1 Mo i bin hapen se hem i givim oda long olgeta blong oli mas raetem ol toktok we Papa i bin givim long Malakae, we hem i mas talem long olgeta. Mo i bin hapen se afta we oli raetem olgeta, hem i eksplenem olgeta. Mo hemia oli ol toktok we hem i talem long olgeta, i talem se: “Olsem ia nao Papa i talem long Malakae—Luk, bae mi sendem mesenja blong mi, mo bae hem i mekem rere rod long fored blong mi, mo Lod we yufala i stap lukaotem bae i kam kwiktaem long tempol blong hem; hem i mesenja blong kavenan, we yufala i glad long hem; luk, bae hem i kam, Lod blong Ol Pipol i talem.

2 Be ?huia bae i stap strong long dei we hem i kam, mo huia bae i stanap taem we hem i kamkamaot? From hem i olsem faea blong man blong wokem aean i smut, mo i olsem sop blong man we i wasem klos.

3 Mo bae hem i sidaon olsem wan man blong wokem aean i smut mo olsem man we i mekem silva i klin evriwan; mo bae hem i mekem ol boe blong Livae oli kam klin evriwan, mo i klinim olgeta olsem gol mo silva, blong oli save givim long Lod wan ofring long stret mo gud fasin.

4 Afta, bae ofring blong Juda mo Jerusalem i naes long Lod, semmak olsem long ol dei blong bifo, mo olsem long ol yia long bifo.

5 Mo bae mi kam kolosap long yufala blong jajem yufala; mo bae mi stap olsem wan kwik witnes agensem ol man blong wokem majik, mo agensem olgeta we oli mekem adaltri, mo agensem olgeta we oli mekem ol giaman promes, mo agensem olgeta we oli stap pem nogud man ia we i stap wok blong olgeta, we oli mekem nogud long ol wido mo olgeta we oli no gat papa, mo we olgeta we oli no wantem givhan long man we oli no save, mo oli no respektem mi, Lod blong Ol Pipol i talem.

6 From we mi mi Lod, mi no jenis; from hemia, yufala, ol boe blong Jekob, yufala i no bon long faea.

7 Stat long ol dei blong ol papa blong yufala, yufala i bin go longwe long ol odinens blong mi, mo yufala i no kipim olgeta. Kambak long mi mo bae mi kambak long yufala, Lod blong Ol Pipol i talem. Be yufala i talem: ‘?Long wanem wei nao bae mifala i kambak?’

8 ?Bae wan man i stilim God? Be yet, yufala i bin stilim mi. Be yufala i talem: ‘?Long wanem wei nao mifala i bin stilim yu?’ Long ol taeting mo ol ofring.

9 Yufala, mi sakem strong nogud tok we i wan strong nogud tok agensem yufala, from yufala i bin stilim mi, yes, ful kantri ia.

10 Yufala i karem evri taeting i go insaed long stoahaos, blong i save gat mit long haos blong mi; mo testem mi naoia nomo, Lod blong Ol Pipol i talem, blong luk sapos bae mi no openem ol windo blong heven long yufala, mo kapsaetem antap long yufala, wan blesing we bae i no gat inaf rum blong tekem hem.

11 Mo bae mi tok strong long huia we i stap prapa spolem gud ol kaekae blong yufala, mo bae hem i no spolem ol frut blong graon blong yufala; mo tu, ol rop blong grep blong yufala bae oli karem frut bifo long taem, long ol garen, Lod blong Ol Pipol i talem.

12 Mo evri kantri bae oli talem se mi blesem yufala, from bae yufala i wan naes graon, Lod blong Ol Pipol i talem.

13 Ol toktok blong yufala oli bin strong agensem mi, Lod i talem. Be stil yufala i talem: ‘?Wanem nao mifala i bin talem agensem yu?’

14 Yufala i bin talem: ‘I no nid nating blong wok blong God, mo ?wanem i gud long yumi we yumi bin holem ol odinens blong hem mo we yumi bin wokbaot wetem krae sore long fored blong Lod blong Ol Pipol?

15 Mo nao yumi singaotem olgeta we oli flas se oli hapi; yes, olgeta we oli wokem fasin nogud, oli stanap gud; yes, olgeta we oli traem God oli kam fri tu.’

16 Ale, olgeta we oli respektem Lod, oli toktok plante wan long narawan, mo Lod i lisin gud mo i harem; mo oli raetem wan buk blong histri long fored blong hem blong olgeta we oli bin respektem Lod, mo we oli tingbaot nem blong hem.

17 Mo olgeta ia, bae oli blong mi, Lod blong Ol Pipol i talem, long dei ia we mi mekem ol flas samting blong mi, mo bae mi sevem olgeta olsem wan man i sevem boe blong hemwan we i wok blong hem.

18 Afta bae yufala i kambak mo luksave olgeta we oli stret mo gud, mo olgeta we oli nogud, mo luksave hem we i wok blong God mo hem we i no wok blong God.