1 Faalogo mai ia ia te a’u, outou o e ua mulimuli i le amiotonu. Tepa taulai atu i le papa na foa mai ai outou, ma le pu o le lua o le mea na eli mai ai outou.

2 Tepa taulai atu ia Aperaamo, lo outou tamā, ma Sara, o lē na fanaua outou; ona sa Ou valaauina o ia nao ia, ma faamanuia ia te ia.

3 Ona o le a faamafanafanaina Siona e le Alii, o le a ia faamafanafanaina ona nofoaga laolao uma; ma o le a ia faia lona vao ia pei o Etena, ma lona toafa ia pei o le faatoaga a le Alii. O le a maua ai iina le olioli ma le fiafia, le faafetai ma le leo o viiga.

4 Faalogo mai ia ia te a’u, lo’u nuu e; ma ua’i mai o outou taliga ia te a’u, lo’u atunuu e; ona o le a tuuina atu se tulafono mai ia te a’u, ma o le a Ou faia la’u faamasinoga ia iai o se malamalama mo le nuu.

5 Ua lata mai la’u amiotonu; ua tuuina atu la’u olataga, ma o le a faamasinoina tagata e lo’u lima. O le a faatalitali motu ia te a’u, ma o lo’u lima o le a latou faalagolago i ai.

6 Inā tepa a’e ia o outou mata i le lagi, ma vaai ifo i le lalolagi o i lalo; ona o lagi o le a mou ese atu e pei o le asu, ma o le a agai ina pala le lalolagi e pei o se ofu; ma o i latou o e nonofo ai o le a faapea le ala e feoti ai. Ae o lo’u olataga o le a faavavau, ma o la’u amiotonu o le a lē aveesea.

7 Faalogo mai ia te a’u, outou o e ua iloa le amiotonu, le nuu ua Ou tusia i o latou loto la’u tulafono, aua tou te fefefe i le taufaifai mai o tagata, pe tou te matata’u i lo latou taufaaleaga.

8 Ona o le a ’aina i latou e mogamoga e pei o se ofu, ma o le a ’aina i latou e ilo e pei o fulufulu mamoe. Ae o la’u amiotonu o le a faavavau, ma o la’u olataga e mai lea tupulaga i lea tupulaga.

9 Ala mai ia, inā ala mai ia! Ia ofu ia i le malosi, E, le aao e o le Alii; ala mai ia e pei ona i ai i aso anamua. E lē o ia ea lea o lē na faaumatia Raava, ma faamanu’alia le tarako?

10 E lē o oe ea lea o lē na faamātutuina le sami, o vai o le moana loloto; o lē na faia le loloto o le sami o se auala e ui a’e ai e ua togiolaina?

11 O le mea lea, o le a toe foi mai e ua togiolaina a le Alii, ma o mai ma pesega i Siona; ma o le a i luga o o latou ulu le olioli ma le paia e tumau e faavavau; ma o le a latou maua le fiafia ma le olioli; o le a sola ese le faanoanoa ma le faavauvau.

12 O A’u o ia lea; ioe, o A’u o ia o lē ua faamafanafana ia te oe. Faauta, o ai ea oe, ua e fefe ai i le tagata, o lē o le a oti, ma o le atalii o le tagata, o lē o le a faia ia pei o le mutia?

13 Ma ua faagalo le Alii, o Lē na faia oe, o lē na fofolaina le lagi, ma faataoto le faavae o le lalolagi, ma ua e fefe ai pea i aso uma, ona o le sauā o lē ua faasauā, e peiseai ua sauni o ia e faaumatia? Ma o fea ea le sauā o lē ua faasauā?

14 Ua faavave le faaaunuua o le tagata faatagataotauaina, ina ia mafai ona tatalaina o ia, ma ina ia lē oti o ia i le lua, pe faamutaina lana meaai.

15 Peitai o A’u o le Alii lou Atua, o lē o ana galu na gogolo mai; o le Alii o ’Au o lo’u igoa lea.

16 Ma ua Ou tuu i lou gutu a’u upu, ma faamalumalu oe i le paolo o lo’u lima, ina ia mafai ona Ou faatuina le lagi ma faataatitia faavae o le lalolagi, ma fai atu ia Siona: Faauta, o oe lava o lo’u nuu.

17 Ala mai ia, inā ala mai ia, tulai ia, E, Ierusalema e, o lē na ia inu mai le aao o le Alii le ipu o lona toasa—ua e inumia ’alu o’ona o le ipu o le gatete ua tatau ifo.

18 Ma ua leai se tasi e taitaia o ia mai atalii uma na fanaua e ia; po o se tasi na te taitai lona lima, mai atalii uma na tausia e ia.

19 Ua o mai ia te oe atalii nei e toalua, o e o le a faanoanoa mo oe—i lou faatafunaga ma faafanoga, ma le oge ma le pelu—ma o ai o le a Ou faamafanafanaina ai oe?

20 Ua matapogia ou atalii, vagana ai i laua ia e toalua; ua taooto i laua i le fetaulaiga o ala; e pei o se povi poa aivao i totonu o se upega, ua tumu i laua i le toasa o le Alii, o le a’oa’iga a lou Atua.

21 O lea faalogo mai nei i lenei mea, o oe ua puapuagatia, ma ’onā, ae lē i le uaina:

22 Ua faapea ona fetalai mai o lou Alii, ua ai’oia e le Alii ma lou Atua le tagi a lona nuu; faauta, ua Ou aveesea mai lou lima le ipu o le gatete, o ’alu o le ipu o lo’u toasa; o le a e lē toe inumia lava.

23 Ae o le a ’Ou tuuina i lima o e e faapuapuagatia ia te oe; o e na fai atu i lou agaga: Ifo maia i lalo, ina ia mafai ona matou ui atu ai i luga—ma sa e faataatia lou tino e pei o le eleele ma e pei o se auala ia te i latou o e na ui atu ai i luga.

24 Ala mai ia, inā ala mai ia, ofu lou malosi, E, Siona e; laei ou ofu matagofie, E, Ierusalema e, le aai paia; ona e amata atu nei ma le agai i luma ona lē toe o mai ia te oe e ua lē peritomeina ma e ua lē mamā.

25 Lulu ese ia le efuefu mai ia te oe; tulai ia, alaala i lalo, E, Ierusalema e; tatala ese oe lava mai noataga o lou ūa, E, le afafine faatagataotauaina o Siona.