plaat, chi moko te’saho’q sa’ xch’ool rik’in.

18 Eb’ lix tzimaj te’xjoriheb’ li saaj winq; ut ink’a’ te’xtoq’ob’a ru li ruuchinihom lix k’uub’ sa’ej; li rilob’aaleb’ ink’a’ te’xkol xyu’ameb’ li kok’al.

19 Ut Babilonia, lix nimal xloq’aleb’ chaq li awa’b’ejihom, lix chaq’al ru lix chaab’ilaleb’ laj Kaldeo, taawanq jo’ ki’ux naq li Dios kixsach Sodoma ut Gomorra.

20 Maajo’q’e chik taawanq anihaq chi sa’, chi moko taawanq anihaq rochoch aran chiru li junjunq tasal tenamit: chi moko tixyiib’ xmuheb’aal aran laj Arabe, chi moko te’xyiib’ xkorral aran laj ilol karneer.

21 Te’yoklaaq b’an aran lix xulel li chaqi ch’och’; ut te’nujaq li rochocheb’ rik’ineb’ li xul neke’tz’uyenk, ut te’wanq aran li warom, ut te’xajoq aran li anum xul.

22 Ut eb’ li k’iche’ xul reheb’ li ch’och’ sa’ xyi palaw te’woob’aq sa’eb’ li rochoch li neke’k’irirnak, ut eb’ li josq’ aj xul sa’eb’ lix chaq’al ru ochoch; ut taanach’oq xq’ehil, ut moko taab’ayq ta xkutankil. Xb’aan naq tinsach a’an sa’ junpaat; relik chi yaal, xb’aan naq laa’in tinwuxtaana ru lin tenamit, a’b’an eb’ laj maak te’oso’q.