1 Mo nao i bin hapen se taem we Jisas i bin talemaot ol samting ia, hem i bin eksplenem long grup blong pipol ia mo hem i bin eksplenem evri samting long olgeta, ol bigfala samting tugeta wetem smolfala.

2 Mo hem i bin talem: “Ol skripja ia, we yufala i no bin gat wetem yufala, Papa i givim oda se mi mas givim long yufala, from hem i waes tingting blong hem se, ol samting ia oli mas kasem ol jeneresen blong fiuja.”

3 Mo hem i bin eksplenem evri samting, long stat kasem taem we bae hem i kam long glori blong hem—yes, mo tu, evri samting we bae i kam long fes blong wol, mo tu, go kasem taem we bigfala faea bae i bonem ol samting mo oli ronaot, mo wol ia bae mi rolem olsem wan skrol, mo ol heven mo wol bae oli lus;

4 Mo go kasem bigfala mo las dei, taem we evri pipol, mo evri famli, mo evri kantri mo lanwis bae oli stanap long fored blong God, blong kasem jajmen from ol wok blong olgeta, blong luk sapos oli gud o sapos oli nogud—

5 Sapos oli gud, bae oli laef bakegen long ded blong kasem laef we i no gat en mo sapos oli nogud, bae oli laef bakegen long ded blong fasin blong no save kam antap samtaem: from tufala samting ia i wok semmak narasaed long tufala, wan long wan han mo narawan long narafala han, folem sore, mo jastis, mo tabu fasin we i stap long Kraes, we i bin stap bifo wol ia i stat.

6 Mo nao mi no save raetem long buk ia, iven mi no save raetem wan pat aot long handred blong ol samting we Jisas i bin tijim long ol pipol;

7 Be luk ol buk blong Nifae oli holem bigfala pat blong ol samting we hem i bin tijim ol pipol long hem.

8 Mo ol samting ia mi bin raetemdaon, i wan pat we i moa smol blong ol samting we hem i bin tijim ol pipol; mo mi raetemdaon olgeta wetem tingting ia se oli save go karem olgeta bakegen i go long ol pipol ia, mo i kamaot long Ol Jentael i go, folem ol toktok we Jisas i bin talem finis.

9 Mo taem we bae oli kasem samting ia, we i nid se oli mas kasem fastaem, blong testem fet blong olgeta, mo sapos i olsem ia se bae oli bilivim ol samting ia, afta nao bae Lod i soemaot ol samting ia we oli moa bigfala long olgeta.

10 Mo sapos i hapen se bae oli no bilivim ol samting ia, nao bae Lod i holembak ol samting we i moa bigfala long olgeta, mekem se oli kasem panis blong olgeta.

11 Luk, mi stap rere blong raetemdaon ol samting ia, evri samting we oli bin raetemdaon long ol buk blong Nifae, be Lod i bin blokem samting ia, i talem: “Bae mi traem fet blong ol pipol blong mi.”

12 From hemia, mi, Momon, mi raetemdaon ol samting we Lod i bin givim oda long mi blong raetem. Mo nao mi, Momon, mi mekem wan en long ol toktok blong mi, mo gohed blong raetemdaon ol samting we Lod i bin givim oda long mi blong mi raetem.

13 From hemia, mi wantem se yufala i mas luk se i tru we Lod i bin tijim ol pipol ia, blong wan taem blong tri dei; mo afta samting ia, hem i soemaot hemwan long olgeta plante taem, mo i brekem bred plante taem, mo blesem, mo givim long olgeta.

14 Mo i bin hapen se hem i tijim mo givhan long ol pikinini blong grup blong pipol ia we mi bin tokbaot, mo hem i mekem se oli toktok plante, mo oli talem long ol papa blong olgeta, ol bigfala mo gudfala samting, mo tu, oli moa bigfala bitim wanem hem i bin talemaot long ol pipol; mo hem i mekem tang blong olgeta, blong oli save toktok.

15 Mo i bin hapen se afta we hem i go antap long heven—long nambatu taem we hem i soemaot hemwan long olgeta, mo hem i go long Papa, afta we hem i mekem evri sikman blong olgeta, mo olgeta we oli no save wokbaot oli kam oraet, mo i openem ol ae blong ol blaen man blong olgeta, mo i openem ol sora blong olgeta we ol sora blong olgeta i fas; mo i tru we hem i mekem oli kam oraet long evri kaen sik long medel blong olgeta, mo i mekem wan man i girap long ded, mo i soemaot paoa blong hem long olgeta, mo i go antap long Papa—

16 Luk, i bin hapen long nekis dei se grup blong pipol ia i kam tugeta long wan ples, mo oli luk mo oli harem ol pikinini ia; yes, ol bebi tu oli bin openem maot blong olgeta mo talemaot ol gudfala samting; mo ol samting we oli bin talemaot, oli blokem se i no mas gat eni man bae i raetemdaon olgeta.

17 Mo i bin hapen se ol disaepol we Jisas i bin jusum oli stat long tetaem ia i go blong baptaesem mo tijim evriwan we oli kam long olgeta; mo evriwan we i bin kasem baptaes long nem blong Jisas oli kam fulap wetem Tabu Spirit.

18 Mo plante long olgeta oli bin luk mo oli harem ol samting we oli no save talemaot, we man i no gat raet blong raetemdaon.

19 Mo oli tij, mo oli givhan wan long narawan; mo oli serem evri samting long medel blong olgeta, evri man i mekem gudfala fasin, wan wetem narawan.

20 Mo i bin hapen se oli mekem evri samting semmak olsem we Jisas i bin givim oda long olgeta blong mekem.

21 Mo olgeta we oli bin baptaes long nem blong Jisas, oli bin singaotem olgeta jos ia blong Kraes.