1 Ma sa oo ina ua uma ona fetalai mai e Iesu nei upu ia Nifae, ma i latou o e na valaauina, (o lenei o le aofai o i latou o e na valaauina, ma ua maua le mana ma le pule e papatiso atu ai, e toasefululua) ma faauta foi, sa ia faaloaloa mai lona aao i le motu o tagata, ma fofoga mai ia te i latou, ua fetalai mai: Amuia outou pe afai tou te uai atu i upu a lenei toasefululua o e ua ou filifilia mai totonu ia te outou e auauna atu ia te outou, ma avea ma a outou auauna; ma o i latou ua ou tuuina atu i ai le mana ina ia mafai ona latou papatiso ai outou i le vai; ma pe a uma ona outou papatiso i le vai, faauta, o le a ou papatisoina outou i le afi ma le Agaga Paia; o lea amuia lava outou pe afai tou te talitonu mai ia te au ma papatiso, ina ua uma lea ona outou vaai ia te a’u ma iloa o loo i ai a’u.

2 Ma ou te toe fai atu, e sili atu ona manuia o i latou o e e talitonu ia outou upu ona o le a outou molimau atu sa outou vaai ia te a’u, ma ua outou iloa o loo i ai a’u. Ioe, amuia i latou o e e talitonu ia outou upu, ma o ifo i le loloto o le lotomaualalo ma papatiso, ona o le a asiasia i latou i le afi ma le Agaga Paia, ma o le a latou maua se faamagaloga o a latou agasala.

3 Ioe, amuia e matitiva i le agaga o e e ō mai ia te au, aua e o latou le malo o le lagi.

4 Ma ou te toe fai atu, amuia i latou uma o e e faanoanoa, aua o le a faamafanafanaina i latou.

5 Ma amuia e e agamalu, aua o le a fai mo o latou tofi le lalolagi.

6 Ma amuia i latou uma o e e fia aai ma fia feinu i le amiotonu, aua o le a faatumuina i latou i le Agaga Paia.

7 Ma amuia e e alolofa atu, aua e alofaina mai i latou.

8 Ma amuia i latou uma o e e loto mama, aua o le a latou vaai i le Atua.

9 Ma amuia i latou uma o e e faatupuina le filemu, aua o le a ta’ua i latou o fanau a le Atua.

10 Ma amuia i latou uma o e ua sauaina ona o lo’u igoa, aua e o latou le malo o le lagi.

11 Ma amuia outou pe a upu leagaina ma sauaina outou e tagata, ma fai mai ituaiga uma o mea leaga e faasaga ia te outou e tuua’ia pepelo ai outou, ona o a’u;

12 Aua o le a outou maua le olioli tele ma le fiafia naua, aua o le a silisili lo outou taui i le lagi; aua sa faapea ona latou sauaina o perofeta o e na muamua ia te outou.

13 E moni, e moni, ou te fai atu ia te outou, ou te tuu atu ia te outou ia fai ma masima o le lalolagi; ae afai e magalo le masima o se a se mea a faamai ai le lalolagi? O le a mai i lena taimi ona leai se mea e aoga ai le masima, ae na’o le lafoaiina i fafo ma soli i lalo o vae o tagata.

14 E moni, e moni, ou te fai atu ia te outou, ou te tuu atu ia te outou ia avea outou ma malamalama o lenei nuu. O se aai e faatu i luga o se maupuepue e le mafai ona lilo.

15 Faauta, pe tutu ea e tagata se lamepa ma tuu i lalo o se pusa teu saito? E leai, ae latou te tuuina i luga o se tuugalamepa, ma o le a susulu atu ai lona malamalama ia i latou uma o e o i totonu o le fale.

16 O lea ia faasusulu atu ai lo outou malamalama i luma o lenei nuu, ina ia latou vaai ai ia outou galuega lelei ma viia lo outou Tamā o i le lagi.

17 Aua tou te manatu ua ou sau e faaumatia le tulafono po o perofeta. Ou te lei sau e faaumatia ae e faataunuu;

18 Ona e moni ou te fai atu ia te outou, sa lei mavae atu lava se iota e tasi po o se mataitusi e tasi mai le tulafono, ae ua faataunuuina uma lava ia te a’u.

19 Faauta foi, ua ou tuu atu ia te outou tulafono ma poloaiga a lo’u Tamā, ia outou talitonu mai ia te au, ma ia outou salamo ia outou agasala, ma o mai ia te au ma le loto momomo ma le agaga salamo. Faauta, ua i o outou luma poloaiga, ma ua faataunuuina le tulafono.

20 O lea ia outou o mai ia te au ma faaolaina; ona e moni ou te fai atu ia te outou, vagana ai o le a outou tausia au poloaiga ia ua ou poloaiina ai outou i lenei taimi, e leai lava se ala o le a mafai ona outou ulu atu ai i le malo o le lagi.

21 Ua outou faalogo na fai mai i latou o e o taimi anamua, ma ua tusia foi i o outou luma, aua e te fasioti tagata, ma o soo se tasi e fasioti tagata o le a nofo sala i le faamasinoga a le Atua;

22 Ae ou te fai atu ia te outou, soo se tasi e ita i lona uso o le a nofo sala i lana faamasinoga. Ma o soo se tasi e fai atu i lona uso, Raka, o le a nofo sala i le fono; ma o soo se tasi e fai atu, Lou vale, o le a nofo sala i le afi o seoli.

23 O lea, afai tou te o mai ia te au, pe tou te mananao e o mai ia te au, ma e manatua ua i ai i lou uso se mea e faasaga ia te oe—

24 Ia e alu atu i lou ala i lou uso, ma muamua ona e faalelei i lou uso, ma ona e sau ai lea ia te au ma le faamoemoe atoa o le loto, ma o le a ou taliaina oe.

25 Ia vave ona e faalelei ma lou fili a’o e i ai i le ala faatasi ma ia, nei maua oe e ia i se taimi, ma lafo ai oe i le falepuipui.

26 E moni, e moni, ou te fai atu ia te oe, e leai se auala e tatala mai ai oe i fafo sei vagana ai ua e totogi atu senine uma lava. Ma a’o e i ai i le falepuipui, e mafai ea ona e totogi atu se senine e tasi? E moni, e moni, ou te fai atu ia te oe, E leai.

27 Faauta, ua tusia e i latou o taimi anamua, aua e te mulilua;

28 Ae ou te fai atu ia te outou, soo se tasi e vaai atu i se fafine, e tuinanau ia te ia, ua uma ona mulilua o ia i lona loto.

29 Faauta, ou te tuu atu ia te outou se poloaiga, ia outou le tuu se tasi o ia mea ia ulu i totonu o lou loto;

30 Aua e sili ona lelei ona outou faafiti o outou lava mai nei mea, ia o le a outou ave ai i luga la outou satauro, nai lo le lafoina o outou i seoli.

31 Ua tusia, o soo se tasi na te faate’a i lana ava, ia tuu atu e ia ia te ia se tusi o le teteaga.

32 E moni, e moni, ou te fai atu ia te outou, soo se tasi na te faate’a i lana ava, vagana ai mo le pogai o le faitaaga, ua ia faamuliluaina o ia; ma o soo se tasi e faaipoipo i le fafine o lē ua faate’aina, ua mulilua.

33 Ma ua tusia foi, aua e te tauto pepelo, a ia fai au tautoga i le Alii;

34 Ae e moni, e moni, ou te fai atu ia te outou, ia aua lava nei tauto atu; po o i le lagi, aua o le nofoalii lea o le Atua;

35 Po o i le lalolagi, aua e mapu i ai ona aao;

36 Aua foi nei e tauto atu i lou ulu, aua e le mafai ona e faauliuli pe faapaepae se lauulu e tasi;

37 A ia fai a outou fesootaiga i le na’o le Ioe, ioe; Leai, leai; aua o soo se mea e taua e sili atu nai lo nei, ua leaga.

38 Ma faauta, ua tusia, o se mata mo se mata, ma se nifo mo se nifo;

39 Ae ou te fai atu ia te outou, aua nei outou faatautee i le leaga, ae ai se na te po mai i lou alafau taumatau, ia liliu atu foi ia te ia le isi;

40 Ma afai e i ai se tagata na te molia oe i le tulafono ma ua aveese lou peleue, ia tuu atu foi ia te ia lou pulupulu;

41 Ma o soo se tasi na te faamalosiina oe e te alu i se maila e tasi, o faatasi ma ia i maila e lua.

42 Ia avatu ia te ia o lē e ole mai ia te oe, ma aua e te liliu ese mai ia te ia o lē e manao e nono mai ia te oe.

43 Ma faauta ua tusia foi, ia e alofa atu i lou tuaoi ae ia inoino i lou fili;

44 Ae faauta ou te fai atu ia te outou, alolofa i o outou fili, faamanuia atu ia i latou o e e fetuu mai ia te outou, fai mea lelei ia i latou o e e inoino mai ia te outou, ma tatalo mo i latou o e latou te faaaoga outou ma le inoino ma sauaina outou;

45 Ina ia avea outou ma fanau a lo outou Tamā o lē o i le lagi; ona ua ia faia lona la ia oso ae i luga o le leaga ma luga o le lelei.

46 O lea o ia mea o taimi anamua, ia sa i lalo o le tulafono, ua faataunuuina uma ia te au.

47 Ua faate’a atu mea tuai, ma ua faafouina mea uma.

48 O lea ou te manao ia outou atoatoa e pei lava o a’u, po o lo outou Tamā o lē o i le lagi e atoatoa.