1 Amazwi kaJakobe, umfowabo kaNefi, awakhuluma kubantu baNefi:

2 Bhekani, bafowethu abathandekayo, mina, Jakobe, ngibizwe nguNkulunkulu, futhi ngigcotshwe ngendlela yohlelo lwakhe olungcwele, futhi ngingcweliswe ngumfowethu uNefi, enimbuka njengenkosi noma umvikeli, futhi enincike kuye ukuthi aniphephise, bhekani niyazi ukuthi ngikhulume kini izinto eziningi kakhulu.

3 Nokho, ngikhuluma kini futhi; ngokuba nginesifiso sokuba kuzuze imiphefumulo yenu. Yebo, intshisekelo yami inkulu ngani; futhi nani uqobo lwenu niyakwazi ukuthi selokhu kwaba njalo. Ngokuba nginincengile ngayo yonke inkuthalo; futhi nginifundisile amazwi kababa; futhi ngikhulumile kini mayelana nazo zonke izinto ezibhaliwe, kusukela ekudalweni komhlaba.

4 Manje, bhekani, ngizokhuluma kini mayelana nezinto ezikhona, kanye nalezo eziyokwenzeka; ngalokho-ke, ngizonifundela amazwi ka-Isaya. Futhi lawo ngamazwi umfowethu afisa ukuthi ngiwakhulume kini. Futhi ngiwakhuluma kini ngenxa yenu, ukuze nifunde futhi nidumise igama likaNkulunkulu wenu.

5 Manje, amazwi engizowafunda yiwo lawo u-Isaya awakhuluma mayelana nayo yonke indlu ka-Israyeli; ngalokho-ke, ningawabhekisa kini, ngokuba ningabendlu ka-Israyeli. Futhi ziningi izinto ezakhulunywa ngu-Isaya ezingabhekiswa kini, ngenxa yokuthi ningabendlu ka-Israyeli.

6 Manje, yilawa amazwi; Isho kanje iNkosi uNkulunkulu: Bheka, ngiyophakamisa isandla sami kubo abeZizwe, futhi ngimise isibonakaliso sami kubantu; futhi bayoletha amadodana akho ezingalweni zabo, kanye namadodakazi akho bayowatshatha emahlombe abo.

7 Amakhosi ayoba ngoyihlo abakondlayo, nezindlovukazi zabo ngomama bakho abakondlayo; bayokukhothamela ubuso babo bubheke phansi, futhi bakhothe uthuli lwezinyawo zakho; futhi uyokwazi ukuthi ngiyiNkosi; ngokuba abayikujabha labo abangilindayo.

8 Manje mina, Jakobe, ngizokhuluma mayelana nalokho okuphathelene nalamazwi. Ngokuba bheka, iNkosi ingikhombisile ukuthi labo ababeseJerusalema, lapho saphuma khona, babulewe futhi bathwalwa bathunjwa.

9 Nokho, iNkosi ingikhombisile ukuthi bayophinda babuye. Futhi phezu kwalokho ingikhombisile ukuthi iNkosi uNkulunkulu, oNgcwele ka-Israyeli, uyozibonakalisa kubo esenyameni; futhi emva kokuthi isizibonakalisile bayoyishaya futhi bayibethele, njengokwamazwi engelosi eyawakhuluma kimi.

10 Futhi emva kokuthi sebezenze lukhuni izinhliziyo zabo futhi baziqinisa izintamo zabo ngokumelene noNgcwele ka-Israyeli, bheka, izahlulelo zoNgcwele ka-Israyeli ziyokuza phezu kwabo. Futhi usuku luyeza lapho beyoshaywa futhi bahlushwe.

11 Ngalokho-ke, emva kokuthi sebebalekisiwe bayiswa emuva naphambili, ngokuba isho kanje ingelosi, abaningi bayozwa ubuhlungu enyameni, futhi abayikuyekelwa ukuthi babhujiswe, ngenxa yemithandazo yabathembekile; bayohlakazwa, futhi bashaywe, futhi bazondwe, nokho, iNkosi iyokuba nesihawu kubo, kuthi uma bethola ulwazi ngoMkhululi wabo, bayophinda baqoqelwe ndawonye emazweni ayifa labo.

12 Futhi babusisiwe abeZizwe, labo umphrofethi abhale ngabo; ngokuba bheka, uma kungukuthi bayophenduka futhi bangalwi neSiyoni, futhi bangazihlanganisi nalelo bandla elikhulu nelinengekile, bayosindiswa; ngokuba iNkosi uNkulunkulu iyozigcwalisa izivumelwano eyazenza kubantwana bayo; futhi ngalesi sizathu umphrofethi wazibhala lezi zinto.

13 Ngalokho-ke, labo abalwa neSiyoni kanye nabantu besivumelwano beNkosi bayokhotha uthuli lwezinyawo zabo; futhi abantu beNkosi abayikuba namahloni. Ngokuba abantu beNkosi yibo labo abayilindayo; ngokuba basakulindile ukuza kukaMesiya.

14 Futhi bheka, ngokwamazwi omphrofethi, uMesiya uyophinda aziveze okwesibili ukuze ababuyise; ngalokho-ke, uyoziveza kubo ngamandla kanye nangenkazimulo enkulu, kangangoba izitha zabo ziyobhujiswa, uma lolo suku lufika lapho beyokholwa kuye; futhi akukho namunye oyobhujiswa okholwa kuye.

15 Futhi labo abangakholwa kuye bayobhujiswa, ngomlilo, kanye nangesivunguvungu, nangokuzamazama komhlaba, nangokuchitheka kwegazi, nangomashaya bhuqe, kanye nangendlala. Futhi bayokwazi ukuthi iNkosi inguNkulunkulu, oNgcwele ka-Israyeli.

16 Ngokuba kungani impango ingasuswa kubo abanamandla, noma abathunjwe ngokomthetho bakhululwe na?

17 Kepha isho kanje iNkosi: Ngisho nabathunjwa balabo abanamandla bayosuswa, futhi nempango yalabo abesabekayo iyokhululwa; ngokuba uNkulunkulu onaMandla uyobakhulula abantu bakhe besivumelwano. Ngokuba isho kanje iNkosi: Ngiyophikisana nabo labo abaphikisana nawe—

18 Futhi ngiyodlisa labo abakucindezelayo, inyama yabo uqobo; futhi bayodakwa yigazi labo uqobo njenganewayini elimtoti; futhi yonke inyama iyokwazi ukuthi mina Nkosi ngingumSindisi wakho kanye noMkhululi wakho, onaMandla kaJakobe.