1 Mo nao i bin hapen se taem we Jisas i go antap long heven, grup blong pipol ia oli seraot, mo evri man i tekem waef blong hem mo ol pikinini blong hem mo gobak long haos blong hem.

2 Toktok i bin go raon long medel blong ol pipol kwiktaem, bifo tudak i kam, se grup blong pipol ia oli bin luk Jisas, mo we hem i bin givim seves long olgeta, mo tu, we bae hem i mas soemaot hemwan long tumoro long grup blong pipol ia.

3 Yes, mo tu, ful naet, noes abaot Jisas i bin go raon long ol pipol; mo oli sendem nius ia long ol pipol inaf blong mekem se i bin gat plante, yes, wan bigfala namba tumas, we i bin wok had tumas long ful naet ia, blong oli save stap long tumoro long ples we Jisas bae i soemaot hemwan long grup blong pipol ia.

4 Mo i bin hapen se long tumoro blong hem, taem we grup blong pipol ia i bin stap tugeta, luk, Nifae mo brata blong hem we hem i bin resemap hem aot long ded, we nem blong hem i Timoti, mo tu, boe blong hem, we nem blong hem i Jonas, mo tu, Matonae, mo Matonaeha, brata blong hem, mo Kumen, mo Kumenonhae, mo Jeremaea, mo Semnon, mo Jonas, mo Sedekaea, mo Aesea—nao hemia i bin ol nem blong ol disaepol we Jisas i bin jusum—mo i bin hapen se oli kam fored mo oli stanap long medel blong grup blong pipol ia.

5 Mo luk, grup blong pipol ia oli bin plante tumas mekem se oli mekem se oli mas seraotem olgeta i go long twelef grup.

6 Mo olgeta twelef oli bin tijim grup blong pipol ia; mo luk, oli mekem se grup blong pipol ia i mas nildaon long fes blong graon, mo oli mas prea long Papa long nem blong Jisas.

7 Mo ol disaepol oli bin prea long Papa tu long nem blong Jisas. Mo i bin hapen se oli girap mo oli givhan long ol pipol.

8 Mo taem we oli tijim ol semfala toktok we Jisas i bin talemaot—oli no jenisim ol toktok we Jisas i bin talemaot—luk, oli nildaon bakegen mo oli prea long Papa long nem blong Jisas.

9 Mo oli bin prea from samting we oli wantem tumas; mo oli wantem se bae oli kasem Tabu Spirit.

10 Mo afta we oli bin prea olsem ia nao, oli go daon kolosap long saed blong wota, mo grup blong pipol ia i folem olgeta.

11 Mo i bin hapen se Nifae i go daon insaed long wota mo hem i kasem baptaes.

12 Mo hem i bin kam antap aot long wota mo i stat blong mekem baptaes. Mo hem i baptaesem olgeta evriwan we Jisas i jusum.

13 Mo i bin hapen se taem we olgeta evriwan i kasem baptaes, mo i kam antap aot long wota, Tabu Spirit i bin kam daon long olgeta, mo oli kam fulap wetem Tabu Spirit mo wetem faea.

14 Mo luk, wan samting olsem faea i bin raonem olgeta; mo i kam daon aot long heven, mo grup blong pipol ia i bin witnes long samting ia mo oli talem testemoni; mo ol enjel oli kam daon aot long heven mo oli givhan long olgeta.

15 Mo i bin hapen se taem we ol enjel oli stap givhan long ol disaepol, luk, Jisas i kam mo i stanap long medel mo i givhan long olgeta.

16 Mo i bin hapen se hem i toktok long grup blong pipol ia, mo i givim oda long olgeta se oli mas nildaon bakegen long graon, mo tu, se ol disaepol blong hem oli mas nildaon long graon.

17 Mo i bin hapen se taem we olgeta evriwan oli nildaon long graon, hem i givim oda long ol disaepol blong hem se oli mas prea.

18 Mo luk, oli bin stat blong prea; mo oli prea long Jisas, oli singaotem hem Lod blong olgeta mo God blong olgeta.

19 Mo i bin hapen se Jisas i kamaot long medel blong olgeta, mo i go longwe lelebet aot long olgeta, mo hemwan bakegen i bodaon long graon, mo hem i talem:

20 “Papa, mi talem tangkyu long yu from yu bin givim Tabu Spirit long olgeta ia we mi bin jusum; mo hem i from bilif blong olgeta long mi, we mi bin jusum olgeta aot long wol.

21 Papa, mi prea long yu blong yu givim Tabu Spirit long olgeta evriwan we bae i biliv long ol toktok blong olgeta.

22 Papa, yu bin givim olgeta Tabu Spirit from oli biliv long mi; mo yu luk we oli biliv long mi from yu harem olgeta, mo oli prea long mi; mo oli prea long mi from mi stap wetem olgeta.

23 Mo nao Papa, mi prea long yu from olgeta, mo tu, from olgeta we bae oli bilivim ol toktok blong olgeta, blong oli save biliv long mi, blong mi save stap long olgeta olsem yu, Papa, i stap long mi, blong mekem se mifala i save stap wan.”

24 Mo i bin hapen se afta we Jisas i prea olsem ia nao long Papa, hem i kam long ol disaepol blong hem, mo luk, oli stap yet, mo oli no stop blong prea long hem; mo oli no talem plante toktok, from Tabu Spirit i bin givim long olgeta, wanem oli mas prea from mo Tabu Spirit i mekem se oli fulap long ol samting we oli wantem.

25 Mo i bin hapen se Jisas i blesem olgeta taem we oli stap prea long hem; mo fes blong hem i smael long olgeta, mo laet blong fes blong hem i saen long olgeta, mo luk oli waet olsem fes, mo tu, ol klos blong Jisas; mo luk, waet ia i bitim evri waet, yes, mo i no save gat eni samting long wol ia i waet olsem waet blong hem.

26 Mo Jisas i bin talem long olgeta: “Gohed blong prea,” be oli no bin stop blong prea.

27 Mo hem i bin tanem hem bakegen aot long olgeta bakegen, mo i go longwe lelebet mo i hemwan bakegen i bodaon long graon; mo i prea bakegen long Papa, se:

28 “Papa, mi talem tangkyu from yu bin mekem olgeta we mi bin jusum oli kam klin evriwan, from fet blong olgeta, mo mi prea from olgeta, mo tu, from olgeta we bae oli biliv long ol toktok blong olgeta, blong oli save kam klin evriwan long mi, tru long fet long ol toktok blong olgeta, i semmak olsem we oli kam klin evriwan long mi.

29 Papa, mi no prea from wol, be from olgeta we yu bin givim long mi aot long wol, from fet blong olgeta, blong oli save kam klin evriwan long mi, blong mi save stap long olgeta semmak olsem yu, Papa, i stap long mi, blong mekem se mifala i save stap wan, blong mi save kasem glori we bae i kam tru long olgeta.”

30 Mo afta we Jisas i bin talem ol toktok, ia hem i kambak bakegen long ol disaepol blong hem; mo luk oli gohed blong prea long hem we oli no stop; mo hem i smael long olgeta bakegen; mo luk oli bin waet, semmak olsem Jisas.

31 Mo i bin hapen se hem i go longwe lelebet bakegen mo i prea long Papa;

32 Mo tang i no save talem ol toktok we hem i bin prea long hem, mo tu, i no gat man i save raetem ol toktok we hem i bin prea.

33 Mo grup blong pipol ia i bin harem mo oli witnes; mo hat blong olgeta i bin open mo oli bin andastanem long hat blong olgeta ol toktok we hem i bin prea long hem.

34 Be, ol toktok we hem i bin prea long hem oli bigfala mo gudfala tumas mekem se man i no save raetem olgeta, mo tu, man i no save talemaot.

35 Mo i bin hapen se taem we Jisas i finis blong prea, hem i kambak bakegen long ol disaepol, mo i talem long olgeta: “Bigfala fet olsem ia, mi neva bin luk long medel blong evri Jiu; taswe, mi no bin save soemaot long olgeta ol bigfala merikel olsem, from oli no gat bilif.

36 I tru mi talem long yufala, i no gat wan long olgeta we i bin luk ol bigfala samting olsem we yufala i bin luk; mo tu, oli no bin harem ol bigfala samting olsem we yufala i bin harem.”