1 Mo i bin hapen se olsem ia nao naenti mo faef yia i bin pas i go, mo ol pipol oli stat blong fogetem ol saen mo ol sapraes we oli bin harem, mo oli stat blong nomo sapraes long wan saen o wan sapraes we i kam long heven, inaf blong mekem se oli stat blong kam strong long hat blong olgeta, mo oli blaen long ol tingting blong olgeta, mo oli stat blong no bilif long evri samting we oli harem mo oli luk—

2 Oli stap mekemap ol samting nating nomo long hat blong olgeta, oli ting se ol samting ia oli stap hapen tru long ol man mo paoa blong devel, blong lidim i gowe mo blong giaman long hat blong ol pipol; mo olsem ia nao Setan i bin winim kontrol blong hat blong ol pipol bakegen, inaf blong mekem se hem i mekem ol ae blong olgeta oli blaen mo hem i lidim olgeta oli gowe blong bilivim se doktrin blong Kraes i wan krangke samting mo wan samting we i nating nomo.

3 Mo i bin hapen se ol pipol oli stat blong kam strong long fasin nogud mo ol rabis sin; mo oli no biliv se bae i gat eni moa saen o sapraes we bae i kamaot; mo Setan i bin go olbaot, hem i lidim hat blong ol pipol i gowe, hem i temtem olgeta mo mekem se bae oli mekem bigfala fasin nogud long graon.

4 Mo olsem ia nao naenti mo sikis yia i bin pas i go; mo tu, naenti mo seven yia; mo tu, naenti mo eit yia; mo tu, naenti mo naen yia;

5 Mo tu, wan handred yia i bin pas i go stat long ol dei blong Mosaea we i king ova long ol pipol blong Ol Man blong Nifae.

6 Mo sikis handred mo naen yia i pas i go stat long taem we Lihae i bin aot long Jerusalem.

7 Mo naen yia i bin pas i go stat long taem we saen we Lod i bin givim, we ol profet i tokbaot, se Kraes bae i kam long wol.

8 Nao Ol Man blong Nifae oli stat blong kaontem taem blong olgeta stat long taem ia we saen i bin kamaot, o stat long taem we Kraes i kam; from hemia, naen yia i pas i go.

9 Mo Nifae, we i papa blong Nifae, we i gat wok blong stap lukaot gud long ol histri, i no gobak long graon blong Sarahemla, mo oli no save faenem hem long eni ples blong ful graon.

10 Mo i bin hapen se ol pipol oli stap yet long fasin nogud, i nomata long plante prijing mo profesi we oli sendem long medel blong olgeta; mo olsem ia nao nambaten yia tu i pas i go; mo nambaleven yia tu i pas i go wetem rabis sin.

11 Mo i bin hapen se long nambatetin yia, i stat blong gat ol faet mo ol rao raon long ful graon; from ol Gadianton man blong stil oli kam plante tumas, mo oli kilimded plante long ol pipol, mo oli bin prapa spolem gud plante bigtaon, mo oli mekem plante man i ded mo fulap blad i ron raon long graon, i mekem se i gat nid se evri pipol, Ol Man blong Nifae tugeta wetem Ol Man blong Leman oli mas pikimap ol tul blong faet agensem olgeta.

12 From hemia, olgeta Man blong Leman we oli bin jenisim laef blong olgeta i go long Lod oli joen wetem ol brata blong olgeta, Ol Man blong Nifae, mo, from sefti blong laef blong olgeta mo ol woman blong olgeta mo ol pikinini blong olgeta, oli mas pikimap ol tul blong faet agensem ol Gadianton stilman, yes, mo tu, blong holemtaet ol raet blong olgeta, mo ol spesel janis blong jos blong olgeta mo blong wosip blong olgeta, mo indipenden laef blong olgeta mo fridom blong olgeta.

13 Mo i bin hapen se bifo nambatetin yia ia i pas i go, Ol Man blong Nifae oli kasem woning se ol Gadianton stilman bae oli prapa spolem gud olgeta evriwan from faet ia, we i kam bigwan mo mekem man i harem nogud tumas.

14 Mo i bin hapen se Ol Man blong Leman we oli joen wetem Ol Man blong Nifae, oli kaontem olgeta wetem Ol Man blong Nifae;

15 Mo Lod i bin tekemaot strong nogud tok long olgeta, mo skin blong olgeta i kam waet olsem Ol Man blong Nifae;

16 Mo ol yang man blong olgeta mo ol gel blong olgeta oli kam naes tumas, mo oli bin kaontem olgeta wetem Ol Man blong Nifae, mo oli singaotem olgeta Ol Man blong Nifae. Mo olsem ia nao nambatetin yia i bin en.

17 Mo i bin hapen long stat blong fotin yia, faet bitwin ol man blong stil mo ol pipol blong Nifae i gohed mo i kam soa tumas; be, ol pipol blong Nifae i winim samfala janis ova long ol man blong stil, inaf blong mekem se oli pusumbak olgeta aot long ol graon blong olgeta i go long ol bigfala hil mo long ol sikret ples blong olgeta.

18 Mo olsem ia nao fotin yia i bin en. Mo long nambafiftin yia oli kam agensem ol pipol blong Nifae; mo from fasin nogud blong ol pipol blong Nifae, mo plante rao blong olgeta mo ol pulaot long olgeta, ol Gadianton stilman oli bin kasem plante janis ova long olgeta.

19 Mo olsem ia nao nambafiftin yia i bin en, mo olsem ia nao ol pipol oli stap long wan taem blong plante hadtaem; mo naef blong faet blong panis i hang ova long olgeta, inaf blong mekem se kolosap oli rere blong naef ia i katem daon olgeta, mo hemia i from nogud fasin blong olgeta.