1 Luk, nao i bin hapen se taem we Jisas i talem ol toktok ia, hem i lukluk raonabaot bakegen long grup blong pipol ia, mo hem i talem long olgeta: “Luk, taem blong mi i kam kolosap.

2 Mi luk se yufala i slak, i mekem se yufala i no save andastanem evri toktok blong mi we Papa i bin givim oda long mi blong talemaot long yufala long taem ia.

3 From hemia, yufala i gobak long haos blong yufala, mo tingting hevi long ol samting we mi bin talem, mo askem long Papa, long nem blong mi, blong yufala i save andastanem, mo mekem rere ol tingting blong yufala blong tumoro, mo mi kambak long yufala bakegen.

4 Be nao mi go long Papa, mo tu, blong soemaot miwan long ol laen blong Isrel we oli lus, from oli no lus long Papa, from hem i save long weaples hem i bin tekem olgeta i go long hem.”

5 Mo i bin hapen se taem we Jisas i toktok olsem ia nao, hem i sakem ol ae blong hem raonabaot long grup blong pipol ia, mo i luk we oli stap krae, mo i luk stret long hem olsem se bae oli askem hem blong stap wetem olgeta smol taem moa.

6 Mo hem i bin talem long olgeta: “Luk, ol insaed blong mi oli fulap wetem lav mo sore long yufala.

7 ?Yufala i gat eniwan we i sik long medel blong yufala? Karem olgeta oli kam long ples ia. ?Yufala i gat eniwan we bodi blong olgeta i nogud, o oli blaen, o we leg blong olgeta i nogud, o we i handikap, o we i gat leprosi, o we haf bodi blong olgeta i ded, o we sora blong olgeta i fas, o we oli gat hadtaem long eni fasin? Karem olgeta oli kam long ples ia mo bae mi mekem olgeta i oraet, from mi mi gat sore long yufala; ol insaed blong mi oli kam fulap wetem sore.

8 From mi luk se yufala i wantem se bae mi soemaot long yufala wanem mi bin mekem long ol brata blong yufala long Jerusalem, from mi luk se fet blong yufala i inaf blong mi mas mekem yufala i oraet.”

9 Mo i bin hapen se taem we hem i toktok olsem ia nao, evri grup blong pipol ia, long semtaem, oli go fored wetem ol sikman blong olgeta, mo olgeta we oli gat hadtaem, mo olgeta we bodi i nogud, mo olgeta we oli blaen, mo wetem olgeta we oli no save toktok, mo wetem evriwan we i gat hadtaem long eni fasin; mo hem i bin mekem olgeta evriwan oli kam oraet taem we oli karem olgeta oli go fored long hem.

10 Mo olgeta evriwan, olgeta we oli bin kam oraet tugeta wetem olgeta we oli bin stap gud nomo, oli bodaon long ol leg blong hem, mo oli wosipim hem; mo olgeta evriwan we i save kam i nomata long grup blong pipol ia oli kisim ol leg blong hem, inaf blong mekem se oli wasem ol leg blong hem wetem ol wota blong ae blong olgeta.

11 Mo i bin hapen se hem i bin givim oda se oli mas karem ol smol pikinini blong olgeta oli kam.

12 Mekem se oli karem ol smol pikinini blong olgeta mo oli putum olgeta i go daon long graon raonabaot long hem, mo Jisas i stanap long medel blong olgeta; mo grup blong pipol ia i muv bak kasem taem we oli karem olgeta evriwan i kam long hem.

13 Mo i bin hapen se taem we oli karem evriwan i kam, mo Jisas i stanap long medel blong olgeta, hem i givim oda long grup blong pipol ia se oli mas nildaon long graon.

14 Mo i bin hapen se taem we oli nildaon long graon, Jisas i harem nogud long hemwan, mo i talem: “Papa, mi mi harem nogud from ol fasin nogud blong ol pipol blong laen blong Isrel.”

15 Mo afta we hem i talem ol toktok ia, hem hemwan i nildaon tu long graon, mo luk hem i bin prea long Papa, mo ol samting we hem i prea from, oli no save raetem, mo grup blong pipol ia oli bin testifae se oli harem hem.

16 Mo long fasin ia nao oli testifae se: “Ae i neva bin luk, o neva sora i bin harem, bifo, ol samting ia we oli bigfala mo gudfala olsem we mifala i bin luk mo i bin harem Jisas i talemaot long Papa;

17 Mo i no gat wan tang i save talem, mo tu, i no gat eni man i save raetem, mo tu, hat blong ol man i no save tingting nomo long ol bigfala mo gudfala samting olsem we mifala i bin luk mo bin harem Jisas i talemaot; mo i no gat man i save talemaot glad we i bin fulumap sol blong mifala long taem we mifala i harem hem i prea from mifala long Papa.”

18 Mo i bin hapen se taem we Jisas i mekem wan en blong prea long Papa, hem i girap; be glad blong grup blong pipol ia i bigwan tumas, i mekem se oli no gat paoa nating.

19 Mo i bin hapen se Jisas i toktok long olgeta, mo i talem olgeta blong stanap.

20 Mo oli girap long graon, mo hem i talem long olgeta: “Yufala i kasem blesing from fet blong yufala. Mo nao luk, glad blong mi i fulap.”

21 Mo afta we hem i talem ol toktok ia, hem i krae, mo grup blong pipol ia i witnes long samting ia, mo hem i tekem ol smol pikinini blong olgeta wan afta narawan, mo hem i blesem olgeta, mo i prea long Papa from olgeta.

22 Mo afta we hem i bin mekem samting ia, hem i krae bakegen.

23 Mo hem i toktok long grup blong pipol ia, mo i talem long olgeta: “Luk ol smol pikinini blong yufala.”

24 Mo taem we oli stap lukluk blong luk, oli sakem ol ae blong olgeta i go long heven, mo oli luk ol heven oli open, mo oli luk ol enjel oli stap kamdaon aot long heven olsem we oli stap long medel blong faea; mo oli kam daon mo oli raonem ol smol pikinini ia, mo faea i raonem olgeta; mo ol enjel oli givhan long olgeta.

25 Mo grup blong pipol ia oli luk mo harem mo witnes; mo oli save we witnes blong olgeta i tru, from se olgeta evriwan long olgeta i bin luk mo harem, evri man ia, olgetawan, oli luk; mo namba blong olgeta i kolosap tu taosen mo faef handred sol; mo hemia oli ol man, ol woman, mo ol pikinini.