1 Ma o lenei, o a’u o Nifae, e lē mafai ona ou tusia mea uma sa aoaoina i totonu o lo’u nuu; pe ua ou malosi tele foi i le tusitusi, e pei o le tautala; ona pe a tautala se tagata e ala i le mana o le Agaga Paia, e molioo e le mana o le Agaga Paia i loto o le fanauga a tagata.

2 Ae faauta, e toatele e ua faamaaa o latou loto e faasaga i le Agaga Paia, ua leai ai sona nofoaga i totonu o i latou; o le mea lea, ua latou lafoai ese ai le tele o mea ua tusia, ma manatu i ai o ni meanoa.

3 Peitai o a’u o Nifae, ua ou tusia mea ua ou tusia, ma ua ou manatu i ai o ni mea ua taua tele, aemaise lava mo o’u tagata. Ona ou te tatalo e lē aunoa mo i latou i le ao, ma susū lo’u aluga i o’u loimata i le po, ona o i latou; ma ou te tagi atu i lo’u Atua i le faatuatua, ma ua ou iloa o le a faafofoga mai o ia i la’u tagi.

4 Ma ua ou iloa o le a faapaiaina e le Alii le Atua a’u tatalo mo le manuia o o’u tagata. Ma o upu ua ou tusia i le vaivai, o le a faia ia malolosi ia te i latou; ona ua faatauanau atu ia te i latou ia latou faia mea lelei; ua faailoa atu ai ia te i latou e uiga i o latou tamā; ma ua tautatala mai e uiga ia Iesu, ma faatauanau atu ia te i latou ia talitonu ia te ia, ma tutumau e oo i le iuga, o le ola lea e faavavau.

5 Ma ua tautala malosi mai e faasaga i le agasala, e tusa ma le manino o le upumoni; o le mea lea, e leai se tagata e ita i upu ua ou tusia vagana ai ua ia te ia le agaga o le tiapolo.

6 Ou te olioli i le manino; ou te olioli i le upumoni; ou te olioli i lo’u Iesu, ona ua togiola e ia lo’u agaga mai seoli.

7 Ua ia te a’u le alofa mamā mo o’u tagata, ma le faatuatua tele ia Keriso o le a ou fetaia’i ma agaga e toatele ma le lē ponā i lona nofoa-faamasino.

8 Ua ia te a’u le alofa mamā mo tagata Iutaia—ua ou ta’ua tagata Iutaia, ona e faatatau ia te i latou na ou tupuga mai ai.

9 Ua ia te a’u foi le alofa mamā mo Nuuese. Ae faauta, e lē mafai ona ou faamoemoe mo se tasi o i latou vagana ai ua latou faalelei ma Keriso, ma ulu atu i le faitotoa vaapiapi, ma savavali i le ala sa’o e tau atu i le ola, ma faaauau i le ala seia oo i le iuga o le aso o loo nofo vaavaaia ai.

10 Ma o lenei, o’u uso pele e, ma tagata Iutaia foi, ma outou tuluiga uma o le lalolagi, ia outou faalogo i nei upu ma talitonu ia Keriso; ma afai tou te lē talitonu i nei upu ia outou talitonu ia Keriso. Ma afai tou te talitonu ia Keriso o le a outou talitonu i nei upu, ona o afioga i latou a Keriso, ma sa tuu mai i latou e ia ia te a’u; ma ua latou aoao mai i tagata uma ia latou faia mea lelei.

11 Afai e lē o ni afioga i latou a Keriso, faamasino outou—ona o le a faaali atu e Keriso ia te outou, i le mana ma le mamalu tele, i le aso gataaga, o i latou o ana afioga; ma o oe ma a’u o le a ta tutu faafesaga’i i luma o lana pa faamasino; ma o le a outou iloa na poloaiina a’u e ia ia tusia nei mea, e ui i lo’u vaivai.

12 Ma ou te tatalo i le Tamā i le suafa o Keriso, ia faaolaina le toatele o i tatou, pe a lē o i tatou uma, i lona malo, i lena aso tele ma le gataaga.

13 Ma o lenei, o’u uso pele e, outou uma na o e o le aiga o Isaraelu, ma outou tuluiga uma o le lalolagi, ou te tautala atu ia te outou e pei o le leo o se tasi ua alaga mai le efuefu: Faasoifua ia seia oo ina oo mai lena aso tele.

14 Ma o outou o e e lē taumamafa i le agalelei o le Atua, ma faaaloalo i upu a tagata Iutaia, faapea foi ma a’u upu, ma afioga o le a tulei mai le fofoga o le Tamai Mamoe a le Atua, faauta, ou te faasoifua tumau e faavavau atu ia te outou, ona o upu nei o le a ta’usalaina ai outou i le aso gataaga.

15 Ona o mea ou te faamauina i le lalolagi, o le a tuuina mai e faasaga ia te outou i le pa faamasino; aua ua faapea ona poloaiina ai o a’u e le Alii, ma e ao ina ou usiusitai. Amene.