1 Mo nao luk, i bin hapen se evri pipol blong graon oli harem ol toktok ia, mo oli witnes long hem. Mo afta ol toktok ia, i no bin gat noes long graon blong spes blong plante aoa;

2 From sapraes blong ol pipol i bin bigwan tumas, mekem se oli stop blong kraekrae mo blong krae singaot from oli lusum ol famli blong olgeta we i bin ded; from hemia, ples i kwaet long ful graon blong spes blong plante aoa.

3 Mo i bin hapen se i gat wan voes bakegen we i kam long ol pipol, mo evri pipol i harem, mo oli witnes long hem, se:

4 “O yufala ol pipol blong ol bigfala bigtaon ia we i bin foldaon, we i ol laen blong Jekob, yes, we i blong laen blong Isrel, hamas taem nao mi bin karem yufala i kam olsem wan faol i karem ol pikinini blong hem i kam andanit long ol wing blong hem, mo givim gudfala kaekae long yufala.

5 Mo bakegen, hamas taem bae mi karem yufala i kam semmak olsem wan faol i karem ol pikinini blong hem oli kam andanit long ol wing blong hem, yes, O yufala ol pipol blong laen blong Isrel, we i bin foldaon; yes, O yufala ol pipol blong laen blong Isrel, yufala we i stap long Jerusalem, olsem we yufala i bin foldaon; yes, hamas taem bae mi bin karem yufala i kam olsem wan faol i karem ol pikinini blong hem, mo yufala i no wantem.

6 O yufala laen blong Isrel we mi bin letem yufala i stap laef, hamas taem bae mi karem yufala i kam olsem wan faol i karem ol pikinini blong hem andanit long ol wing blong hem, sapos yufala i sakem sin mo kambak long mi wetem ful stamba tingting blong hat.

7 Be sapos yufala i no mekem, O laen blong Isrel, ol ples blong yufala we yufala i stap long hem, bae oli kam emti kasem taem we kavenan ia we i go long ol papa blong yufala i hapen.”

8 Mo i bin hapen se afta we ol pipol oli bin harem ol toktok ia, luk, oli stat blong krae mo singaot strong bakegen from oli bin lusum ol famli blong olgeta mo ol fren.

9 Mo i bin hapen se olsem ia nao tri dei ia i bin pas i go. Mo i bin moning, mo tudak i kamaot long fes blong graon, mo graon i stop blong seksek, mo ol ston oli stop blong brokbrok, mo ol nogud noes blong fraet oli stop, mo evri bigfala noes oli pas oli go.

10 Mo graon i bin joen tugeta bakegen, mekem se hem i kam strong; mo ol harem sore from ded, mo ol krae, mo ol bigfala krae sore blong ol pipol we Kraes i letem olgeta oli stap laef, i bin stop; mo harem sore blong olgeta i bin kam olsem glad blong olgeta, mo ol kraekrae blong olgeta oli kam pres mo oli stap talem tangkyu long Lod Jisas Kraes, Ridima blong olgeta.

11 Mo olsem ia nao ol skripja oli kam blong hapen, we ol profet oli bin tokbaot.

12 Mo hem i pat blong ol pipol we oli bin gat moa stret mo gud fasin we Lod i bin sevem, mo hem i olgeta ia we oli bin akseptem ol profet mo oli no stonem olgeta; mo i olgeta ia we oli no bin mekem blad blong ol sent i ron, we Kraes i letem olgeta oli laef—

13 Mo Kraes i bin letem olgeta oli laef, mo oli no go daon andanit mo graon i no berem olgeta; mo oli no draonem olgeta long ol dip ples blong solwota, mo oli no bonem olgeta long faea, mo tu, i no gat wan samting i foldaon long olgeta mo smasem olgeta i ded; mo waelwin i no karem olgeta oli gowe; mo tu, stim blong smok mo tudak i no kavremap olgeta.

14 Mo nao, eniwan we i ridim, letem hem i andastanem; hem we i gat ol skripja, letem hem i luklukgud long olgeta, mo luk mo lukgud sapos ol ded ia mo ol fasin blong prapa spolem gud samting tru long faea, mo tru long smok, mo tru long ol bigfala hariken, mo tru long ol waelwin, mo tru long graon i open blong tekem olgeta, mo evri samting ia i no soemaot se ol profesi blong ol tabu profet i hapen.

15 Luk, mi talem long yu, Yes, plante i bin testifae long saed blong ol samting ia long taem we Kraes i kam, mo oli bin kilimded olgeta from oli bin testifae long saed blong ol samting ia.

16 Yes, profet Sinos i bin testifae long saed blong ol samting ia, mo tu, Sinok i bin toktok long saed blong ol samting ia, from oli testifae moa long saed blong mifala we i smol haf blong laen blong olgeta we i stap yet.

17 Luk, papa blong yumi bifo, Jekob, hem tu i bin testifae long saed blong smol haf blong Josef we oli stap yet. Mo luk, ?yumi i no smol haf blong Josef we i laef yet? Mo ol samting ia we i testifae long saed blong yumi, ?oli no bin raetem olgeta long ol buk we oli mekem wetem bras we papa blong yumi Lihae i bin karemaot long Jerusalem?

18 Mo i bin hapen se long en blong teti mo fo yia, luk, bae mi soemaot long yufala se ol pipol blong Nifae we Kraes i bin letem olgeta oli laef, mo tu, olgeta we oli bin singaotem olgeta Ol Man blong Leman, we Kraes i bin letem olgeta oli laef, Kraes i soem ol gudfala fasin long olgeta, mo i kapsaetem ol bigfala blesing long hed blong olgeta, inaf blong mekem se i no longtaem afta we Kraes i go antap long heven, i tru we hem i bin soemaot hemwan long olgeta—

19 Hem i soemaot bodi blong hem long olgeta, mo i tijim olgeta; mo wan histri blong seves blong hem bae mi talemaot afta long hemia. From hemia, blong taem naoia, mi mekem wan en blong ol toktok blong mi.